Bujnamaštabnaja reklamnaja akcyja z dazvołu Administracyi prezydenta
Padčas kancertu ŭ mienskim aeraporcie «The Cardigans» kryčali «Žyvie Biełaruś!»
Doŭhačakany vystup zorak maładziovaha roku – švedzkaha hurtu «The Cardigans», a razam ź imi j taki redki ŭ našych ciapierašnich realijach «Oŭpen eir festyval» prajšoŭ amal biezdakorna ŭ planie arhanizacyi. Praŭda, arhanizatary mierapryjemstva – vytvorca čypsaŭ «Estrella» – nie chavali niezadavolenaści: aficyjna było pradadziena tolki try z pałovaj tysiačy kvitkoŭ. Adnyja tolki «Kamizelki» – jak pierakładajecca z anhielskaj nazva skandynaŭskaj rok-kamandy, – u luboj eŭrapiejskaj stalicy źbirajuć utraja bolšuju aŭdytoryju. A ŭ Miensku razam ź imi vystupali «Uma2rman», «Horod 312», «J:MORS» dy jašče trojka biełaruskich hurtoŭ u dadatak. Arhanizatary ad samaha pačatku vyklučyli ŭsie mahčymaści narakańniaŭ na ich, zrabiŭšy, pa-pieršaje, nadziva bujnuju j absalutna neŭtralnuju pramocyju padziei, – dyj reklama, ułasna, była nie rok-muzyki, a čypsaŭ. Aficyjna mierapryjemstva nazyvałasia «Reklamnaja akcyja pa prasoŭvańni na rynku Biełarusi vytvorčaści handlovaje marki «Estrella». A pa-druhoje, zbajaŭšysia vypuścić na scenu choć jaki-kolviek «niepažadany» ŭ ciapierašnich umovach hurt, i vinavacić ich u hetym davoli składana: inakš «Star Show» paprostu nie adbyłosia b.
Naadvarot, vynik takoj zhodnickaj palityki navidavoku: šmathadzinny rok-kancert amal u centry horadu byŭ dazvoleny Administracyjaj prezydenta, ab čym prysutnym nieadnarazova nie zabyvalisia nahadvać. Sto kilavat huku, pra jakija z takim honaram kazali arhanizatary, admysłova byli pryviezienyja z Maskvy, razam z majstrami, jakija za hetym hukam pracavali. Nia tak daŭno hitaryst «Lapisaŭ» Rusłan Uładyka raspaviadaŭ mnie, što kali jon zachacieŭ pryvieźci z Ukrainy huk jašče bolšaj mahutnaści i zładzić niečuvanaje dahetul rok-mierapryjemstva ŭ svajoj krainie, to sutyknuŭsia ź «nieparazumieńniem» z boku ŭładaŭ i vymušany byŭ admovicca ad svaje zadumy arhanizavać najbujniejšy ŭ Biełarusi fest na adkrytym pavietry...
Pieršymi ŭ jakaści aperytyvu na scenie źjavilisia «beZ bileta», jakija čamuści sami siabie nazvali pačatkoŭcami. Tym nia mienš z paraj novych piesień publicy jaŭna spadabalisia. Trochu mienšy pośpiech mieli Valik Hryško i kamandaj «Usie» i nearamantyki z «Neo».
Potym na scenu vyjšła hrupa, jakaja stała na apošniaj «Rok Karanacyi» «Najlepšaj hrupaj hodu ŭ Biełarusi» z salistam u majcy z Če Hievaram na hrudzioch i armiejskich nahavicach koleru chaki. Darečy, vystupoŭcaŭ u vajskovych štanach było ŭ hety viečar ažno dvoje, pryčym, kali možna dapuścić, što Ŭładzimier Puhač padhledzieŭ taki element kancertovaha stroju ŭ Volskaha, to druhi Ŭładzimier – Krestoŭski, salist hurta «Uma2rman», varta pamierkavać, zapazyčyŭ styl vopratki ŭ niekaha z svaich, – naprykład, u Rastarhujeva... «Morsy» zajhrali staryja hity j dźvie novyja pieśni – «Nie umiraj» i daviedzienuju da ładu jašče adnu biełaruskamoŭnuju kampazycyju «Pavietra».
Scenaŭ było dźvie, i adrazu za biełarusami na scenie za numaram 2 źjavilisia ultrapapularnyja zaraz u Rasiei aŭtary piesień z apošnich kinahitoŭ – «Dnievnoj dozor» i «Pitier FM» – hrupa «Horod 312». Paśla adnoj ź piesień salistka kalektyvu pažartavała : «Kak chorošo, čto u vas tožie jesť muzykalnyje kanały!» ?, sumieŭšysia ŭ adkaz na niaŭchvalnuju reakcyju publiki, pakryŭdžana dadała: «Kromie svoich... Na Ukrainie, naprimier, takoho niet...» Pad «takim», vidać, mielisia na ŭvazie zališniaja prysutnaść rasiejskich vykanaŭcaŭ dy zanadta lohkaja dla ich daroha ŭ tele- i FM-prastoru.
Niedzie naprykancy setu «Horadu 312» ja zrabiŭ jašče adno nazirańnie. Raniej mnie zdavałasia, što videaamatary ŭ milicejskaj formie prysutničajuć tolki na akcyjach apazycyi dy zdymajuć vyklučna mierapryjemstvy kštałtu «Čarnobylskaha Šlachu» dy «Maršaŭ Svabody». Jakim ža było majo ździŭleńnie, kali nieznarok pieravioŭšy pozirk na pažarnuju mašynu, zaparkavanuju niepadalok ad sceny, naziraŭ nastupnuju karcinu. Spačatku nibyta j ničoha padazronaha – ažno baču: pobač z małojčykami z MNS uzhruvaściŭsia milicyjant z kameraj u rukoch! U metach harantavańnia našaje biaśpieki, kažuć.
Uvohule, praviły što da taho, jak treba pavodzicca ŭ nas u paraŭnańni z takoha kštałtu mierapryjemstvami ŭva Ŭkrainie ci ŭ Rasiei davoli žorstkija. Pra ich nieadnarazova paviedamili praz hukaŭzmacnialniki jašče pierad pačatkam kancertu. Zatoje j padpitych u paraŭnańni z tymi ž Ukrainaj dy Rasiejaj było značna mieniej. ? heta, biezumoŭna, plus. Palić nie dazvalali navat u VIP-zonie, kudy kvitki kaštavali – dla tych, viadoma, chto ich nabyvaŭ, a nie atrymlivaŭ pa znajomstvach – ni mnoha ni mała, 250 tysiač biełaruskich rubloŭ. Kali ŭsio šoŭ užo padychodziła da zakančeńnia, i ŭsie muzyki vyjšli pahladzieć na apošnich vystupoŭcaŭ – razynku viečaru stakholmski rok-hurt «The Cardigans» – u metry ad mianie da muzykantaŭ hrupy «Uma2rman» padyšoŭ supracoŭnik specnazu, i nia toje kab vielmi vietliva paprasiŭ zatušyć cyharety. Ja, kaniešnie, taksama za zdarovy ład žyćcia, ale ŭ jakim tyja byli šoku...
Druhi milicyjant, uhledzieŭšy, jak niechta z fanataŭ razharnuŭ švedzki ściah, padyšoŭ da kalehi dy padazrona kiŭnuŭ: niezarehistravanaja symbolika? Siaržant, mabyć, bolš daśviedčany ŭ hieraldycy, uśmichnuŭsia dy skazaŭ: «Nie, heta možna...» Adzin moj znajomca paśla słova «fucking» u adnoj ź piesień švedaŭ pažartavaŭ: dobra, našyja vorhany kiepska razumiejuć pa-anhielsku, a toje ŭźleźli b na scenu dy, čaho dobraha, skrucili hościkaŭ... Darečy, toje samaje vyšejzhadanaje amal što ŭžo narmatyŭnaje anhielskaje słova vyklikała najbolš žvavuju reakcyju siarod taksama zbolšaha nia vielmi anhielskamoŭnaj mienskaj publiki. Praŭda, da taho jak hrupa vyjšła na bis, – ale pra heta nižej...
U astatnim ža achoŭniki pavodzilisia davoli dobrazyčliva, navat znački «Za Svabodu!», zdajecca, ni ŭ koha nie adbirali. Niekatoryja navat spahadliva ŭśmichalisia: «Vy ž razumiejecie, usio heta časova niedazvolena... Pryjdzie čas, usio budzie dobra, tady jakija chočacie z saboj ściahi prynoście!..» Nu jak tut paśla takoha nie zrabicca zaciatym aptymistam?! A nakont niepasredna «časova niedazvolenaje» symboliki, to, ŭličvajučy dva kardony vobšuku, ryzykantaŭ nie znajšłosia. Ci to moža prosta ja nie zaŭvažyŭ...
Što da samoha vystupu lehiendy sučasnaha roku, to apisać jaho možna davoli lakanična: mocna i stylova. Adno adčuvałasia, što navat chałodnyja skandynavy nie zusim razumieli našu pryrodnuju cichmianaść dy niejkuju ŭnutranuju zaniavolenaść. Praŭdu kazaŭšy, napačatku vakalistku «The Cardigans» heta krychu biantežyła. «Minsk, vy takija cichija...», – zaŭvažyła jana. A bližej da siaredziny vystupu švedzkaja rok-kniazioŭna navat ud?ła štučnaha chrapaka: maŭlaŭ, śpicio tavaryšy... Ale na bis usio-ž taki vyjšła. ? jak! Paśla apošniaj u trek-liście hitovaj kampazycyi «Favourite Day», pad jakuju narešcie adryvałasia napoŭnicu ŭsia publika, bo jaje viedaŭ, badaj, kožny prysutny, salistka stakholmskich «Kamizelek» raźvitvałasia z udziačnymi słuchačami słovami «Good night!» i «Zhyvie Bielaru?!!!» ź niepaŭtornym anhielska-švedzkim akcentam!
Ahałomšanaja publika nia viedała, jak vykazać emocyi, i adkazała samymi hučnymi za ŭvieś viečar vopleskami j vykličnikami. A nievialičkaja hrupka maładzieńkich dziaŭčat za majoj śpinaj navat padchapili dy pačali skandavać niezaležnicki poklič. Adrazu paśla hetaha apošni na hety viečar napamin i abjaŭleńnie ab tym, što kancert adbyŭsia dziakujučy Administracyi prezydenta byli zališnimi – słuchačy, vykazaŭšy svaju dumku adnosna hetaha niaŭchvalnymi śvistami dy tupatam z padvojenaj chutkaściu zaśpiašali da vychadaŭ...
Kamientary