«Biełavija» 28 sakavika piarojdzie na letni raskład palotaŭ

Nacyjanalnaja avijakampanija «Biełavija» z 28 sakavika pačnie vykanańnie palotaŭ pa letnim raskładzie.

Raskład budzie dziejničać da 30 kastryčnika. «Jarkaj asablivaściu hetaha siezonu stanuć novyja prapanovy pa napramkach i aptymalnyja stykoŭki z mahčymaściu roznych kambinacyj palotaŭ pry ŭdziele našych partnioraŭ — hałoŭnych jeŭrapiejskich avijakampanij», — raskazali ŭ «Biełavii». Buduć vykarystoŭvacca jak ułasnyja rejsy «Biełavii», tak i rejsy partnioraŭ pa ŭsioj sietcy maršrutaŭ.

U novy letni siezon prapanujucca i novyja pryvabnyja taryfy, u pryvatnaści košt pieralotu Minsk — Sočy — Minsk, ekvivalentny koštu padarožža naziemnym transpartam, a taryf pa maršrucie Minsk — Kalininhrad — Minsk składaje ŭsiaho 70 jeŭra, i pry hetym niama nieabchodnaści afarmleńnia tranzitnaj vizy. Akramia taho, naviedać Jurmału možna i na samalocie, dalacieŭšy da Ryhi pa taryfie ad 78 jeŭra.

Pradaŭžajučy pašyrać hieahrafiju palotaŭ, «Biełavija» adkryvaje novy prosty rejs Minsk — Jekaciarynburh. Pačynajučy z 31 maja paloty pa hetym maršrucie buduć vykonvacca ŭ paniadziełki i čaćviarhi na kamfartabielnym Boinhu-737/500 z absłuhoŭvańniem u biznes- i ekanom-kłasach. Dziakujučy zručnamu raskładu palotaŭ mahčymaje padarožža rejsami «Biełavii» tranzitam praź Minsk ź Jekaciaryburha ŭ Jeŭropu i nazad.

Na papularnym napramku ŭ Maskvu budzie pavialičanaja častata palotaŭ: da piaci štodzionnych rejsaŭ u Šaramiecievie i Damadziedavie z 15 krasavika dadasca jašče adzin — u aeraport Unukava.

U letnija miesiacy «Biełavija» taksama pačnie vykanańnie rejsaŭ, jakija złučajuć harady Kazachstana (Astana, Paŭładar, Kastanaj) z haradami Jeŭropy. «Rejsy z Kazachstana prybyvajuć u Minsk ranicaj, što daje mahčymaść pradoŭžyć palot u jeŭrapiejskija aeraporty (Varšava, Hanovier, Bierlin, Frankfurt, Mančester, Miłan, Praha, Rym)», — adznačyli ŭ avijakampanii.

Pavialičycca častata palotaŭ u Baku, Łarnaku, Bierlin, Paryž, Rym i Miłan. Tradycyjna ŭ letni siezon samaloty «Biełavii» buduć lotać i ŭ Sočy (u paniadziełki, sierady i suboty). Paloty ŭ Sočy buduć vykonvacca na kamfartabielnym Boinhu-737/500, što daść mahčymaść jašče bolšaj kolkaści pasažyraŭ dobra pravieści svoj adpačynak pa vyhadnym košcie pieralotu.

Nacyjanalnaja avijakampanija «Biełavija» źjaŭlajecca lideram biełaruskaha rynku avijapieravozak. Jaje rehularnaja maršrutnaja sietka naličvaje 32 punkty ŭ 20 krainach śvietu.

• 0
• 0
• 0
• 0
• 0
• 0
• 0
• 0