«Ja chaču pazbavicca ŭsich klijentaŭ z noŭtbukami!»: uładalnik staličnaj kaviarni padzialiŭsia bolem
Hradus nianaviści pamiž amatarami pracavać u kaviarniach i ich uładalnikami praciahvaje pavyšacca. U heta raz kanflikt adbyŭsia ŭ adnoj z kaviarań u staličnaj Hrušaŭcy.
Pra niepryjemnuju situacyju raspavioŭ Mikita Nieścieraŭ, uładalnik kaviarni Varka na praśpiekcie Dziaržynskaha. Mužčyna pryznaŭsia, što ŭpieršyniu mocna razzłavaŭsia. A nahodaj dla hetaha stała naviedvalnica z noŭtbukam. Mikita zrabiŭ joj zaŭvahu i adznačyŭ, što ŭ jaho kaviarni dazvalajecca karystacca łeptopami tolki ŭ adnym miescy (za centralnym stałom) — heta navat paznačana na nalepkach na stałach.
— Na što jana mnie adkazvaje: «Ja viedaju, što da vas nielha z noŭtbukami». Ale jana pryncypova pryjšła z noŭtbukam, bo joj padabajecca ŭ nas. Padabałasia, ja spadziajusia.
Mikita kaža, što doŭha spračaŭsia z naviedvalnicaj, sprabavaŭ rastłumačyć praviły kaviarni. Ale adznačyŭ, što ludzi z noŭtbukami «ź niejkaj inšaj płaniety».
— Prosta: «Mnie ŭsie pavinny. I vy taksama pavinny. I plavać ja chacieła na barystu, na vas i na inšych haściej, jakija chočuć pasiadzieć». Dajšło da taho, što jana prosta kaža: «Voś vy ciapier zhubili klijenta». Ja kažu: «Dyk ja i chaču zhubić usich klijentaŭ z noŭtbukami!».
Ale ž klijentka nie supakoiłasia i paprasiła razietku.
— Ja kažu: moža vam stančyć jašče? Voś tak i skazaŭ. Na padvyšanych tanach. Tam jašče ludzi siadzieli navokał. Prosta ŭžo bambić.
Hetaje videa ŭ YouTube-šortsach nabrała kala 650 tysiač prahladaŭ i 145 tysiač u instahramie. U kamientaryjach Mikita rastłumačyŭ, čamu suprać noŭtbukaŭ u kaviarni. Hałoŭnaja pryčyna ŭ tym, što da taho, jak u ich źjaviłasia zabarona, ludzi z noŭtbukami zapałanili kaviarniu:
— Piać ź siami stolikaŭ byli zaniatyja ludźmi z noŭtami. I 80% ź ich voźmuć adnu kavu ci vadu i siadziać pa 5-7 hadzin. Niechta navat pracavaŭ pa zumie i vioŭ strymy.
Praz heta ŭ niejki momant stałyja naviedvalniki kaviarni pačali skardzicca i pisać niehatyŭnyja vodhuki — i Mikita vyrašyŭ, što treba niešta źmianić.
Darečy, u Minsku ŭžo niekalki kafe, jakija całkam abvieščany laptop-free-miescam. Naprykład, piakarnia LJoN sioleta ŭ sakaviku paviedamiła, što dla «padtrymańnia siabroŭskaj atmaśfiery» zabaraniaje naviedvalnikam karystacca noŭtbukami i płanšetami. Tady navina sabrała šmat niehatyŭnych kamientaryjaŭ u instahramie piakarni. Ale, mabyć, ekśpierymient atrymaŭsia ŭsio ž paśpiachovym, bo zabarona praciahvaje dziejničać.
Jašče raniej — u 2023 hodzie — modnaje bistro Mon Nom (jaho nazyvajuć «Z rusałkami») paznačyła ŭ svaich sacsietkach, što stanovicca laptop-free. Padkreślivałasia, što kamanda kafe choča, kab naviedvalniki atrymlivali asałodu ad ježy i kamunikacyi, a nie pracavali.
Kaviarnia-ekakrama Tiden, mabyć, była pieršym laptop-free miescam u Minsku, bo ŭviała taki farmat ažno ŭ 2021 hodzie. Ale tam zabarona na łeptopy dziejničała vyklučna ŭ vychodnyja dni, u budni da amataraŭ pracavać z kubačkam kavy stavilisia łajalna.
«Anłajnier» raniej cikaviŭsia ŭ jurystki Taćciany Ravinskaj, nakolki lehalna zabarona na karystańnie niejkimi hadžetami ŭ kafe.
— Kafe maje prava samastojna vyznačać umovy absłuhoŭvańnia naviedvalnikaŭ. Jak praviła, takija ŭmovy zamacoŭvajucca ŭ łakalnych pravavych aktach i dastupnyja haściam na infarmacyjnym stendzie abo pry dapamozie roznaha rodu tabličak u pamiaškańni, na sajcie ŭstanovy abo ŭ sacsietcy. Takim čynam, zabarona na vykarystańnie noŭtbuka ŭ kafe abo abmiežavańnie času znachodžańnia ź im — heta samastojnaje rašeńnie ŭstanovy, jakomu naviedvalnik pavinien padparadkavacca.
Ale jość cikavy niuans. Prymušać klijenta zrabić zakaz rabotniki nie majuć prava. To-bok tearetyčna naviedvalnik moža pryjści ŭ luby zručny dla jaho čas (z ulikam režymu pracy kafe) i prosta siadzieć, vyvučajučy mieniu ažno da začynieńnia.
Kamientary