Viačorka: Kali sapraŭdy buduć vyzvalenyja 1300—1400 čałaviek, heta budzie vialikaja pieramoha dla Biełaha doma, Trampa i svabodnaj Biełarusi
Toje, što Donald Tramp «padymaje staŭki, kaža pra palitviaźniaŭ, patrabuje ich vyzvaleńnia», jość vialikim dasiahnieńniem «usich nas z vami», zajaviŭ «Pozirku» hałoŭny daradca biełaruskaha demakratyčnaha lidara Śviatłany Cichanoŭskaj Franak Viačorka, kamientujučy apošnija vykazvańni prezidenta ZŠA.
«Viadoma, kali sapraŭdy buduć vyzvalenyja 1300—1400 čałaviek, heta budzie jaho vialikaja dypłamatyčnaja pieramoha. I dla Biełaha doma, i dla Trampa, i dla svabodnaj Biełarusi. Tamu ŭ našych intaresach, kab hetaja cikavaść da Biełarusi i tema palitviaźniaŭ byli na płavu», — skazaŭ surazmoŭca.
Pavodle jaho słoŭ, biełaruskija demakratyčnyja siły «praktyčna kožny tydzień, kožny dzień» znachodziacca na suviazi z pradstaŭnikami amierykanskaj administracyi — dzielacca svaim bačańniem situacyi, pieradajuć śpisy ludziej, asudžanych pavodle palityčnych artykułaŭ («i pavodle Dissidentby, i pavodle «Viasny»).
Ciapier, pavodle słoŭ Viačorki, staić pytańnie, «jak davieści spravu da kanca, jak zmusić Łukašenku vyzvalać» palitviaźniaŭ, «ci chopić hetaj cikavaści i palityčnaj voli ŭ Vašynhtona». «Nam treba jaje (palityčnuju volu) maksimalna padtrymlivać, karystacca hetym aknom mahčymaściaŭ, jakoje adčyniłasia. I, viadoma, my nastojvajem na tym, kab ludzi, kali ich vypuskajuć, mieli mahčymaść vybrać — źjechać ci zastacca», — dadaŭ jon.
5 vieraśnia Tramp čarhovy raz zhadaŭ pra Biełaruś, niadaŭniaje vyzvaleńnie hrupy palitviaźniaŭ. «Ale ŭ jaho (Łukašenki) 1400 ci 1500 [zakładnikaŭ], ci niejkaja vialikaja kolkaść, i my razmaŭlajem pra toje, kab ich vyzvalić. Niekatoryja, ja miarkuju, palityčnyja. Mnohija ź ich palityčnyja. Padobna, što ich źbirajucca vyzvalić u niejki momant u davoli blizkaj budučyni», — padkreśliŭ prezident ZŠA.
Kamientary
Dzie "Nu-nu", "Najpierš nie hałasi!", "Łapidaryi ŭsich krain - jadnajciesia!" i
"Vyradki, my nie zatkniemsia nikoli"?