«Treba kuplać łatarejny bilet». Stvaralnik kampanii Flo padzialiŭsia sakretam pośpiechu
«U našu ideju nichto nie vieryŭ. Navat naniać supracoŭnikaŭ było vielmi składana», — havoryć Dźmitryj Hurski. Siońnia biznes aceńvajecca ŭ $1 młrd, a jaho mabilnym dadatkam aktyŭna karystajecca 68 młn čałaviek.
Dźmitryj Hurski naradziŭsia ŭ Biełarusi. U dziacinstvie z baćkami sadziŭ bulbu. Ciapier jahony biznes aceńvajecca ŭ $1 młrd.
Pieršuju vyšejšuju adukacyju Hurski atrymaŭ u Biełaruskim dziaržaŭnym univiersitecie ŭ 2005 hodzie i staŭ bakałaŭram farmaceŭtyki i raspracoŭki lekaŭ.
Praz vosiem hadoŭ jon advučyŭsia na MVA ŭ polskim Univiersitecie Kaźminskaha. U 2019-m staŭ udzielnikam Stanford Executive Program — adnoj z najprestyžniejšych prahram pavyšeńnia kvalifikacyi dla biznes-kiraŭnikoŭ.
Pra svoj šlach da pośpiechu i žyćciovuju fiłasofiju Dźmitryj raskazaŭ u intervju jutub-kanału Slush.
Jak naradziłasia ideja Flo?
U 2015 hodzie Dźmitryj staŭ suzasnavalnikam Flo Health, mabilnaha dadatku dla žanočaha zdaroŭja, jaki ŭ vyniku staŭ lidaram femtech-industryi (haliny technałohij, aryjentavanych na žanočaje zdaroŭje).
Niahledziačy na tahačasny skieptycyzm vakoł femtech, Dźmitryj kiravaŭsia misijaj vyrašać prablemy žanočaha zdaroŭja z dapamohaj technałohij. Jon vyrašyŭ stvaryć kompleksnuju płatformu, jakaja vyjšła b za ramki bazavaha adsočvańnia mienstruacyi i prapanavała ŭsiebakovuju infarmacyju pra zdaroŭje.
«Ideja była ŭ tym, kab vykarystoŭvać manitorynh [mienstrualnaha] cykłu dla ŭtrymańnia i ŭzajemadziejańnia, a taksama dadać bolš daskanałyja funkcyi — simptom-čekiery, čat-boty, režymy ciažarnaści i sprobaŭ začaćcia. Heta dazvoliła stvaryć vialikuju płatformu, supierdadatak na asnovie trekiera cykłu», — kaža biznesmien.
Ad socień admoŭ da miljardnaha pośpiechu
Napačatku byŭ skiepsis. Asabliva ciažka było pierakanać prahramistaŭ. «Uschodniejeŭrapiejskija inžyniery viadomyja svajoj pramaliniejnaściu. Pierakanać ich było vielmi składana», — uzhadvaje Dźmitryj.
Adsutnaść precedentaŭ u femtech-industryi taksama ŭskładniała pošuk inviestaraŭ.
«My sustrelisia z sotniami inviestaraŭ i atrymali sotni admoŭ. Vam prosta treba być vielmi nastojlivym, kab dasiahnuć pastaŭlenaj mety», — kaža jon.
Upartaść apraŭdała siabie. Flo Health staŭ pieršym jeŭrapiejskim «fiemtechnałahičnym adnaroham». Kampaniju aceńvajuć bolš čym u 1 miljard dołaraŭ, a dadatak maje kala 70 miljonaŭ aktyŭnych karystalnikaŭ štomiesiac.
Hety pośpiech staŭ aryjenciram dla budučych startapaŭ u śfiery femtech i natchniŭ mnohija śmiełyja idei.
«Ja liču, što rola takich kampanij, jak Flo, nie tolki ŭ stvareńni praduktaŭ, ale i ŭ źmienie naratyvaŭ», — dadaje Dźmitryj.
Biznes-fiłasofija i parady pačatkoŭcam
Dla Dźmitryja niaŭdačy — nieadjemnaja častka pradprymalnickaha šlachu. Kožny pravał daje ŭroki i zahartoŭvaje.
«My dvojčy paciarpieli niaŭdaču, ale navučylisia na hetych pamyłkach. I treci raz akazaŭsia paśpiachovym», — adznačaje jon.
Jašče adzin važny aśpiekt, na jaki źviartaje ŭvahu Dźmitryj: pa miery rostu biznesu ŭzrastaje jaho składanaść. Lohka stracić toje, što jon nazyvaje «fokus» — zasiarodžanaść na hałoŭnaj mecie i stratehii.
«Ja nie čakaŭ, što hałoŭnaj prablemaj bujnoj arhanizacyi budzie fokus. Zasiarodzić takuju strukturu na peŭnaj mecie sapraŭdy składana».
Važnuju rolu ŭ biznes-fiłasofii Dźmitryja adyhryvaje misija. Kampanii pavinny imknucca zrazumieć patreby svaich karystalnikaŭ i znachodzić rašeńni, jakija palapšajuć ich žyćcio. Heta dapamahaje budavać tryvałaje ŭzajemadziejańnie pamiž kampanijaj i klijentami.
Svaju rolu CEO Dźmitryj apisvaje jak častku vialikaj sistemy.
«Mnie nie padabajecca ideja, što treba chvalić CEO. Heta prosta praca i heta prosta funkcyja. Było b niapravilna skazać, što Flo — heta ja».
Abapirajučysia na svoj dośvied, Dźmitryj raić biznes-pačatkoŭcam:
«Treba kuplać łatarejny bilet. Časta ludzi tolki marać pra niešta, ale nikoli nie robiać pieršy krok».
Havorka idzie, kaniečnie ž, pra łatareju ŭ pieranosnym sensie. U biznesie dziejańnie bolš kaštoŭnaje, čym vahańni.
«Adziny supolny nazoŭnik ludziej, jakija dasiahnuli pośpiechu, — usie jany sprabavali. Vy taksama pavinny pasprabavać, moža, niekalki razoŭ, piać ci navat siem. Ale ŭrešcie pośpiech pryjdzie», — padkreślivaje Dźmitryj.
Ciapier čytajuć
HUBAZiK vykłaŭ dyskredytujučaje fota zatrymanaha, jaki «prapahandavaŭ nacyzm». Ale na zdymku skandalny Z-błohier2
Kamientary