Rasiejski hienij matematyki nie viedaje, ci treba jamu miljon

Rasiejec jakomu była prysudžanaja premija ŭ adzin miljon dalaraŭ za rašeńnie adnoj z najskładaniejšych matematyčnych zadač, zaŭčora zajaviŭ, što nia choča brać hetyja hrošy.

44-hadovy doktar Ryhor Pierelman, samy razumny, jak šmat chto ličyć, čałaviek u śviecie, žyvie ŭ Sankt-Pieciarburhu ŭ pustoj kvatery, poŭnaj prusakoŭ. Z-za začyniennych dźviarej jon skazaŭ: «U mianie jość usio, što mnie treba».

Hetaja premija była prysudžanaja amierykanskim Instytutam matematyki Kłeja za rašeńnie hipotezy Puankare, nad jakoj cełaje stahodździe bilisia matematyki ŭsiaho śvietu. Doktar Pierelman raźmiaściŭ svajo rašeńnie hipotezy ŭ interniecie.

Čatyry hady tamu Mižnarodny matematyčny sajuz prysudziŭ jamu prestyžny miedal Fiłdsa. Na cyrymoniju ŭručeńnia ŭ Madryd Pierelman nie pajechaŭ:

— Hrošy i słava mianie nie cikaviać. Ja nie chaču, kab mianie vystaŭlali na ŭsieahulny ahlad, jak žyviołu ŭ zaaparku, — zajaviŭ jon.

— Ja nie hieroj matematyki. Ja taksama nie taki ŭžo paśpiachovy, tamu ja nie chaču, kab na mianie ŭsie taropilisia.

Jahonaja susiedka Viera Piatroŭna raskazvaje:

— Ja adzin raz była ŭ hetaj kvatery, i ja była ŭ šoku. U jaho tam tolki stoł, zedlik i łožak z brudnym matracam, jaki zastaŭsia jamu ad papiarednich uładalnikaŭ — ałkaholikaŭ, jakija pradali jamu hetuju kvateru.

— My sprabujem u našym domie pazbycca prusakoŭ, ale jany chavajucca ŭ jahonaj kvatery.

U 2003 hodzie Pierelman, jaki pracavaŭ tady navukovym supracoŭnikam Matematyčnaha instytuta imia Ściakłova ŭ Sankt-Pieciarburhu, pačaŭ vykładać materyjały ŭ sieciva, ćvierdziačy pry hetym, što jamu ŭdałosia rašyć hipotezu Puankre — adnu ź siami hałoŭnych matematyčnych zadač, za rašeńnie kožnaj ź jakich Instytut matematyki Kłeja prapanuje ŭznaharodu ŭ miiljon dalaraŭ.

Pilnaje vyvučeńnie materyjałaŭ pakazała, što Pierelman mieŭ racyju.

Sutnaść hetaj typałahičnaj zahadki palahaje ŭ tym, što lubaja trochmiernaja prastora bieź dzirak ekvivalentnaja raciahnutaj śfiery.

Hetaj zahadcy było ŭžo sto hadoŭ, kali Pierelman jaje rašyŭ i hetym dapamoh vyznačyć formu śvietabudovy.

Paśla 2003 hoda Pierelman syšoŭ z Matematyčnaha instytuta. Siabry kazali, što jon uvohule kinuŭ zajmacca matematykaj, pišuć Inosmi.ru.

Tym časam na hrošy Pierelmana adrazu znajšlisia łasyja.

A kamunisty Pieciarburščyny paprasili pieradać hrošy «prodažnoho mira čistohana» na maŭzalej i navukahrad:

«Hrošy treba abaviazkova ŭziać, Ryhor Jakaŭlevič, i jak maha chutčej! Lepš z pracentami. Bo ŭvieś hety čas imi karystalisia chitryja i niačystyja na ruku zachodnija matematyki. Pryčym uziać treba nie tolki hetuju premiju, a ŭvohule ŭsio, što vy raniej, saromiejučysia, nie chacieli brać. Razumiejučy, što Vam hrošy nie treba, Kamunisty Pieciarburha hatovyja prapanavać svaju dapamohu ŭ ich vykarystańni, u asvajeńni srodkaŭ pad Vašym kantrolem».

Ale tut, tak niedarečy, vyviłasia, što Pierelman zavahaŭsia:

— Ja jašče nie pryniaŭ nijakaha rašeńnia, — skazaŭ jon pa telefonie life.ru. — Kali niešta vyrašu, pieršym pra heta daviedajecca instytut Kłeja, jaki j zasnavaŭ premiju. Ale pakul ničoha nie vyrašana».

Hladzi jašče:
Samy razumny čałaviek u śviecie kałupajecca ŭ rocie ŭ mietro

• 0
• 0
• 0
• 0
• 0
• 0
• 0
• 0