Siastra kiraŭnika MZS Ryžankova žyvie ŭ Francyi, ale paśla pačatku vajny atrymała rasijskaje hramadzianstva
Siastra kiraŭnika MZS Biełarusi Maksima Ryžankova Darja Ryžankova šmat hadoŭ žyvie ŭ Nicy, što nie pieraškadžaje joj padtrymlivać «russkij mir». «Biełsat» raskazvaje, što viadoma pra Darju.
Darja Ryžankova pierajechała ŭ Francyju jašče ŭ 2009 hodzie. Ź jejnaha ŭłasnaha apoviedu vynikaje, što ŭ Biełarusi jana pakinuła paśpiachovuju karjeru markietołaha i pierajechała ŭ Francyju za budučym mužam.
U 2015 hodzie jana pastupiła va ŭniviersitet (Université Côte d'Azur) u Niccy. Tam jana atrymała dypłom bakałaŭra ŭ śpiecyjalnaści «Navuki pra žyćcio i zdaroŭje», a potym dypłom mahistra pa śpiecyjalnaści «Bijabanki i kiravańnie bazami źviestak».
Padčas vučoby Darja mahła sabie dazvolić nie pracavać — jaje ŭtrymlivaŭ muž.
A ŭ mahistratury joj pastupiła prapanova pracavać u bijabanku łabaratoryi patałohijaŭ u Niccy. Ciapier jana praciahvaje supracoŭničać z łabaratoryjaj u jakaści niezaležnaj kansultantki, dzielicca Darja.
Adnak ź Biełaruśsiu i bratam suviazi Darja nie hublała. U śniežni 2022 hoda jana była ŭ Minsku razam z Maksimam Ryžankovym na spabornictvach pa baskietbole pamiaci ich baćki — niekali ministra sportu i turyzmu, pieršaha kiraŭnika NAK Biełarusi Uładzimira Mikałajeviča Ryžankova.
Pačała zaŭvažać niekarektnaje staŭleńnie da «russkoho mira»
Prykładna ŭ hety ž čas u karjery Darji adbyŭsia novy pierałomny momant. Vyhladaje, što jejnaju novaju metaju zrabiłasia dziaržkiravańnie. U 2022—2023 hadach jana stałasia ŭdzielnicaju i pieramožcaju konkursu «Lidary Rasiei» ad płatformy Uładzimira Pucina «Rasija — kraina mahčymaściaŭ».
«Absalutna vidavočna, što budučaje prafiesijnaje žyćcio ja źviazvaju mienavita z Rasijaj», — raspaviała Darja.
Dziakujučy konkursu jana prajšła navučańnie ŭ Rasijskaj akademii narodnaj haspadarki i dziaržaŭnaj słužby pry prezidentu Rasii pavodle prahramy «Majstar dziaržaŭnaha ŭpraŭleńnia dla kiraŭnikoŭ» dla krainaŭ SND i ciapier, padobna, skancentravanaja na Rasii.
«Kali ty doŭha pierabyvaješ za miažoju, to roźnicu pamiž našymi krainami — Rasijaj i Biełaruśsiu — užo nie adčuvaješ, heta dla ciabie našaja supolnaja prastora, «russkij mir».
Jašče zadoŭha da padziej 2014 hoda ja pačała zaŭvažać, skažam tak, niekarektnaje da jaho staŭleńnie. Heta mahli być abraźlivyja karykatury, źviazanyja z nacyjanalnymi simvałami, abo niečakanyja traktavańni historyi Druhoj suśvietnaj vajny ŭ pryvatnych hutarkach», — kaža Darja.
Darja nastolki zachoplenaja Rasijaj, što pastanaviła atrymać rasiejskaje hramadzianstva.
Adpaviedny ŭkaz 18 listapada 2022 hoda padpisaŭ Uładzimir Pucin dla čatyroch pieramožcaŭ konkursu «Lidary Rasii», u tym liku dla Darji Ryžankovaj.
Taksama jejny prajekt «Ekspat-navihatar» u miežach navučańnia na płatformie «Rasija — kraina mahčymaściaŭ» nakiravany na intehracyju zamiežnikaŭ u rasiejskaje hramadstva.
«Heta instrumient, što dazvolić dapamahčy adaptacyi zamiežnych hramadzian, jakija pracujuć na terytoryi Rasijskaj Fiederacyi, a hałoŭnaje, ichnych rodnych. <…> Misija prajektu — nie tolki stvaryć kamfortnyja ŭmovy, ale i zrabić tak, kab čałaviek viarnuŭsia na radzimu z stanoŭčymi pačućciami i ŭražańniami pra krainu», — raskazała Darja.
-
Rasijskija prapahandysty pryvieźli ŭ Biełaruś vystavu pra žančyn pucinskich «hierojaŭ»
-
«Niedzie, moža, pastaviŭ łajk nie toj». Na BT pakazali čarhovaha biełarusa, jaki pryjechaŭ na radzimu praz kamisiju pa viartańni
-
Ryžankoŭ zaprasiŭ u Biełaruś Viarchoŭnaha kamisara AAN pa pravach čałavieka. Ofis Cichanoŭskaj zaklikaje jaho jechać
Syn Piatkievič viarnuŭsia z ZŠA, zajmajecca kansultacyjami pa kryptavalucie. I zaadno padpracoŭvaje stažoram u BDU11
Kamientary