U čas ža aryštu aktyvista najbolš urazili razmovy ź milicyjantami z roznych rajadździełaŭ. «Nastroi milicyi całkam pamianialisia».
Siabar apalnaha Sajuza palakaŭ raspavioŭ pra syna, zatrymańnie i sud.
Siońnia ranicaj 20 lutaha ŭ Hrodnie vyjšli na volu kiraŭniki apalnaha Sajuza palakaŭ Ihar Bancar, Miečysłaŭ Jaskievič i Andrej Pačobut, jakija adbyvali pakarańnie ŭ vyhladzie 5 sutak administracyjnaha aryštu za ŭdzieł u niesankcyjanavanaj akcyi. Ihar Bancar, jaki trymaŭ haładoŭku ciaham usiaho aryštu, vyjšaŭ pieršym a 6-j hadzinie. Praz hadzinu vyzvalili Andreja Pačobuta i Miečysłava Jaskieviča. Na voli ich sustrakali paplečniki.
Andrej Pačobut raskazaŭ NN pra naradžeńnie syna, akaličnaści zatrymańnia i sud. «Pra syna daviedaŭsia jašče da zatrymańnia. U «Pałoniku» patelefanavaŭ hebist i raskazaŭ pra heta. Słuchaŭku padniaŭ Bancar, ad jaho ja i daviedaŭsia». U svaim błohu Andrej paśla vyzvaleńnia napiša:
«Dumaju, što Jarasłaŭ vyraście niesłabym partyzanam :-) Tamu što KHB pačało za im sačyć, jašče da jahonaha naradžeńnia».
U sud Pačobuta advozili pradstaŭniki ci nie pałovy abłasnoj milicyi. Ranicaj 15 lutaha jaho źniali z paputki ŭ rajonie Iŭja, zajaviŭšy, što jon padobny na čałavieka ŭ vyšuku. Miascovyja milicyjanty advieźli jaho na miažu z Ščučynskim rajonam, dzie pieradali tamtejšym kaleham. Ščučynskija milicyjanty davieźli jaho da miažy z Hrodzienskim rajonam i ŭžo hrodzienskija milicyjanty pryvieźli jaho ŭ sud. «Heta pry tym, što ŭ mianie była paviestka ŭ sud na 15 hadzin i ja nikudy nie źbiraŭsia ŭciakać», – kaža Andrej Pačobut. Pa jaho słovach, mienavita razmovy ź milicyjantami z roznych rajadździełaŭ u časie taho ranišniaha etapu ź Iŭja ŭ Hrodna jaho najbolš urazili.
«Niama ŭ milicyi taho zapału, ź jakim mnohija ź ich namahalisia nas vyciać u 2005 h. Ciapier milicyjanty kažuć, što ŭsio razumiejuć, što adčuvajuć, na čyim baku praŭda, ale – u ich zahad». Pačobut kaža, što supracoŭniki milicyi ŭvieś čas skardzilisia na małyja zarobki, adabranyja lhoty, kazali pra ciakučku kadraŭ. Papularnaść Łukašenki rezka ŭpała siarod milicyi ŭ paraŭnańni z 2005 h., miarkuje Pačobut.
Sud 15 lutaha byŭ farmalnym. Pačobut nie admaŭlaŭ taho, što arhanizoŭvaŭ i prymaŭ udzieł u niesankcyjanavanaj akcyi. «Maje dovady, što ŭ siońniašniaj situacyi my nie mieli inšaha vyjścia, što za apošnija 5 hadoŭ nivodnaje mierapryjemstva nam nie dazvolili pravieści, sudździu nie zacikavili».
Nie sustreŭ prychilnikaŭ siońniašniaj ułady Andrej i ŭ IČU. Zrešty, kaža jon, ich i raniej tam było vielmi nie šmat.
Naprykancy hutarki Andrej Pačobut padziakavaŭ siabram, paplečnikam, kaleham i ŭsim nieabyjakavym ludziam za padtrymku.
Kamientary