Jak siryjskija paŭstancy stali dziejsnaj armijaj i jak jany pastavili na patok vyrab dronaŭ
Siryjskija paŭstancy paśpiachova nastupajuć, za tydzień zaniali piatuju častku krainy. Heta ŭžo nie chaŭrus pa intaresach, heta dyscyplinavanaja siła z vytvorčaściu ŭdarnych bieśpiłotnikaŭ, ad jakich vojski Asada raźbiahajucca jak zajcy. Drony i vyrašyli los Alepa i Chamy.
Jak piša Finacial Times, piać hadoŭ tamu siryjskaja isłamisckaja hrupoŭka «Chajat Tachryr aš-Šam» (CHTŠ) znachodziłasia ŭ krytyčnym stanoviščy, sprabujučy vyžyć pad udarami režymu Asada, jaki padtrymlivajecca Rasijaj.
Siońnia ŭ svaim apornym rehijonie, pravincyi Idlib, CHTŠ moža pachvalicca najaŭnaściu vajskovaj akademii, centralizavanaha kamandavańnia, mabilnych śpiecyjalizavanych padraździaleńniaŭ (takich jak piachota, artyleryja, siły śpiecapieracyj, tanki, drony i snajpiery), a taksama ŭłasnaj industryjaj pa vytvorčaści ŭzbrajeńnia.
«Za apošnija čatyry-piać hadoŭ jana faktyčna transfarmavałasia ŭ raźvituju protamilitarnuju arhanizacyju», — cytuje vydańnie słovy Aarona Zielin (Aaron Zelin), ekśpierta pa CHTŠ z analityčnaha centra Washington Institute.
Źmiena stratehii
Jak piša FT, pieryjad adnosnaj stabilnaści, jaki nastaŭ paśla zaklučeńnia ŭ 2020 hodzie pieramirja, CHTŠ vykarystała dla pieraasensavańnia svajoj stratehii i vajskovaj daktryny.
Jak raskazaŭ vydańniu ekśpiert pa CHTŠ z analityčnaha centra Crisis Group Daren Chalifa (Dareen Khalifa), u pravincyi Idlib, jakaja faktyčna znachodzicca pad kantrolem paŭstancaŭ, CHTŠ pieršapačatkova ŭ niejkaj stupieni sprabavała kapiravać strukturu siryjskaj armii a taksama hramadzianskija instytuty dziaržavy. Zatym hrupoŭka zrazumieła, što hety padychod maje abapiracca na istotnyja resursy i vialikija hrupy navabrancaŭ, jakich u ich niama.
U vyniku, jak dadaje ekśpiert pa džychadu z Crisis Group Džerom Drevan (Jerome Drevon), «jany čerpali natchnieńnie z zachodnich vajennych daktryn». Spasyłajučysia na słovy lidara CHTŠ, ekśpiert raskazaŭ, što hrupoŭka ŭ pieršuju čarhu stała aryjentavacca na brytanskija ŭzbrojenyja siły, jakija bolš kampaktnyja i manieŭranyja.
Pavodle mierkavańnia ekśpiertaŭ, CHTŠ ciapier maje kala 30 tysiač bajcoŭ, siarod jakich 15 tysiač — rehularnyja vajskovyja padraździaleńni samoj hrupiroŭki, a druhaja pałova — reziervisty i mužčyny ź inšych uzbrojenych apazicyjnych hrup, jakija ŭvachodziać u aljans.
Jak adznačajuć ekśpierty, CHTŠ zdoleła pašyryć svaje ŭpłyŭ i kolkaść, pryciahvajučy bajcoŭ inšych paŭstanckich hrupovak krainy, inšaziemcaŭ i džychadystaŭ — vieteranaŭ inšych kanfliktaŭ pa ŭsim rehijonie, a taksama mienš radykalna nastrojenych u ideałahičnym płanie bajcoŭ.
Takaja raznastajnaść adyhrała klučavuju rolu ŭ adnaŭleńni i roście CHTŠ. A paśpiachovaje nastupleńnie na poŭnač Siryi moža pryciahnuć novych udzielnikaŭ, što ŭmacuje siły paŭstancaŭ.
Dla prafiesijnaj padrychtoŭki svaich bajcoŭ i ŭmacavańnia vajskovaj dyscypliny dva z pałovaj hoda tamu CHTŠ stvaryła svaju vajskovuju akademiju, u jakoj pobač z zamiežnymi śpiecyjalistami stali vykładać kala 30 byłych aficeraŭ siryjskaj armii, jakija pierajšli na bok paŭstancaŭ.
Paŭstancy źmianili i svajo staŭleńnie da miascovaha nasielnictva. Zachoŭvajučy aŭtarytarnyja tendencyi, CHTŠ ciapier imkniecca publična demanstravać talerantnaść da relihijnych mienšaściaŭ. Tak, paśla zachopu Alepa byli zroblenyja pakazalnyja žesty dobraj voli adnosna chryścijan.
Stratehičny prajekt pa vytvorčaści dronaŭ
Jak adznačaje Aaron Zielin, hrupoŭka nie maje značnych prablem u nabyćci asnoŭnych vidaŭ uzbrajeńnia, adnak ułasnaja vytvorčaść zbroi, asabliva bieśpiłotnikaŭ i rakiet, dazvoliła CHTŠ stvaryć novyja pahrozy dla režymu, u jakoha adsutničajuć značnyja srodki supraćdziejańnia dronam.
Jak raskazaŭ u intervju vydańniu The Media Line adzin z palavych kamandziraŭ, źviazanych z CHTŠ, hrupoŭka zapuściła stratehičny prajekt, stvaryŭšy padraździaleńnie Shahin, jakoje śpiecyjalizujecca na raspracoŭcy i vytvorčaści sučasnych dronaŭ i zbroi. Padraździaleńnie padparadkoŭvajecca niepasredna kiraŭniku TCHŠ Abu Muchamiedu al-Džułani, jaki asabista kantraluje ŭsie vajskovyja apieracyi.
Pa słovach Aarona Zielina, u svajoj mini-dziaržavie z nasielnictvam ad 3 da 4 miljonaŭ čałaviek, u nievialikich majsterniach u damach, haražach ci pieraabstalavanych składach paŭstancy naładzili vytvorčaść dronaŭ. Detali, jakich nielha znajści, jany vyrablajuć z dapamohaj 3D-pryntaraŭ.
This is how Syrian rebels train for FPV drone strikes. pic.twitter.com/P3s5lQ8b9W
Siryjskija paŭstancy vučacca kiravać dronami
I heta, jak adznačajuć ekśpierty, zvyčajnaja praktyka dla sučasnych uzbrojenych kanfliktaŭ. Bolšaść nieabchodnych viedaŭ pa vytvorčaści bieśpiłotnikaŭ možna atrymać z anłajn-resursaŭ.
Vykarystańnie dronaŭ
Vykarystańnie siryjskimi paŭstancami bieśpiłotnikaŭ adsočvaje daśledčyk kanfliktaŭ z Karaleŭskaha kaledža Łondana Broderyk Makdonald (Broderick McDonald). Jon zaŭvažaje, što raniej CHTŠ prymianiała małyja drony, jakija mahli atakavać broniemašyny i skidać hranaty.
Padčas ciapierašniaha nastupu stali vykarystoŭvaccai drony miascovaj vytvorčaści, jakija zabiaśpiečanyja rakietami, a taksama bolš bujnyja bieśpiłotniki z pavialičanaj dalokaściu i hruzapadymalnaściu.
Aaron Zielin adznačaje, što paŭstancy vykarystoŭvajuć drony dla raźviedki i naniasieńnia ŭdaraŭ pa pazicyjach režymu pierad tym, jak nakiravać u boj žyvuju siłu.
Syria: Footage of the rebels' UAV unit (Al-Shaheen Brigades): attacking Syrian regime targets in Idlib with suicide UAVs. pic.twitter.com/5R0lmBcg1U
Videa ataki dronam pazicyj siryjskich uradavych vojskaŭ
Pa słovach Zielina, hety kanflikt admietny i tym, što ŭpieršyniu ŭ historyi niedziaržaŭnych hrupovak paŭstancy vykarystali drony dla skidańnia ŭlotak z zaklikam da nasielnictva pierajści na ich bok.
Pra rolu ŭ kanflikcie bieśpiłotnikaŭ piša i aŭtar telehram-kanała «Rybaŕ». Jon adznačaje, što vykarystańnie paŭstancami dronaŭ pryviało da taho, što papiarednija taktyčnyja pryjomy ŭradavych vojskaŭ pierastali pracavać. Paŭstancy pierad atakaju «pačynajuć bić pa siryjcach z pavietra, aktyŭna pieraśledujučy padraździaleńni, jakija adychodziać z pazicyj».
Pa słovach «Rybaria», vykarystańnie paŭstancami dronaŭ mocna bje pa maralnym duchu bajcoŭ padraździaleńniaŭ uradavaj Siryjskaj arabskaj armii (SAA)
«U SAA niaredka ŭvohule nie ŭjaŭlajuć, što takoje bieśpiłotniki i jakimi mahčymaściami jany vałodajuć. Tamu, kali ŭ hłybokim tyle dron skidvaje VOH [hranata, jakaja zvyčajna vykarystoŭvajecca ŭ hranatamiotach], to siryjcy dumajuć, što praciŭnik užo padyšoŭ na dystancyju abstrełu AHS [aŭtamatyčnym hranatamiotam], tamu kidajuć navat addalenyja ad ŁBS [linii bajavoha sudakranańnia] pazicyi».
U vyniku, jak tłumačyć «Rybaŕ», «stvarajecca chaos i vializnyja dzirki ŭ abaronie, u jakija paŭstancy mohuć z chodu «zalacieć» na pikapach, pryčym z zadziejničańniem kudy mienšaj kolkaści sił, čym dla hetaha raniej patrabavałasia».
Inšyja vidy zbroi
Jak piša FT, paŭstancy taksama inviestavali ŭ vytvorčaść dalnabojnych rakiet, reaktyŭnych i minamiotnych snaradaŭ. Padčas svajho nastupu jany prademanstravali novuju sistemu kiravanych rakiet, pra jakuju mała što viadoma. Adzin z ekśpiertaŭ — Čarlz Lister (Charles Lister) ź Instytuta Blizkaha Uschodu, apisaŭ jaje jak «masiŭnuju rakietu ź vializnym bojeprypasam śpieradu». Miarkujecca, što rakieta budzie nazyvacca Qaysar.
Pa słovach Listera, vykarystańnie kiravanych rakiet, jakija byli zapuščanyja na adlehłaść dziasiatkaŭ kiłamietraŭ pierad nastupam, pazbaviła CHTŠ nieabchodnaści vykarystoŭvać zaminiravanyja hruzaviki-śmiarotniki, jak heta było jašče piać hadoŭ tamu.
Akramia zbroi ŭłasnaj vytvorčaści, arsienał paŭstancaŭ papaŭniajecca za košt pastavak z Turcyi, a taksama handlu zbrojaj i bojeprypasami pamiž siłami Asada i CHTŠ, jaki, jak adznačajuć ekśpierty, u apošnija hady nabyŭ istotnyja maštaby.
Paśpiachovy nastup prynios paŭstancam šmat trafiejnaj zbroi i vajskovaj techniki. Pa słovach Broderyka Makdonalda, heta nie tolki tanki i bronietransparciory, ale i sistemy supraćpavietranaj abarony, siarod jakich zienitny kompleks «Pancyr». Akramia hetaha, u ich rukach apynulisia niekalki lohkich šturmavych samalotaŭ. Ciapier paŭstancy sprabujuć vyśvietlić, jak hetym usim karystacca.
«Kali atrymajecca pryvieści zachoplenyja sistemy supraćpavietranaj abarony ŭ bajavuju hatoŭnaść, heta istotna źmienšyć adnu z hałoŭnych prablem, ź jakimi CHTŠ i inšyja paŭstanckija hrupoŭki zaŭsiody sutykalisia, — adsutnaść abarony ad rasijskich avijaŭdaraŭ», — zaŭvažaje ekśpiert.
Jak bačna, CHTŠ prajšła vialiki šlach udaskanaleńnia za piać hadoŭ. Ciapier zastajecca pačakać i pahladzieć, nakolki daloka jon zaviadzie paŭstancaŭ u kanflikcie z režymam Asada.
Chto pavinien być prezidentam Biełarusi ŭ pierachodny pieryjad? Razvažajuć viadomyja biełarusy12
Kamientary
toje samaje i ŭ Ḿjanmie adbyvajecca
.
• NAŠA ZALEPA •
🥀 Zatoje ŭ Biełarusi paŭstancy pajšli na pavadku Koleśnikovoj i ŭsiej tej antybiełaruskamoŭnaj zhrai. I hena zhraja, mo', navat pa zamovie, źmizarniła (čytyj, źniščyła!) ahulnanarodny pratest da mienavita śviatočnaha badziańnia natoŭpami pa vułkach, dareńnia kvietačak amałpaŭcam i pakazvańnia sardečak. Tamu hańba p..j babarykánskaj apazycyi j jejnym padbrechišam kštałtu pryhretym tutaka Botam❗
.