Vydvaranaha ź Biełarusi žurnalista Viačasłava Łazarava zaprašajuć stać na ŭlik u milicyi
Pozva pryjšła na chatni adras viciebskaha videaapieratara Viačasłava Łazarava, vyzvalenaha z kałonii 11 vieraśnia i nieadkładna vydvaranaha ŭ Litvu. Paviedamlajecca, što 28 kastryčnika da 10.00 jon musiŭ pryjści ŭ kryminalna-vykanaŭčuju inśpiekcyju RAUS Kastryčnickaha rajona Viciebska, kab stać na ŭlik, paviedamlaje Biełaruskaja asacyjacyja žurnalistaŭ.
«U vypadku niajaŭki biez uvažlivaj pryčyny Vas pryviaduć prymusova», — paznačana ŭ dakumiencie.
U inśpiekcyju Viačasłaŭ Łazaraŭ nie zmoh by trapić navat pry žadańni: sioleta 11 vieraśnia jaho prymusova vyvieźli ŭ susiedniuju Litvu razam z 51 inšym viaźniem, vyzvalenym u miežach pieramoŭ urada ZŠA z režymam Łukašenki.
Žurnalista vyzvalili z mahiloŭskaj papraŭčaj kałonii № 15, dzie jon adbyvaŭ termin źniavoleńnia, prysudžany jamu za supracoŭnictva z telekanałam «Biełsat».
«Z taho samaha dnia ja znachodžusia ŭ Vilni, nie majučy nijakaha paćviardžeńnia svajho aficyjnaha statusu. Nikomu z prymusova vyviezienych ź Biełarusi byłych viaźniaŭ nie dali dakumientaŭ pra toje, na jakich padstavach my vyzvalenyja», — kaža Viačasłaŭ Łazaraŭ.
Pravaabaronca Pavieł Levinaŭ skantaktavaŭsia sa staršym lejtenantam Trafimam Ušakovym, da jakoha pavinien byŭ javicca Łazaraŭ u kryminalna-vykanaŭčaju inśpiekcyju. Milicyjanier patłumačyŭ, što Łazaraŭ vyzvaleny pa pamiłavańni ad 11 vieraśnia 2025 hoda i musiŭ viarnucca na miesca rehistracyi ŭ Viciebsku. Pra toje, što žurnalist apynuŭsia ŭ Litvie, supracoŭnik milicyi navat nie viedaŭ.
Pavieł Levinaŭ udakładniŭ, što stała padstavaj dla vyzvaleńnia. «Ukaz kiraŭnika dziaržavy», zapeŭniŭ milicyjant. Ale numar hetaha ŭkaza nie nazvaŭ, zaznačyŭšy, što «ŭ našaj bazie jaho niama».
Na dumku Paŭła Levinava, situacyja ź Viačasłavam Łazaravym śviedčyć pra toje, što zakanadaŭstva ŭ Biełarusi narmalnym čynam nie pracuje:
«Jość taki ałharytm. Z kałonii pa miescy rehistracyi dasyłajuć dakumienty pra vyzvaleńnie čałavieka, kab pastavić jaho na śpiecyjalny ŭlik u kryminalna-vykanaŭčaj inśpiekcyi. Tamu słužboviec prosta vykanaŭ svaje abaviazki, pieradaŭšy pozvu na chatni adras Łazarava. Takim čynam, inśpiekcyja dziejničała ŭ adpaviednaści sa svaimi instrukcyjami. Ale zakanadaŭstvam nie praduhledžany prymusovy vyvaz vyzvalenych za miažu! Što treba rabić dalej, staršy lejtenant Ušakoŭ prosta nie viedaje».
Darečy, vypadak z Łazaravym nie adziny ŭ Viciebsku. Takuju ž pozvu atrymali svajaki jašče adnaho viciebskaha palitviaźnia, departavanaha ŭ Litvu 11 vieraśnia. Pozvu na imia Paŭła Nikicienki taksama nakiravali z kryminalna-vykanaŭčaj inśpiekcyi RAUS Kastryčnickaha rajona.
Departavanyja pry pasiarednictvie amierykancaŭ palitviaźni zaviśli miž piekłam i ziamloju — biez DNŽ i mahčymaści pracavać
Vyzvaleny videaapieratar «Biełsata» Viačasłaŭ Łazaraŭ: Kab abaranić žonku, braŭ usiu vinu na siabie. Ale i jaje pakinuli ŭ SIZA
Viačasłaŭ Łazaraŭ, jaki vyjšaŭ z mahiloŭskaj kałonii, trochi raskazaŭ pra Padniabiennaha, jaki zahinuŭ «ad udušša»
MZS Polščy: My spadziajomsia, što ŭ nastupnaj hrupie vyzvalenych palitźniavolenych budzie Andžej Pačobut
Prajšła pres-kanfierencyja vyzvalenych palitviaźniaŭ
Kamientary