Zvyš 80% kampanij pa raspracoŭcy niejrasietak u śviecie bankrutujuć. Čamu tak?

Novaje daśledavańnie mižnarodnaj analityčnaj karparacyi RAND, jakaja absłuhoŭvaje dziaržstruktury ZŠA, Jeŭrasajuza i krain Zachodniaj i Uschodniaj Azii, pakazała, što zvyš 80% suśvietnych prajektaŭ u halinie štučnaha intelektu cierpiać parazu i sutykajucca z bankructvam, što ŭdvaja pieravyšaje siaredni pakazčyk niaŭdač dla technałahičnych startapaŭ u inšych śfierach.

Naprykład, jak piša tajvanskaje vydańnie Commercial Times sa spasyłkaj na kitajskija krynicy, u Kitai za apošnija paŭtara hoda zakrylisia abo prypynili svaju dziejnaść kala 80 tysiač ŠI-kampanij, što składaje kala 10% ad usich zarehistravanych za hety pieryjad kitajskich startapaŭ pa raspracoŭcy niejrasietak.

Apytaŭšy 65 śpiecyjalistaŭ u halinie ŠI z roznych krain, karparacyja RAND skłała śpis asnoŭnych pryčynaŭ takoj niehatyŭnaj tendencyi. Hałoŭnaja ź ich — nierealistyčnyja čakańni kiraŭnictva i supracoŭnikaŭ startapaŭ adnosna mahčymaściaŭ ŠI, jakija hruntujucca na stereatypnych ujaŭleńniach, sfarmavanych dziakujučy masavaj kultury. Heta vyčerpvaje resursy kampanij, jakija haniajucca za niazbytnymi marami.

«U navukoŭcaŭ jość schilnaść začaroŭvacca apošnimi dasiahnieńniami ŭ halinie štučnaha intelektu i ŭkaraniać ich u svaje prajekty biez dbajnaj acenki ich patencyjnaj karysnaści. Hetaja źjava nazyvajecca «sindromam bliskučaj rečy» (shiny object syndrome), i vyjaŭlajecca jana ŭ imknieńni śpiecyjalistaŭ vykarystoŭvać novyja technałohii vyklučna z-za ich naviny, nie ŭličvajučy pry hetym ich adpaviednaść kankretnym zadačam prajekta. Prytrymlivacca apošnich trendaŭ u halinie ŠI važna, ale kamandam taksama varta dumać pra toje, ci sapraŭdy novyja technałohii vyrašajuć ich prablemy abo tolki ŭskładniajuć daśledavańni i robiać ich bolš zabłytanymi i darahimi», — adznačaje RAND. 

Astatnija asnoŭnyja pryčyny niaŭdač ŠI-startapaŭ, pavodle karparacyi, takija:

• Vysokija vydatki na vyličeńni i daśledavańni, skaračeńnie vienčurnaha kapitału i zamarožvańnie finansavańnia, a taksama ciažkaści z dasiahnieńniem prybytkovaści.
• Niapravilnaje razumieńnie taho, jakuju dakładna prablemu nieabchodna vyrašyć z dapamohaj štučnaha intelektu.
• Niedachop nieabchodnych danych dla adekvatnaha i efiektyŭnaha navučańnia madelaŭ štučnaha intelektu.
• Adsutnaść nieabchodnaj infrastruktury dla kiravańnia svaimi danymi i vyličeńniaŭ dla patreb štučnaha intelektu.
• Sproby vyrašać prablemy, jakija zanadta składanyja dla vyrašeńnia sistemami štučnaha intelektu.

Rekamiendacyi ekśpiertaŭ RAND

• Kiraŭniki ŠI-startapaŭ pavinny pierakanacca, što techničny piersanał razumieje metu prajekta i kantekst vobłaści daśledavańnia: nierazumieńnie namieraŭ i mety prajekta — najbolš raspaŭsiudžanaja pryčyna niaŭdačy startapaŭ.
• Vykanańnie prajektaŭ z vykarystańniem štučnaha intelektu patrabujuć času i ciarpieńnia. Pierš čym pačać jaki-niebudź prajekt, kiraŭniki pavinny być hatovyja pryśviacić jak minimum hod na navučańnie kamandy raspracoŭnikaŭ i tłumačeńnie joj niuansaŭ vyrašeńnia kankretnaj prablemy.
• Paśpiachovyja prajekty skancentravany na prablemie, jakuju treba vyrašyć, a nie na technałohii, jakaja vykarystoŭvajecca dla jaje vyrašeńnia.
• Kiraŭniki kampanij pavinny inviestavać u infrastrukturu ŠI: pieršapačatkovyja inviestycyi ŭ sistemy kiravańnia danymi i raźvićcia madelaŭ ŠI mohuć skaracić čas, nieabchodny dla zaviaršeńnia prajektaŭ i pavialičyć abjom vysakajakasnych danych, dastupnych dla efiektyŭnaha navučańnia madelaŭ štučnaha intelektu.
• Varta razumieć i prymać abmiežavańni madelaŭ ŠI: pry razhladzie patencyjnaha prajekta kiraŭniki startapaŭ pavinny staranna apytvać techničnych ekśpiertaŭ dla acenki metazhodnaści prajekta.
• Časam nieabchodna pieraadolvać barjery ŭ zbory danych šlacham supracoŭnictva z uradam: partniorstva pamiž navukovymi kołami i dziaržaŭnymi ŭstanovami moža dać navukoŭcam ŠI-kampanij dostup da danych, nieabchodnych dla akademičnych daśledavańniaŭ.

«Pahonia za lidarstvam u honcy ŠI prymušaje šmatlikija kampanii dziejničać paśpiešliva pry stvareńni svaich prajektaŭ. Varta razumna i ŭvažliva vyvučać niaŭdačy inšych ŠI-startapaŭ i asabliva pryčyny hetych niaŭdač. Urešcie, kali ŠI-kampanii buduć masava i doŭha nie apraŭdvać čakańni svaich klijentaŭ i invierstaraŭ, usia suśvietnaja industryja koštam tryljony dalaraŭ moža łopnuć, jak mylnaja burbałka», — padahulniajuć ekśpierty, apytanyja RAND.

• 4
• 0
• 5
• 0
• 0
• 0
• 0
• 0