Haradskija ŭłady patłumačyli, čamu prybrali «razumny» prypynak na Niamizie
«Razumnaha» prypynku na Niamizie bolš niama — paviljon demantavali. Onliner.by daviedaŭsia, što źjavicca na jaho miescy i čamu haradskija słužby vyrašyli admovicca ad kaliści inavacyjnaha prajekta.
Adkazy na hetyja pytańni žurnalisty atrymali ad pradstaŭnika kamunalnaha ŭnitarnaha pradpryjemstva «Minski haradski centr nieruchomaści» (MHCN).
— Prypynačny paviljon byŭ ustanoŭleny pryvatnaj kampanijaj pavodle dahavora arendy adkrytaj placoŭki. Prajekt pad nazvaj «Razumny prypynak» startavaŭ u 2019 hodzie jak piłotny: ideja zaklučałasia ŭ tym, kab abjadnać u adnym abjekcie funkcyi čakańnia transpartu, ličbavaj navihacyi, haradskoj infarmacyi i servisaŭ.
Pieršapačatkova paviljon sapraŭdy pryciahvaŭ uvahu — ź interaktyŭnymi ekranami, zaradkami dla telefonaŭ, videakamierami, knopkaj vykliku ekstrannych słužbaŭ, a taksama sistemaj, jakaja sihnalizavała kiroŭcam pra prysutnaść ludziej ź invalidnaściu.
Adnak ź ciaham času bolšaja častka hetych funkcyj pierastała pracavać. Pavodle słoŭ pradstaŭnika MHCN, sensarnyja paneli nie funkcyjanavali, asobnyja knopki vykliku nie reahavali, častka zaradnych partoŭ była niepracoŭnaj, a ahlad z prypynku abmiažoŭvała rekłama na šklanych ścienkach.
— U 2024 hodzie haradskija słužby pačali nakiroŭvać na adras arandatara aficyjnyja pretenzii ab vykanańni dahavora arendy ŭ častcy pracy ŭsich zajaŭlenych u dahavory funkcyj. Častku zaŭvah pradprymalniki sprabavali ŭličyć, ale klučavyja elemienty, adzin ź jakich — praca infarmacyjnaha sensarnaha ekrana, tak i nie byli adnoŭleny.
Paśla niekalkich paviedamleńniaŭ i niepryniaćcia mier z boku arandatara MHCN skasavała dahavor u adnabakovym paradku i ŭ kancy 2024 hoda źviarnułasia ŭ sud ab prymušeńni arandatara vyzvalić učastak. Sud pryniaŭ rašeńnie na karyść MHCN, i ŭ kancy krasavika 2025 hoda arandatar pačaŭ demantaž abjekta.
Što źjavicca na hetym miescy?
Pustym skryžavańnie na Niamizie nie zastaniecca. Užo raspačaty raboty pa padrychtoŭcy novaha prypynačnaha paviljona. Jak udakładniŭ surazmoŭca, havorka idzie nie pra «razumny» prypynak, a pra typavy sučasny paviljon, jaki adpaviadaje zaćvierdžanym u horadzie patrabavańniam da prypynačnych punktaŭ.
— Kanstrukcyja budzie vykanana sa škła i mietału, jak i novyja sučasnyja prypynki. Čakajecca, što novy paviljon budzie ŭstanoŭleny da majskich śviataŭ.
Dla amataraŭ kavy taksama znajšłosia vyjście — napoj možna nabyć u kijosku «Biełsajuzdruku».
Ciapier čytajuć
Łukašenka raskazaŭ pra zabojstva apazicyjaniera, jakoje nibyta adbyłosia try dni tamu9
Kamientary