Ofis Cichanoŭskaj: Padtrymlivajem pryncypovuju pazicyju Litvy ŭ adnosinach da režymu Łukašenki
«Litva prademanstravała vyklučnuju paśladoŭnaść i mužnaść — jakaści, jakija vyznačajuć jaje źniešniuju palityku», — skazaŭ dypłamatyčny daradca Śviatłany Cichanoŭskaj Dzianis Kučynski.
Ofis Śviatłany Cichanoŭskaj zajaviŭ pra poŭnuju padtrymku Litvy «za ćviorduju, paśladoŭnuju i pryncypovuju pazicyju ŭ adnosinach da režymu Alaksandra Łukašenki». Hetuju pazicyju partału LRT.lt pieradaŭ dypłamatyčny daradca Dzianis Kučynski.
«Litva prademanstravała vyklučnuju paśladoŭnaść i mužnaść — jakaści, jakija vyznačajuć jaje źniešniuju palityku. My chvalim Litvu za rašučaje supraćstajańnie novym hibrydnym pravakacyjam z boku Minska. Niadaŭnija incydenty z pavietranymi šarami, što parušyli pavietranuju prastoru Litvy, nie byli vypadkovymi. Heta častka bolš šyrokaj madeli skaardynavanych hibrydnych dziejańniaŭ režymu Łukašenki — paśla papiarednich pravakacyj ź mihrantami, dronami i kantrabandaj. Hetymi dziejańniami imknucca padarvać biaśpieku Litvy i ES, a taksama pratestavać reakcyju Jeŭropy», — havorycca ŭ zajavie Ofisa.
U joj adznačajecca, što «za hetyja pravakacyi i ŭźnikłaje z‑za ich napružańnie na miažy adkazny vyklučna režym Łukašenki, a nie Litva, jakaja maje poŭnaje prava abaraniać svaje miežy, suvierenitet i hramadzian».
«Eskałujučy napružanaść i zatrymlivajučy hruzy na miažy, režym praciahvaje svaju zvyčajnuju palityku šantažu. Heta pradumanyja kroki, nakiravanyja na destabilizacyju Litvy i ES.
Tryvały i pryncypovy adkaz Litvy pasyłaje jasny sihnał: takoje pavodziny nie budzie ciarpimy. Pasprabavańni ŭmiracić dyktatara nikoli nie davali vyniku — tolki paśladoŭnaść i adzinstva mohuć spynić jaho ahresiju», — śćviardžaje Ofis Cichanoŭskaj.
Pa słovach Ofisa, niadaŭna apublikavanaja zajava Jeŭrapiejskaha sajuza, u jakoj asudžajecca hibrydnaja dziejnaść Łukašenki, pakazvaje, što Jeŭropa adzinaja. «My ličym, što abmiežavańnie abo zabarona tranzitu tavaraŭ ź Biełarusi — heta mocny instrumient, jaki skaračaje mahčymaści režymu finansavać represii i vajnu.
U toj ža čas my pryznajem humanitarnuju važnaść znosinaŭ pamiž ludźmi. Zvyčajnyja biełarusy nie pavinny stanavicca zakładnikami palityki Łukašenki. Navat kali ES abaraniaje svaje miežy i biaśpieku, žyćciova važna zachoŭvać kanały suviazi biełarusaŭ sa svabodnym śvietam — mabilnaść ludziej, adukacyjnyja, kulturnyja i humanitarnyja kantakty, jakija padtrymlivajuć nadzieju ŭ Biełarusi i spryjajuć demakratyčnym pieramienam», — havorycca ŭ zajavie.
U joj taksama padkreślivajecca, što lidarstva i rašučaść Litvy słužać prykładam dla ŭsich demakratyj, jakija abaraniajuć svoj suvierenitet i kaštoŭnaści.
«Śviatłana Cichanoŭskaja padtrymlivaje kantakty ź jeŭrapiejskimi i mižnarodnymi partniorami, kab abmierkavać skaardynavanyja dziejańni, nakiravanyja na ŭzmacnieńnie cisku na režym i praduchileńnie dalejšych pravakacyj.
My zaklikajem ES, ZŠA i demakratyčnych sajuźnikaŭ padtrymlivać Litvu i ŭvodzić dadatkovyja abmiežavalnyja miery suprać režymu Łukašenki — nie tolki za hetyja apošnija hibrydnyja ataki, ale i za jaho teror suprać biełarusaŭ i stvoranuju pahrozu biaśpiecy rehijonu. Bo pakul isnuje režym Łukašenki, pahroza Litvie, rehijonu i Jeŭropie budzie zachoŭvacca», — śćviardžaje Ofis Cichanoŭskaj.
Ciapier čytajuć
Raptoŭna pamior Uładzimir Usier — niemałady aktyvist, jaki ŭlapaŭsia ŭ film BT i špijanaž u Polščy26
Kamientary