Sud u Polščy asudziŭ biełarusa na dva hady za špijanaž na karyść Rasii
30-hadovaha Uładzisłava P. prysudzili da dvuch hadoŭ turmy, piša PAP. Imavierna, hutarka idzie pra Uładzisłava Paśmiciuchu, pra zatrymańnie jakoha stała viadoma ŭ sakaviku minułaha hoda. Razam z Uładzisłavam była zatrymanaja jaho dziaŭčyna — na toj momant 18-hadovaja Maryja Miadźviedzieva.
Razam z Uładzisłavam sudzili 23-hadovaha ŭkrainca Maksima Ł. Jaho asudzili da šaści hadoŭ źniavoleńnia.
Pa viersii śledstva, abvinavačanyja ŭstalavali kamiery na čyhuncy, jakaja vykarystoŭvałasia dla pastavak humanitarnaj i vajennaj dapamohi Ukrainie. Akramia taho, jany źbirali infarmacyju ab pracy marskich partoŭ i adnaho z aeraportaŭ Polščy.
Viasnoj 2023 hoda polskija śpiecsłužby raspaviali ab zatrymańni 16 čałaviek pa spravie ab špijanažy na karyść Rasii.
Pra Uładzisłava Paśmiciuchu viadoma nie šmat. U 2012 hodzie chłopiec pastupiŭ na fakultet francuzskaj movy Minskaha dziaržaŭnaha linhvistyčnaha ŭniviersiteta.
Tam ža, ale na inšym fakultecie, vučyŭsia jaho brat-bliźniuk Vital, jaki niejki čas pracavaŭ repietytaram ispanskaj movy ŭ Rasii. Uładź niekalki hod tamu padpracoŭvaŭ na Minskim elektramiechaničnym zavodzie imia Kazłova.
Uładzisłaŭ Paśmiciucha. Fota: jaho staronka Ukantakcie
«Va Uładzia byli dobryja adnosiny ź siamjoj i bratam. Jon vielmi nadziejny i ščodry, a taksama zanadta davierlivy, jak i jaho dziaŭčyna — Maryja Miadźviedzieva.
Jany z Maryjaj chacieli žyć razam, tamu jon vyrašyŭ pierajechać u Varšavu. Uładź pakul pryhladaŭsia i šukaŭ pracu, pajechaŭ tudy z usimi svaimi źbieražeńniami i, nakolki ja viedaju, jamu taksama dapamahała siamja.
U Polščy jany chacieli abžycca. Čamu ich zatrymali i što jany zrabili, nichto nie razumieje, i heta stała vialikaj niečakanaściu dla ŭsich znajomych», — kaža siabar pary.
Maryi Miadźviedzievaj sud pryznačyŭ pakarańnie ŭ 13 miesiacaŭ — z 16 ustanoŭlenych členaŭ špijonskaj sietki Maryja atrymała samaje niaznačnaje pakarańnie.
Jak i bolšaja častka abvinavačanych, jana pryznała vinu i pahadziłasia na dobraachvotnaje adbyćcio terminu.
Čym zajmałasia špijonskaja hrupa i kolki za heta płacili
Usiaho pa spravie prachodzili 16 čałaviek, ich roli byli roznyja.
U členaŭ hrupy byŭ kuratar, ź jakim jany źviazvalisia praz telehram, vyśvietlić jaho asobu śledstvu nie ŭdałosia. U miesiendžary jon nazvaŭsia Andryjem, Andžejem, a taksama Habryelem. Dziejańniami hrupy kiravali i inšyja ludzi, jakija vykarystoŭvajuć niki Barbados, Pink, Mara, Secret Chat.
Płan-maksimum arhanizataraŭ zaklučaŭsia ŭ adpraŭcy pad adchon ciahnika z vajskovym transpartam dla Ukrainy. Za heta było prapanavana ŭznaharodžańnie ŭ 10 tysiač dalaraŭ.
Ale naohuł zadańni, jakija členy hrupy atrymlivali ad kurataraŭ, byli roznymi.
Pierš za ŭsio, heta nazirańnie za transpartnaj infrastrukturaj i vajennymi abjektami: marskimi partami, aeraportami, čyhunačnymi vakzałami i vajskovymi častkami Polščy. Pavodle źviestak polskaj prakuratury, čalcy hrupoŭki ŭstalavali na čyhunačnych šlachach nie mienš za šeść kamier videanazirańnia, a ŭ ciahnikach ustalavali GPS-pieradatčyki. Takim čynam adsočvalisia pastaŭki vajennaj i humanitarnaj dapamohi Ukrainie.
Za ŭstalavanuju kamieru vykanaŭcam płacili 300-400 dalaraŭ.
Taksama ŭdzielniki hrupy atrymlivali bolš drobnyja zadańni, źviazanyja z prapahandysckaj dziejnaściu: malavali hrafici, rasklejvali stykiery i ŭlotki z antynataŭskimi i antyŭkrainskimi łozunhami.
Za kožnuju ŭlotku vykanaŭca atrymlivaŭ piać dalaraŭ.
Taksama vykanaŭcam vydzielili hrošy na pražyvańnie ŭ haścinicach i na pajezdki pa krainie. Jak vyśvietliła prakuratura, apłata abvinavačanym vyrablałasia ŭ kryptavalucie.
Členy hrupy, jakija pahadzilisia na dobraachvotnaje adbyćcio pakarańnia, atrymali terminy ad 13 miesiacaŭ da šaści hadoŭ pazbaŭleńnia voli. Taksama sud pryznačyŭ im štrafy ad 1 tysiačy da 20 tys. złotych (250 — 5 tysiač dalaraŭ) i pastanaviŭ kanfiskavać srodki, atrymanyja ŭ vyniku złačynnaj dziejnaści.
Što prapanavać Łukašenku za palitviaźniaŭ? Sprečka Stryžaka z Chomič8
Kamientary