Цэнтральны вакзал Гамбурга перакрывалі з-за рэдкага смяротнага віруса, які забівае да 90% ахвяр
Ліхаманка Марбург, успышка якой днямі адбылася ў Руандзе, магла быць адтуль завезеная ў Германію студэнтам-медыкам і ягонай дзяўчынай, паведамляе выданне Bild. Ад вірусу не існуе вакцыны, і звычайна ён забівае носьбітаў за 8-9 дзён. Сітуацыю пракаментавалі ў СААЗ.
Як паведамляе выданне Bild, сёння днём паліцыя Гамбурга на некалькі гадзін перакрывала два пуці і прылеглыя платформы на цэнтральным вакзале горада. Усяму віной — падазрэнне на вельмі смяротную і невылечную ліхаманку Марбург у двух пасажыраў аднаго з цягнікоў, у якіх раптоўна пачаліся адпаведныя хваробе сімптомы.
На месца, акрамя паліцыі, таксама выехалі машыны хуткай дапамогі і пажарнай службы, чые супрацоўнікі потым увайшлі на ачышчаныя ад людзей платформы і ў адзін з цягнікоў у поўных камплектах ахоўных касцюмаў. У цягніку з патэнцыйнымі заражанымі знаходзілася каля 200 пасажыраў, адзначае Bild.
«26-гадовы студэнт-медык і ягоная дзяўчына нядаўна прыляцелі на радзіму з Руанды, дзе адбылася новая ўспышка рэдкага і смяротнага вірусу Марбург. Перад адлётам у Германію студэнт кантактаваў з адным з руандзійскіх пацыентаў, у якога потым выявілі вірус.
На шляху да Гамбурга студэнту і ягонай дзяўчыне ў цягніку стала кепска, у іх выявіліся сімптомы, падобныя да грыпу. Пазней абодвух з вакзала на спецыяльнай машыне даставілі ва ўніверсітэцкую клініку Гамбург-Эпендорф, якая спецыялізуецца на трапічных хваробах. Іх багаж быў выняты для экспертызы», — заяўляюць мясцовыя ўлады і службы ратавання.
Тым часам Міністэрства аховы здароўя Руанды паведаміла пра 27 пацверджаных выпадкаў заражэння ліхаманкай Марбург і 9 смерцяў з мінулай пятніцы. Большасць заражаных — мясцовыя і замежныя медыкі, якія змагаліся з успышкай хваробы. Паводле ведамства, як мінімум 300 чалавек цяпер з'яўляюцца патэнцыйнымі носьбітамі вірусу і некаторыя з іх паспелі з'ехаць з Руанды.
Сітуацыю з распаўсюджваннем небяспечнага вірусу пракаментавалі і ў Сусветнай арганізацыі аховы здароўя (СААЗ).
«На сённяшні дзень не існуе эфектыўных метадаў лячэння або вакцыны ад ліхаманкі Марбург. Вось чаму людзям, у якіх праяўляюцца сімптомы вірусу, важна загадзя звяртацца па дапамогу ў шпіталі для падтрымлівальнай тэрапіі, якая можа павялічыць шанец выжывання пацыента.
СААЗ ацэньвае рызыку гэтай успышкі як вельмі высокую на нацыянальным узроўні (у межах адной краіны, дзе з'явілася ўспышка — «НН»). Аднак на рэгіянальным узроўні гэтая рызыка ацэньваецца як умераная, а на глабальным — як нізкая», — паведаміла прэс-служба СААЗ, перадае выданне Mirror.
Ліхаманка Марбург (Marburg Marburgvirus, або MVD) упершыню ўзнікла ў 1967 годзе сярод работнікаў нямецкай лабараторыі ў Марбургу, федэральная зямля Гесэн. Хвароба належыць да таго ж сямейства вірусаў, што і ліхаманка Эбола, але нашмат больш смяротная за яе. Па інфармацыі СААЗ, смяротнасць Марбурга складае ад 25 да 90%, а сам вірус пачаў ізноў з'яўляцца ў 2023 годзе ў сельскіх раёнах Экватарыяльнай Гвінеі, а потым перакінуўся ў больш густанаселеныя раёны гэтай дзяржавы і ахапіў суседнія краіны.
Натуральнымі носьбітамі ўзбуджальніка Марбурга ў прыродзе з'яўляюцца егіпецкія лятучыя крыланы (кажаны, якія харчуюцца садавіной). Заразіцца ад кажаноў можна пры наведванні населеных імі пячор або пры ўжыванні ў ежу садавіны са слядамі іх выдзяленняў.
Паміж людзьмі перадача віруса адбываецца праз прамы фізічны кантакт: праз пашкоджаную скуру ці слізістыя абалонкі. Акрамя таго, падхапіць вірус можна пры ўзаемадзеянні з заражанымі паверхнямі і матэрыяламі, такімі як пасцельная бялізна або адзенне хворага чалавека.
Інкубацыйны перыяд ліхаманкі Марбург вар'іруецца ад 2 да 21 дня.
На першых стадыях заражэння MVD цяжка адрозніць ад многіх іншых трапічных ліхаманкавых захворванняў з-за падабенства іх клінічных сімптомаў. Звычайна яны такія: ліхаманка, цяглічныя болі, дыярэя і ваніты, а пры цяжкім цячэнні захворвання — унутраныя крывацёкі.
Акрамя таго, праз некалькі дзён пасля з'яўлення першых сімптомаў скура хворага можа пакрыцца высыпкай. На позніх стадыях выяўляюцца жаўтуха і панкрэатыт, пацыент імкліва губляе вагу, у яго развіваюцца дэлірый і іншыя нейрапсіхічныя парушэнні.
Ліхаманка Марбург доўжыцца ад аднаго да трох тыдняў, пасля чаго альбо праходзіць, альбо заканчваецца смерцю хворага. Без належнага догляду і падтрымлівальнай тэрапіі смерць можа надыходзіць праз восем-дзевяць дзён пасля з'яўлення першых сімптомаў.
ГУБАЗіК перастаў выкладаць відэа з затрыманымі. З дня, калі да гэтага заклікаў канал, блізкі да Маркава6
ГУБАЗіК перастаў выкладаць відэа з затрыманымі. З дня, калі да гэтага заклікаў канал, блізкі да Маркава
Ці здасць Трамп Украіну Расіі? Чаму дэмакраты разгромленыя? Да чаго прывядзе кантроль рэспубліканцаў над выканаўчай і заканадаўчай уладай адначасова?8282
Каментары