Chto tyja ludzi, jakich Łukašenka adpuściŭ z-za krataŭ pa pamiłavańni? Składzieny ahulny partret

Na sajcie pravaabarončaha centra «Viasna» jość imiony ludziej, jakija vyzvalilisia ŭ 2024 hodzie ŭ vyniku pamiłavańnia abo amnistyi. Palitviaźni vyjšli ŭ vyniku ŭkazaŭ Łukašenki ad 16 žniŭnia (30 čałaviek), 4 vieraśnia (30 čałaviek) i 16 vieraśnia (37 čałaviek).

Varta adznačyć, što ŭ redkich vypadkach danyja pravaabaroncaŭ niapoŭnyja: u niejkich, naprykład, nieviadomy prysud, u inšych — uzrost palitviaźniaŭ. Adnak navat takaja infarmacyja dazvalaje skłaści niekatoruju ahulnuju karcinu pra tych, kaho ŭłady vyrašyli adpuścić z-za krataŭ.

Termin

Badaj, hałoŭnaje pytańnie: ci praŭda, što Łukašenka adpuskaje ŭ asnoŭnym tych, kamu zastavałasia pasiadzieć zusim niašmat? I tak, i nie.

Pa danych «Lusterka», u siarednim vyzvalenyja ludzi ŭžo adbyli 68% svaich terminaŭ, u źniavoleńni im zastavałasia pravieści ŭ siarednim pa 456 dzion. Adnak heta, zrazumieła, vielmi siaredni pakazčyk. Kali vydalić z raźlikaŭ siemiarych palitviaźniaŭ z samymi vialikimi nieadsiedžanymi terminami (pra ich detalova pojdzie havorka nižej), to ličby źmieniacca: 70% i 343 dni.

Sumarna ŭ vyniku pamiłavańnia i amnistyi ŭ 2024 hodzie palitviaźniam «daravali» bolš za 88 hadoŭ pazbaŭleńnia voli. Da momantu vyzvaleńnia hetyja ludzi sumarna praviali ŭ niavoli bolš za 138 hadoŭ.

Niekalki čałaviek byli adpuščanyja, praktyčna adsiedzieŭšy ŭvieś vyznačany sudom termin.

Mienš za ŭsio zastavałasia «dasiadzieć» Volzie Stabroŭskaj, Palinie Pałavincy, Vitalu Žylinskamu i Michaiłu Niamcovu: dla ich vychad na volu čakaŭsia litaralna ŭ najbližejšyja tydni, a pamiłavańnie paskoryła vyzvaleńnie na ličanyja dni.

Najbolšy nieadbyty termin zastavaŭsia ŭ Ksienii Łuckinoj, Alaksandra Baranoŭskaha i Natalli Piatrovič — bolš za try hady ŭ kožnaha. Ryhoru Kastusiovu i Vasilu Bieraśnievu «daravali» kala šaści hadoŭ pazbaŭleńnia voli.

Siaredni termin, da jakoha byli prysudžanyja pamiłavanyja Łukašenkam palitviaźni, — 3,5 hoda. Samyja praciahłyja terminy — u Ksienii Łuckinoj (vosiem hadoŭ), Vasila Bieraśnieva (dzieviać hadoŭ) i Ryhora Kastusiova (dziesiać hadoŭ). Samyja «karotkija» — u Volhi Stabroŭskaj (adzin hod i try miesiacy), Aleha Zykuna i Iryny Sankoŭskaj (pa 1,5 hoda).

Pavialičyć

Varta adznačyć, što siarod palitviaźniaŭ u SIZA, turmach i kałonijach u cełym bolš mužčyn. Pavodle danych pravaabaroncaŭ, da hetaha momantu ŭ źniavoleńni zastajecca 1156 mužčyn i 168 žančyn.

Uzrost

Siaredniamu vyzvalenamu było 41,7 hoda. Samaja masavaja ŭzrostavaja hrupa siarod vyzvalenych — ad 30 da 49 hadoŭ.

Pavialičyć

Łukašenka pamiłavaŭ taksama 17 čałaviek starejšych za 50 hadoŭ. Na volu vyjšli i dvoje samych pažyłych palitviaźniaŭ: 76-hadovaja Natalla Taran i 74-hadovy Vasil Bieraśnieŭ.

Artykuł

U 2024 hodzie adpuskali ludziej, asudžanych pa roznych artykułach. Niekatoryja ź ich atrymlivali terminy adrazu pa niekalkich. Voś samyja častyja:

• art. 361-2 (finansavańnie ekstremisckaj dziejnaści);
• art. 130 (raspalvańnie rasavaj, nacyjanalnaj, relihijnaj albo inšaj sacyjalnaj varožaści abo varažniečy);
• art. 368 (abraza Łukašenki);
• art. 293 (masavyja biesparadki);
• art. 361-4 (sadziejničańnie ekstremisckaj dziejnaści);
• art. 342 (arhanizacyja i padrychtoŭka dziejańniaŭ, jakija hruba parušajuć hramadski paradak, albo aktyŭny ŭdzieł u ich);
• art. 367 (paklop u dačynieńni da Łukašenki);
• art. 361 (zakliki da mier abmiežavalnaha charaktaru (sankcyj);
• art. 369 (abraza pradstaŭnika ŭłady).

Naprykład, Taćcianu Birulu asudzili adrazu pa piaci artykułach:

• art. 361 (zakliki da dziejańniaŭ, nakiravanych na pryčynieńnie škody nacyjanalnaj biaśpiecy Respubliki Biełaruś);
• art. 341 (apahańvańnie zbudavańniaŭ i psavańnie majomaści);
• art. 130 (raspalvańnie varožaści abo varažniečy);
• art. 367 (paklop u dačynieńni da Łukašenki);
• art. 361-4 (sadziejničańnie ekstremisckaj dziejnaści).

Sud prysudziŭ žančynu da šaści hadoŭ pazbaŭleńnia voli, paźniej jana trapiła ŭ śpis pamiłavanych i vyjšła na volu. Pamiž jaje zatrymańniem i vyzvaleńniem prajšło paŭtara hoda.

Muža Taćciany, Alaksandra Birulu, sudzili pa tych ža artykułach i taksama prysudzili da šaści hadoŭ pazbaŭleńnia voli. Na hety momant jon zastajecca za kratami.

• 0
• 0
• 0
• 0
• 0
• 1
• 1
• 0