Žychar Babrujska prydumaŭ chitruju schiemu machlarstva i atrymaŭ 368 tysiač rubloŭ — usio dziela hulni na staŭkach
Schiema vyjaviłasia vypadkova, kali adzin ź jaho padnačalenych vyrašyŭ kupić u rasterminoŭku telefon.
Žychar Babrujska, jaki pracavaŭ hałoŭnym miechanikam na adnym z pradpryjemstvaŭ, arhanizavaŭ chitruju ašukanskuju schiemu i atrymaŭ 368 tysiač rubloŭ.
Bolš za hod — z kastryčnika 2022-ha pa śniežań 2023-ha — 34-hadovy kiraŭnik padmanvaŭ svaich padnačalenych. Tak, adnaho z rabotnikaŭ jon pierakanaŭ zaklučyć damovy na doŭhaterminovyja spažyvieckija kredyty, abiacajučy hasić zapazyčanaść pa adsotkach, paviedamlaje SK.
U inšych babrujec prasiŭ pad roznymi padstavami smartfony i tajemna afarmlaŭ anłajn-kredyty i rasterminoŭki. U trecich — braŭ hrošy ŭ doŭh pad raśpisku.
Schiema vyjaviłasia całkam vypadkova, kali adzin z rabotnikaŭ vyrašyŭ kupić u rasterminoŭku telefon. U banku jamu paviedamili, što na jaho ŭžo aformlenaja adna rasterminoŭka. Pakupnik spačatku nie zrazumieŭ, jak takoje mahčyma, a potym uspomniŭ, jak načalnik braŭ jaho mabilny.
U studzieni 2024 hoda ŭ milicyju stali źviartacca i inšyja rabotniki pradpryjemstva: im pryjšli paviedamleńni ab zapazyčanaści pa rasterminoŭkach, jakich jany asabista nie afarmlali.
Na dopytach padazravany raspavioŭ, što vialikija hrošy jamu byli patrebnyja dla vypłaty padachodnaha padatku. Miechanik aktyŭna hulaŭ na staŭkach. Šancavała niačasta, adnak usie vyjhryšy adlustroŭvalisia, pra što stała viadoma padatkovaj inśpiekcyi.
Usiaho žychar Babrujska padmanuŭ 35 čałaviek i try bankaŭskija ŭstanovy, zavałodaŭšy hrašyma na sumu 368 tysiač rubloŭ. Siłaviki vyjavili 98 faktaŭ kradziažu.
Na majomaść abvinavačanaha nakładzieny aryšt. Hrošy, atrymanyja złačynnym šlacham, fihurant traciŭ na staŭki, pahašeńnie padachodnaha padatku na prybytak i apłatu ŭziatych u bankaŭ płaciažoŭ i rasterminovak.
Zhodna z zaklučeńniem psichołaha-psichijatryčnaj ekśpiertyzy ŭ fihuranta vyjaŭlena patałahičnaja hulniamanija, adnak mužčyna moh uśviedamlać značeńnie svaich dziejańniaŭ i kiravać imi.
Mužčynu pradjaŭlena abvinavačvańnie pa dvuch artykułach: machlarstva i kradziež šlacham madyfikacyi kampjutarnaj infarmacyi ŭ asabliva bujnym pamiery.
Va Ukrainie zahinuła 24-hadovaja biełaruskaja dobraachvotnica Maryja Zajcava20
Kamientary