Były ŭdzielnik ad Biełarusi na dziciačym «Jeŭrabačańni» adkryŭ u Kanadzie tancavalnuju studyju
U 2016 hodzie Alaksandr Minionak pradstaŭlaŭ Biełaruś na dziciačym «Jeŭrabačańni», u 2022 hodzie ŭciakaŭ ad vajny va Ukrainie. A ciapier adkryŭ u Taronta tancavalna-himnastyčnuju škołu Min Art House.
Heta sumiesny prajekt Alaksandra i jahonaj žonki Maryi (jana z Ukrainy, skončyła estradna-cyrkavuju akademiju). Na zaniatki zaprašajuć jak dziaciej, tak i darosłych. Jość roznyja napramki: ad dziciačaj himnastyki i akrabatyki da chip-chopu i džaz-fanku. Siarod navučencaŭ šmat dziaciej ź Biełarusi i Ukrainy.
Paśla dziciačaha «Jeŭrabačańnia» tvorčaje žyćcio Alaksandra Minionka składvałasia davoli paśpiachova. Jon byŭ zapatrabavany i jak śpiavak, i jak viadučy, a taksama zdymaŭsia ŭ rekłamie.
U 2017 hodzie Alaksandr staŭ udzielnikam čaćviortaha siezona ŭkrainskaha teleprajekta «Hołas. Dzieci». U tym ža hodzie jon ź siamjoj pierajechaŭ u Kijeŭ, bo tam bačyŭ bolš mahčymaściaŭ dla artystyčnaj karjery.
Paźniej chłopiec napisaŭ u sacsietkach: «Kali my jechali va Ukrainu, nam raskazvali takija žachi, što tam nacysty, što, kali ty razmaŭlaješ na ruskaj, ciabie zabjuć, pasadziać i šmat čaho…» Jon pryznaŭsia, što pieršy čas krychu bajaŭsia razmaŭlać — a potym sam ździŭlaŭsia tamu, jak možna było pavieryć historyjam prapahandystaŭ na telebačańni.
23 lutaha 2022 hoda śpiavak atrymaŭ dazvoł na stałaje miesca žycharstva va Ukrainie. A ŭžo nazaŭtra pačałasia vajna. Paśla pieršaj nočy ŭ bambaschoviščy, siamja vyrašyła evakuiravacca ŭ Kijeŭskuju vobłaść, a potym źjechała z krainy.
— Maje siabry, znajomyja, blizkija nie vieryli, kazali, što my sami siabie bambim, što nas pryjšli ratavać, — pisaŭ u instahramie artyst. — Mnohija tak i nie pavieryli nam, i našy znosiny spynilisia. Maja mama nie chacieła nikudy źjazdžać, jana chacieła zastacca ŭ svaim lubimym Kijevie. Vielmi doŭha na suviaź nie vychodzili našy znajomyja i siabry, ceły miesiac my pražyli ŭ zdahadkach i nadziejach. Dziakuj Bohu, ź imi ciapier usio dobra.
Toj emacyjanalny post Alaksandr skončyŭ frazami: «Słava Ukrainie! Žyvie Biełaruś!».
Kamientary