U kramy zavoziać śviežuju čyrvonuju ikru — niekatoryja ceny šakujuć

«Siońnia na kasie nie mahła pavieryć, što addaju 60 rubloŭ čysta na buterbrody, a heta ž nie miasa», — napisała čytačka «Anłajniera». Adkul takija ceny? 

Pavialičyć

Pa nazirańniach čytački, ciapier ikry «tańniej za 25 rubloŭ za słoik nie znajści». A taja, što pryhažejšaja, — pa 40, 50 rubloŭ i bolš za słoičak.

Žurnalisty prajšlisia pa kramach, kab pahladzieć asartymient.

Za 311 rubloŭ, naprykład, pradajuć amal paŭkiłahrama ikry.

U kancy minułaha hoda «Anłajnier» fiksavaŭ ikranyja ceny: nižniaja płanka dla naturalnaha praduktu była ad 150 rubloŭ za kiłahram. Heta značyć, što maleńki słoičak vahoj 95-105 hramaŭ možna było kupić niedzie za 15 rubloŭ. Heta minimum, ikry pa 40-50 rubloŭ za słoičak taksama chapała.

Ciapier takich cen žurnalisty nie znajšli.

Pavialičyć

Pa źviestkach Biełstata, z pačatku hoda ceny na ikru vyraśli na 32%.

Na Kamaroŭcy taksama paćviardžajuć, što ceny padraśli. Samuju tannuju ikru tam pradajuć pa 25 rubloŭ za 100 hramaŭ.

Što zdaryłasia?

Kali koratka: pryčyny źniešnija. Košt ikry zaležyć ad abjomaŭ vyłaŭlenaj ryby, a ŭ hetym hodzie ŭ Rasii jany mienšyja, čym zvyčajna.

Pad nizkim vyłavam majuć na ŭvazie 250-260 tys. ton, prytym što ŭ minułym hodzie vyłaŭ byŭ na ŭzroŭni 600 tys. ton. Rasijskija ŚMI pišuć, što vyłaŭ hetaha hoda moža stać najhoršym za 20 hadoŭ, a akramia ikry, moža padaražeć i čyrvonaja ryba. Z-za rostu cen u kastryčniku na 25% u Rasii abmiarkoŭvali abmiežavańnie ekspartu ikry, ale pakul nijakich rašeńniaŭ nie pryniata. Cieniavoha bana taksama niama, ni ŭ kramach, ni na Kamaroŭcy na pieraboi z pastaŭkami nie skardzilisia.

Pavialičyć

U Biełaruś pryjazdžaje jakraz rasijskaja ikra — prynamsi ciapier nazirajecca takaja karcina, inšaha impartu ŭ kramach žurnalisty nie znajšli.

U niacotnyja hady vyłaŭ zvyčajna vysoki, a ŭ cotnyja — nizki, ale popyt na ikru nie padaŭ, tamu ceny i pajšli ŭvierch. U minułym hodzie ŭ Rasii ikry było, naadvarot, bolš, čym zvyčajna, tamu ceny navat źnizilisia.

Što skaža ikrany biznes?

Udzielniki rynka paćvierdzili Onlíner, što ceny na ikru padraśli, i źviazana heta z tym, što pryjechała ikra ŭžo 2024 hoda, heta značyć z novaha vyłavu, jaki mienšy za papiaredni.

— Usio dakładna, sioleta my adznačajem značny rost cen na čyrvonuju ikru. Dzieści na rynku jašče jość ikra «staroha vyłavu» — 2023 hoda, na jaje moža być vyhadnaja cana, ale bolšaść hulcoŭ na rynku ŭžo vykarystoŭvajuć ikru 2024 hoda vyłavu, jakaja značna padrasła ŭ košcie, — raspaviali ŭ John Dory.

Zdabyča łasosievych ryb dla vytvorčaści ikry idzie, jak praviła, z červienia pa vierasień, u hetym ža hodzie «rybałka» skončyłasia ŭžo ŭ žniŭni.

— Taksama našy pastaŭščyki z RF adznačajuć, što hety siezon u paraŭnańni ź siezonam-2023 byŭ nie lepšym i ryby vyłaviłasia značna mienš, čym čakałasia, a vydatki vytvorcy panieśli z zadziełam na vialiki vyłaŭ. Tym nie mienš adznačym, što ŭłoŭ-2024 prykładna supastaŭny pa abjomie z 2022 hodam, a ŭ 2023-m nazirałasia prykładna dvuchrazovaje pavieličeńnie abjomu spažyvańnia čyrvonaj ikry ŭ RF.

— Rost cen — heta ahulnasuśvietnaja tendencyja. Košt zakupki syraviny, heta značyć ikry, vyras u siarednim u dva razy, — raspavioŭ inšy ŭdzielnik rynku.

Što ŭsio ž taki čakać pierad Novym hodam? U sietcy John Dory dajuć prahnoz, što navahodnija śviaty nijak nie paŭpłyvajuć na ceny. «Bolš za toje, my budziem imknucca da źnižeńnia cen», — paabiacali ŭ kampanii.

Jašče adzin pastaŭščyk zaŭvažyŭ, što ŭ śniežni minułaha hoda ikra, naadvarot, patańnieła, ale nichto hetaha nie zaŭvažyŭ (pavodle źviestak Biełstata, za hod ceny źnizilisia na 4,5%). Jon padzialiŭsia mierkavańniem, što asnoŭny rost cen užo zdaryŭsia ŭ kastryčniku — pačatku listapada, kali pryjechała ikra śviežaha vyłavu.

«Cana sfarmavałasia, pra nizki vyłaŭ usio zrazumieła, i rynak užo adreahavaŭ tymi ceńnikami, jakija vy bačycie. Vielmi małaimavierna, što budzie jašče adno pavyšeńnie, kab treba było biehčy ŭ kramy ciapier», — skazaŭ udzielnik rynku.

• 0
• 0
• 4
• 0
• 0
• 0
• 0
• 0