Centralny vakzał Hamburha pierakryvali z-za redkaha śmiarotnaha virusa, jaki zabivaje da 90% achviar
Lichamanka Marburh, uspyška jakoj dniami adbyłasia ŭ Ruandzie, mahła być adtul zaviezienaja ŭ Hiermaniju studentam-miedykam i jahonaj dziaŭčynaj, paviedamlaje vydańnie Bild. Ad virusu nie isnuje vakcyny, i zvyčajna jon zabivaje nośbitaŭ za 8-9 dzion. Situacyju prakamientavali ŭ SAAZ.
Jak paviedamlaje vydańnie Bild, siońnia dniom palicyja Hamburha na niekalki hadzin pierakryvała dva puci i prylehłyja płatformy na centralnym vakzale horada. Usiamu vinoj — padazreńnie na vielmi śmiarotnuju i nievylečnuju lichamanku Marburh u dvuch pasažyraŭ adnaho ź ciahnikoŭ, u jakich raptoŭna pačalisia adpaviednyja chvarobie simptomy.
Na miesca, akramia palicyi, taksama vyjechali mašyny chutkaj dapamohi i pažarnaj słužby, čyje supracoŭniki potym uvajšli na ačyščanyja ad ludziej płatformy i ŭ adzin ź ciahnikoŭ u poŭnych kamplektach achoŭnych kaściumaŭ. U ciahniku z patencyjnymi zaražanymi znachodziłasia kala 200 pasažyraŭ, adznačaje Bild.
«26-hadovy student-miedyk i jahonaja dziaŭčyna niadaŭna prylacieli na radzimu z Ruandy, dzie adbyłasia novaja ŭspyška redkaha i śmiarotnaha virusu Marburh. Pierad adlotam u Hiermaniju student kantaktavaŭ z adnym z ruandzijskich pacyjentaŭ, u jakoha potym vyjavili virus.
Na šlachu da Hamburha studentu i jahonaj dziaŭčynie ŭ ciahniku stała kiepska, u ich vyjavilisia simptomy, padobnyja da hrypu. Paźniej abodvuch z vakzała na śpiecyjalnaj mašynie dastavili va ŭniviersiteckuju kliniku Hamburh-Epiendorf, jakaja śpiecyjalizujecca na trapičnych chvarobach. Ich bahaž byŭ vyniaty dla ekśpiertyzy», — zajaŭlajuć miascovyja ŭłady i słužby ratavańnia.
Tym časam Ministerstva achovy zdaroŭja Ruandy paviedamiła pra 27 paćvierdžanych vypadkaŭ zaražeńnia lichamankaj Marburh i 9 śmierciaŭ ź minułaj piatnicy. Bolšaść zaražanych — miascovyja i zamiežnyja miedyki, jakija zmahalisia z uspyškaj chvaroby. Pavodle viedamstva, jak minimum 300 čałaviek ciapier źjaŭlajucca patencyjnymi nośbitami virusu i niekatoryja ź ich paśpieli źjechać z Ruandy.
Situacyju z raspaŭsiudžvańniem niebiaśpiečnaha virusu prakamientavali i ŭ Suśvietnaj arhanizacyi achovy zdaroŭja (SAAZ).
«Na siońniašni dzień nie isnuje efiektyŭnych mietadaŭ lačeńnia abo vakcyny ad lichamanki Marburh. Voś čamu ludziam, u jakich prajaŭlajucca simptomy virusu, važna zahadzia źviartacca pa dapamohu ŭ špitali dla padtrymlivalnaj terapii, jakaja moža pavialičyć šaniec vyžyvańnia pacyjenta.
SAAZ aceńvaje ryzyku hetaj uspyški jak vielmi vysokuju na nacyjanalnym uzroŭni (u miežach adnoj krainy, dzie źjaviłasia ŭspyška — «NN»). Adnak na rehijanalnym uzroŭni hetaja ryzyka aceńvajecca jak umieranaja, a na hłabalnym — jak nizkaja», — paviedamiła pres-słužba SAAZ, pieradaje vydańnie Mirror.
Lichamanka Marburh (Marburg Marburgvirus, abo MVD) upieršyniu ŭźnikła ŭ 1967 hodzie siarod rabotnikaŭ niamieckaj łabaratoryi ŭ Marburhu, fiederalnaja ziamla Hiesen. Chvaroba naležyć da taho ž siamiejstva virusaŭ, što i lichamanka Eboła, ale našmat bolš śmiarotnaja za jaje. Pa infarmacyi SAAZ, śmiarotnaść Marburha składaje ad 25 da 90%, a sam virus pačaŭ iznoŭ źjaŭlacca ŭ 2023 hodzie ŭ sielskich rajonach Ekvataryjalnaj Hviniei, a potym pierakinuŭsia ŭ bolš hustanasielenyja rajony hetaj dziaržavy i achapiŭ susiednija krainy.
Naturalnymi nośbitami ŭzbudžalnika Marburha ŭ pryrodzie źjaŭlajucca jehipieckija latučyja kryłany (kažany, jakija charčujucca sadavinoj). Zarazicca ad kažanoŭ možna pry naviedvańni nasielenych imi piačor abo pry ŭžyvańni ŭ ježu sadaviny sa śladami ich vydzialeńniaŭ.
Pamiž ludźmi pieradača virusa adbyvajecca praz pramy fizičny kantakt: praz paškodžanuju skuru ci ślizistyja abałonki. Akramia taho, padchapić virus možna pry ŭzajemadziejańni z zaražanymi pavierchniami i materyjałami, takimi jak paścielnaja bializna abo adzieńnie chvoraha čałavieka.
Inkubacyjny pieryjad lichamanki Marburh varjirujecca ad 2 da 21 dnia.
Na pieršych stadyjach zaražeńnia MVD ciažka adroźnić ad mnohich inšych trapičnych lichamankavych zachvorvańniaŭ z-za padabienstva ich kliničnych simptomaŭ. Zvyčajna jany takija: lichamanka, ciahličnyja boli, dyjareja i vanity, a pry ciažkim ciačeńni zachvorvańnia — unutranyja kryvacioki.
Akramia taho, praź niekalki dzion paśla źjaŭleńnia pieršych simptomaŭ skura chvoraha moža pakrycca vysypkaj. Na poźnich stadyjach vyjaŭlajucca žaŭtucha i pankreatyt, pacyjent imkliva hublaje vahu, u jaho raźvivajucca deliryj i inšyja niejrapsichičnyja parušeńni.
Lichamanka Marburh doŭžycca ad adnaho da troch tydniaŭ, paśla čaho albo prachodzić, albo zakančvajecca śmierciu chvoraha. Biez naležnaha dohladu i padtrymlivalnaj terapii śmierć moža nadychodzić praz vosiem-dzieviać dzion paśla źjaŭleńnia pieršych simptomaŭ.
Chto taja žančyna, jakuju Marzaluk u efiry BT abazvaŭ «švallu z Hrodna», i što jana piša ŭ čatach? Raskazvajem pra doktarku Stefanovič10
Kamientary