Palityku, deputatu apazicyi BNF u Viarchoŭnym Saviecie 1990—1995 hadoŭ było 87 hadoŭ.
«17 śniežnia nie stała Mikałaja Kiryłaviča Kryžanoŭskaha — deputata niezaležnaści, mocnaha biełarusa, ščyra addanaha Baćkaŭščynie — Biełarusi», — napisaŭ u svaim fejbuku Zianon Paźniak.
Mikałaj Kryžanoŭski naradziŭsia 1 studzienia 1937 hoda ŭ Babrujsku. Skončyŭ Paŭnočna-Zachodni politechničny instytut u horadzie Leninhradzie. Byŭ čalcom kamisii Viarchoŭnaha Savieta pa pytańniach raźvićcia pramysłovaści, enierhietyki, transpartu, suviazi i infarmatyki, členam časovaj kamisii pa pryvilejach. Čalcom Kanstytucyjnaj kamisii, čalcom cieniavoha kabinieta (urada) Apazicyi BNF u Viarchoŭnym Saviecie, uvachodziŭ u kamitet pa baraćbie z karupcyjaj.
Udzielničaŭ u raspracoŭcy i pryniaćci Dekłaracyi ab dziaržaŭnym suvierenitecie Biełarusi, padrychtoŭcy zakonaprajektaŭ da niečarhovaj siesii Viarchoŭnaha Savieta 24-25 žniŭnia 1991 hoda, na jakoj była abvieščana niezaležnaść Biełarusi.
Saaŭtar kancepcyi pierachodu Biełaruskaj SSR na rynačnuju ekanomiku (vosień 1990 hoda), asnoŭnych nakirunkaŭ reformaŭ dla vychadu z kryzisu — pieradvybarčaja ekanamičnaja płatforma BNF «Adradžeńnie» (viasna 1995 hoda), saaŭtar šerahu zakonaprajektaŭ.
Udzielnik haładoŭki 11—12 krasavika 1995 hoda ŭ Avalnaj zali, abvieščanaj u znak pratestu suprać inicyjavanaha Łukašenkam refierendumu.
«Mnie paščaśliviłasia spatykać u žyćci šmat česnych, razumnych, sumlennych i spraviadlivych ludziej u vyšejšym sensie hetych słoŭ. Mikałaj Kiryłavič byŭ adnym ź ich. Najvydatniejšy čałaviek», — napisaŭ Zianon Paźniak.
Kamientary