24 listapada ŭ Vierchniadźvinskim rajonie Viciebskaj vobłaści ptuškary Maćviej Ichnienka i Dźmitryj Čudzinaŭ zaŭvažyli savu-biarozaŭku, paviedamlaje telehram-kanał «Dzikaja pryroda pobač».
U Biełarusi sava-biarozaŭka — vielmi redkaja hościa. Jana hniazdujecca ŭ taježnaj zonie Jeŭropy i Azii. Zvyčajna zimuje ŭ miežach hniezdavoha areała, ale byvaje, kačuje na poŭdzień. U nas jaje rehistravali ŭsiaho kala dziasiatka razoŭ. Dźvie apošnija rehistracyi byli ŭ 2022 hodzie.
Pra sustreču z ptuškaj raskazvaje Dźmitryj Čudzinaŭ: «My ź siabram haścili na siadzibie «Zaimka Lesuna». Hałoŭnaj metaj našaha padarožža byli kasmatanohi syč i žoŭtahałovy dziacieł, ale ŭdača abychodziła nas bokam.
«Kab nie marnavać čas, vyrašyli pakatacca pa navakolli. Bližej da kanca pajezdki my zaŭvažyli drapiežnuju ptušku, jakaja siadzieła na drevie pasiarod pola. My nie mahli tołkam razhladzieć ptušku ŭ binokl, hałavy nie było vidać, i my mierkavali, što heta šulak-karaholčyk (jastrieb-pieriepielatnik), chacia vyhladaŭ jon dziŭnavata.
Zrabili niekalki zdymkaŭ — i sumnievy ŭ tym, što heta šulak-karaholčyk poŭnaściu źnikli. Vyrašyli prahnać fota praź niejrasietku. Vynik ašałamiŭ — sava-biarozaŭka! Arnitołahi Natalla Karlionava i Dźmitryj Šamovič paćvierdzili, što heta jana.
Dalej było ŭsieahulnaje tryumfavańnie, škvał paviedamleńniaŭ z prośbami vydać kaardynaty znachodki, uśviedamleńnie taho, što my stali častkaj nievialikaj hrupy ščaśliŭčykaŭ, jakija sustreli hetuju redkuju hościu».
Sava-biarozaŭka pamieram krychu bolšaja za hołuba. Ruskaja nazva (jastriebinaja sova) źviazanaja z tym, što hetaja sava nahadvaje šulaka-karaholčyka (jastrieba-pieriepielatnika) afarboŭkaj nizu cieła, kryłaŭ i chvasta. U palocie sava-biarozaŭka taksama padobnaja da šulaka: paśla sieryi ŭzmachaŭ jana płanuje na raspaściortych kryłach. Aproč hetaha, jana časta siadzić na viaršyni dreva ci inšaj prysady, nachiliŭšysia napierad, jak šulak, a nie siadzić u typovaj savinaj pozie «słupam».
Kamientary
Eto pośledstvija "taježnoho sojuza"