U Nacyjanalnym mastackim muziei pakazvajuć artefakty z archieałahičnych raskopak u Minsku i Vaŭkavysku
Vystava «Mastactva ŭ archieałohii», što pracuje ŭ Nacyjanalnym mastackim muziei, pakazvaje archieałahičnyja artefakty z muziejnaj kalekcyi i vyklikaje cikavaść hledačoŭ nie tolki admietnym ekspanavańniem, ale i tym, što pradmiety, pradstaŭlenyja na vystavie, možna znajści jak u padručnikach historyi, tak i ŭ knihach pa biełaruskim mastactvie, piša Reform.news.
Nasamreč muziej asobnaj kalekcyi archieałohii nie maje. Adnak jon zachoŭvaje kala 200 abjektaŭ, znojdzienych padčas archieałahičnych raskopak. Jany raźmieščanyja ŭ adździele «Biełaruskaje dekaratyŭna-prykładnoje mastactva».
U asnoŭnym heta rečy, jakija byli znojdzienyja ŭ siaredzinie minułaha stahodździa na raskopkach u Minsku i Vaŭkavysku, ale taksama i adnosna niadaŭnija archieałahičnyja pradmiety.
Na vystavu kuratar i viadučy navukovy supracoŭnik adździeła staražytnabiełaruskaha mastactva Dźmitryj Monič adabraŭ pradmiety, jakija majuć mastackuju kaštoŭnaść. Heta amal pałova ŭsioj kalekcyi muzieja — kala 90 ekspanataŭ.
Unikalnyja artefakty majuć nievialiki pamier, tamu dla ich ekspanavańnia byli padrychtavanyja vitryny z padśvietkaj, abstalavanyja pavieličalnym škłom roznych dyjamietraŭ.
Centralnym ekspanatam vystavy źjaŭlajecca nievialikaja kamiennaja plitka z reljefnaj zaamorfnaj vyjavaj. Jana maje daskanałuju mastackuju apracoŭku, tamu vyjava była źmieščanaja na afišu.
Da najbolš kaštoŭnych i staražytnych pomnikaŭ archieałohii ŭ kalekcyi muzieja adnosiacca artefakty, vyjaŭlenyja ŭ 1950-ja hady pry raskopkach u Minsku pad kiraŭnictvam Eduarda Zaharulskaha i Vasila Tarasienki.
Naprykład, na Minskim zamčyščy byli znojdzienyja nievialikija abrazki — z vyjavaj Božaj Maci i Śviatoha Piatra, a taksama abrazok z vyjavaj Śviatoha Mikałaja i Śviatoha Stefana.
Taksama na vystavie možna ŭbačyć kamiennyja abrazki XIII stahodździa, kaścianyja šachmatnyja fihury XIII stahodździa, znojdzienyja padčas raskopak «Šviedskaj hary» ŭ Vaŭkavysku ŭ 1954 hodzie, dvuchbakovy samšytavy hrebień z vyjavaj hryfonaŭ XIII stahodździa.
Muziej maje namier papaŭniać kalekcyju archieałahičnych pradmietaŭ znachodkami ź mietału, dreva, kamienia, jakija majuć mastackija vartaści.
Vystava budzie pracavać da 6 krasavika.
Kamientary