Na prablemu polskaj mienšaści ŭ Biełarusi treba hladzieć šyrej, zajaviŭ kiraŭnik Jeŭraparłamienta Ježy Buzak na pres‑kanfierencyi ŭ Brusieli 23 lutaha.
Pres‑kanfierencyja adbyłasia paśla sustrečy Buzaka ź lideram ruchu «Za Svabodu» Alaksandram Milinkievičam i staršynioj nieaficyjnaha Sajuza palakaŭ na Biełarusi Anžalikaj Borys.
«My kazali pra situacyju ŭ Biełarusi, — cytujuć kiraŭnika Jeŭraparłamienta zamiežnyja infarmahienctvy. — Nacisk idzie na ŭsiu biełaruskuju apazicyju, na niezaležnyja arhanizacyi, na nacyjanalnyja mienšaści, siarod jakich polskaja mienšaść u hety čas najbolš pakryŭdžanaja, i treba zrabić usio, kab abaranić jaje pravy».
Pavodle słoŭ Buzaka, «dla Polščy, biezumoŭna, najbolš značnym źjaŭlajecca polskaja mienšaść u Biełarusi».
«Ale kali my chočam vyrašyć hetuju prablemu, to pavinny pastavić jaje šyrej,
— padkreśliŭ jon. — Treba kazać pra pahrozy dla demakratyi, dla demakratyčnych svabod, dla ŭsich niezaležnych arhanizacyj. U Biełarusi znoŭ zapoŭnieny turmy, i nie tolki pradstaŭnikami polskaj mienšaści, časova aryštavanymi, ale i prosta dziejačami biełaruskaj apazicyi».
Ježy Buzak paviedamiŭ, što rezalucyja pa Biełarusi budzie pryniata Jeŭraparłamientam paśla bolš hłybokaha aznajamleńnia ź situacyjaj. Jon spadziajecca, što delehacyja Jeŭraparłamienta, jakaja prybudzie ŭ Minsk 25 lutaha, daść abjektyŭnuju acenku padziejam u krainie.
Pieršapačatkova rezalucyju pa Biełarusi Jeŭraparłamient płanavaŭ pryniać 25 lutaha. Adnak, pavodle infarmacyi Polskaha radyjo, hrupa parłamientaryjaŭ, sacyjalisty i kamunisty, vystupili suprać, zajaviŭšy, što spačatku naležyć pačakać vynikaŭ vizitu delehacyi Jeŭraparłamienta ŭ Biełaruś.
Jak paviedamili ŭ pres‑słužbie parłamienta ES, čakajecca, što rezalucyja pa Biełarusi
budzie razhledžana ŭ miežach plenarnaj siesii 8—11 sakavika ŭ Strasburhu.
Ciapier čytajuć
Hieroja telefonnych źlivaŭ pałkoŭnika Kisiala, jaki zaklikaŭ kalečyć demanstrantaŭ, raptoŭna apuścili na rajonny ŭzrovień12
Kamientary