Biełarusam stanie składaniej jechać na zarobki ŭ Litvu. Tam źmianilisia praviły padačy na DNŽ
Z 1 śniežnia źmianilisia ŭmovy dla padačy zajavy na atrymańnie litoŭskaha DNŽ praź źniešnich pastaŭščykoŭ pasłuh. Heta zakranie i biełarusaŭ.
Było składana, a stała jašče składaniej
Niahledziačy na toje, što ŭ samoj Biełarusi nielha zrabić litoŭski DNŽ praź źniešniaha pastaŭščyka pasłuh (VFS Global), hramadzianie Biełarusi mieli mahčymaść padavacca ŭ inšych krainach. Naprykład, Hruzii, Kazachstanie ci Kyrhyzstanie.
Ale z 1 śniežnia praviły źmianilisia. Ciapier źviartacca ŭ VFS Global pa litoŭski DNŽ zmohuć tolki hramadzianie krainy, u jakoj znachodzicca adździaleńnie źniešniaha pastaŭščyka pasłuh.
Hramadzianie trecich krain, dzie niama adździaleńnia źniešniaha pastaŭščyka pasłuh, zmohuć padavać prašeńnie na atrymańnie časovaha DNŽ u Litvie tolki ŭ niekatorych vypadkach:
- kali jany płanujuć pryjechać u Litvu na padstavie ŭźjadnańnia siamji;
- jany jeduć u Litvu pracavać jak vysokakvalifikavanyja śpiecyjalisty (Blue Card);
- zaprašajucca dla navučańnia ŭ navukovych i adukacyjnych ustanovach Litvy.
Jak i dzie biełarusu atrymać DNŽ Litvy?
Za vyklučeńniem vyšej akreślenych vypadkaŭ, hramadzianie Biełarusi mohuć padavać zajavu na atrymańnie DNŽ tolki na terytoryi samoj Litvy.
Nahadajem, z 1 lipienia, za niekatorymi vyklučeńniami, inšaziemcy mohuć pracaŭładkavacca ŭ Litvie tolki paśla atrymańnia časovaha DNŽ.
Da 1 lipienia 2024 hoda inšaziemcy z trecich krain mahli pačać pracavać bieź litoŭskaha DNŽ. Dla hetaha dastatkova było mieć vizu abo DNŽ inšaj krainy ES, jakija dazvalali lehalna znachodzicca ŭ krainie. Prystupiŭšy adrazu da pracy, zamiežnik paralelna padavaŭsia na atrymańnie DNŽ na padstavie pracy.
Kamientary