U Minsku sud prajšoŭ na scenie

Pad staršynstvam sudździ Pieršamajskaha rajona Maksima Trusieviča adbyłosia vyjaznoje pasiadžeńnie — razhledžana kryminalnaja sprava ŭ dačynieńni 36-hadovaha minčuka, jakoha abvinavačvali ŭ atrymańni chabaru. Vyjaznoje pasiadžeńnie prajšło na scenie rajonnaj administracyi, paviedamlajuć «Minsk-Naviny».

Na pasiadžeńnie byli zaprošany pradstaŭniki dziaržaŭnych arhanizacyj Pieršamajskaha rajona. Abvinavačany siadzieŭ u pieršym šerahu.

Pa viersii śledstva, minčuk ź lutaha 2012 hoda pracavaŭ na kirujučaj pasadzie na adnym z kamunalnych pradpryjemstvaŭ stalicy i byŭ słužbovaj asobaj, jakaja vykonvała arhanizacyjna-rasparadčyja i administracyjna-haspadarčyja abaviazki. Jamu było viadoma, što pamiž jaho arhanizacyjaj i adnym z tavarystvaŭ z abmiežavanaj adkaznaściu była zaklučana damova budaŭničaha padradu, pavodle jakoha pradstaŭniki TAA vykonvali raboty na ich abjektach.

Adnojčy ŭ žniŭni 2023 hoda abvinavačany damoviŭsia z dyrektaram TAA ab atrymańni ad jaho chabaru za toje, što budzie svoječasova i bieśpieraškodna vizavać akty zdačy-pryjomki vykananych budaŭničych i mantažnych rabot na abjektach biez naležnaj pravierki abjomaŭ i jakaści ich vykanańnia, sadziejničajučy tym samym svoječasovaści raźlikaŭ.

Z kanca žniŭnia pa kastryčnik 2023 hoda jon zavizavaŭ try takija akty, jakija ŭtrymlivali niedakładnyja (zavyšanyja) źviestki pra abjomy i košt vykananych rabot, za što ŭ svaim kabiniecie atrymaŭ ad dyrektara TAA chabar 2 000 rubloŭ, śćviardžaje śledstva.

Na sudovym pasiadžeńni mužčyna pryznaŭ vinu, raskajaŭsia ŭ zroblenym, paćvierdziŭ, što, padpisvajučy dakumienty, viedaŭ, što nie ŭvieś pieralik pakazanych rabot vykanany ŭ poŭnym abjomie. Dachod, atrymany złačynnym šlacham, jon całkam dobraachvotna pieraličyŭ u dachod dziaržavy.

Pavialičyć

— Abvinavačany aficyjna pracaŭładkavany, raniej da kryminalnaj adkaznaści nie pryciahvaŭsia, — prakamientavała staršaja pamočnica prakurora Pieršamajskaha rajona Ina Zubko, jakaja vystupała pa kryminalnaj spravie dziaržaŭnym abvinavaŭcam.

U vyniku sud pakaraŭ jaho dvuma z pałovaj hadami chatniaj chimii i štrafam 500 bazavych vieličyń (20 000 rubloŭ), z pazbaŭleńniem prava zajmać pasady, źviazanyja z vykanańniem administracyjna-haspadarčych i arhanizacyjna-rasparadčych abaviazkaŭ, na piać hadoŭ.

Adnak sud prymianiŭ amnistyju, na padstavie čaho vyzvaliŭ jaho ad pakarańnia častkova terminam na hod.

• 0
• 0
• 4
• 1
• 0
• 0
• 0
• 0