Biełarusaŭ prymušajuć padpisvacca nie tolki za Łukašenku, ale i jaho sparynh-partnioraŭ na vybarach
Mnohich biełarusaŭ prymušajuć stavić podpisy «dobraachvotna-prymusova» za alternatyŭnych kandydataŭ, paviedamlaje «Lusterka».
Žančyna, jakaja pracuje ŭ adnym z pryvatnych pradpryjemstvaŭ Viciebska, raskazała vydańniu, što mnohija ź jaje kaleh bajacca pakidać aŭtohraf za «kankurentaŭ» Łukašenki.
«Nas sabraŭ kiraŭnik i skazaŭ pa čarzie pryjści z pašpartam u jaho kabiniet. Jon nijak nie pałochaŭ, nie ŭhavorvaŭ, prosta skazaŭ, što treba, i ŭsio. Prapanoŭvaŭ pakinuć podpisy za dvuch pretendentaŭ: Łukašenku i taho, jaki idzie ad Kamunistyčnaj partyi (Siarhieja Syrankova. — Zaŭv.).
Mnohija kalehi całkam dobraachvotna raśpisvalisia za pieršaha, ale za kamunista — nie. Usie bajacca mahčymych zvalnieńniaŭ, jak heta było paśla minułych vybaraŭ, kali padpisanty za inšych palitykaŭ padpadali pad represii».
Z prymusovym zboram podpisaŭ za jašče adnu «alternatyŭnuju» pretendentku Volhu Čamadanavu (jašče da vychadu z honki) sutyknułasia inšaja surazmoŭca vydańnia, jakaja pracuje ŭ adnym ź dziciačych sadkoŭ Homiela.
«Jak nam skazali, usich kiraŭnikoŭ ustanoŭ adukacyi abaviazvajuć źbirać podpisy. Našamu dyrektaru dastałasia Čamadanava, kiraŭnictvu adnoj z susiednich škoł — Łukašenka».
Zbor podpisaŭ za vyłučeńnie Volhi Čamadanavaj prachodziŭ «u dobraachvotna-prymusovaj maniery».
«Nas usich sabrali byccam by na naradu, dzie pierakanaŭča prasili pastavić podpis za Čamadanavu, ale pry hetym skazali, što prymusić nas nie mohuć, — tłumačyć surazmoŭca. —
Ale na spravie atrymałasia tak, što tych, chto podpis nie pastaviŭ, vyklikali ŭ kabiniet. I nastojliva prasili heta zrabić, arhumientujučy tym, što my pracujem u dziaržstruktury i atrymlivajem zarobak, žyviem pad mirnym niebam i hetak dalej. Kazali, što kali my nie stavim podpis, to nie chočam pracavać, nie pavažajem kiraŭnika i vielmi mocna jaho padstaŭlajem.
Jašče kazali, što kali nam niešta nie padabajecca, to my možam źjazdžać u Polšču. Byli kryki i emocyi, zahadny ton. U mnohich našych supracoŭnikaŭ dzieci paśla 2020 hoda źjechali ŭ Amieryku i Polšču. Ale navat im ničoha nie ŭdałosia zrabić, pryjšłosia padpisvacca».
Raniej «Naša Niva» pisała, jak u abaviazkovym paradku źbirajuć podpisy za Łukašenku. Tych, chto admaŭlajecca, zanosiać u čornyja śpisy.
Kamientary