Sud u Aŭstryi apraŭdaŭ lekaraŭ, jakija dazvolili 12‑hadovamu dziciaci asistavać padčas apieracyi na čerapie

Pavodle źviestak abvinavačvańnia, dziaŭčynka navat samastojna praśvidravała pacyjentu Hreharu P. nievialikuju adtulinu ŭ čerapie, piša Bild.

Chirurh i jaje asistent byli zvolnienyja z kliniki, i navat pačaŭsia sud pavodle abvinavačvańnia ŭ pryčynieńni cialesnych paškodžańniaŭ. Prysud byŭ niečakanym: abodva lekary apraŭdanyja praź niastaču dovadaŭ. Nibyta dzicia trymała miedycynski dryl tolki adnoj rukoj, ale nie śvidravała samastojna.

«Jany dazvolili dziaŭčyncy praśvidravać adtulinu va ŭžo aholenaj čarapnoj kostcy pacyjenta z dapamohaj chirurhičnaha dryla», — zajaviła prakurorka Julija Štajnier.

Pierad hetym niejrachirurh nibyta patłumačyła svajoj dačce, jak pracuje prybor, a jaje kaleha rehulavaŭ chutkaść kručeńnia padčas umiašańnia.

Štajnier udakładniła: «A što b adbyłosia, kali b dryl nie spyniŭsia aŭtamatyčna paśla prachodžańnia kaścianoj tkanki? Heta było nadzvyčajnaj niepavahaj da pacyjenta i kaleh».

Pacyjent Hrehar P. dahetul adčuvaje psichałahičnyja nastupstvy apieracyi: «Kali ja ŭspaminaju pra toje, što mianie apieravała dvanaccacihadovaja, u mianie parušajecca son», — skazaŭ jon u sudzie. — «Ja nikoli b na heta nie pahadziŭsia».

Padčas pracesu staršaja lekarka paprasiła prabačeńnia za toje, što ŭziała dzicia ŭ apieracyjnuju: «Heta była samaja žudasnaja pamyłka ŭ maim žyćci». Jana patłumačyła, što pieraklučyłasia na telefonny zvanok i nie zaŭvažyła, jak jaje dzicia spytała ŭ kalehi, ci možna dapamahčy. Asistent zajaviŭ, što nie staŭ spračacca ź lekarkaj nakont taho, što robić dzicia ŭ apieracyjnaj. Kali ŭ klinicy pačali chadzić pieršyja čutki, niejrachirurh, jak jon śćviardžaje, paraiła jamu ŭsio admaŭlać.

Pavodle słoŭ adnoj śviedki, paśla apieracyi maci zajšła z dačkoj u pałatu i z honaram skazała: «Maja dačka tolki što ŭpieršyniu praśvidravała adtulinu».

Vypadak staŭ viadomy paśla taho, jak chtości padaŭ ananimnuju zajavu. Asistent lekarki zapeŭniŭ, što dziaŭčynka pakłała ruku na jaho ruku, ale ni chviliny nie kiravała pryboram samastojna. Sudździa ŭ vyniku apraŭdała abodvuch abvinavačanych z-za niastačy dokazaŭ: nichto nie bačyŭ, kab dzicia śvidravała samastojna. Asabista jana nazvała toje, što adbyłosia, «varjactvam».

Advakat paciarpiełaha zajaviŭ, što padaść hramadzianski pazoŭ suprać dziaŭčynki: «Ja acaniŭ patrabavańnie kampiensacyi maralnaj škody na 20 000 jeŭra».

• 0
• 0
• 0
• 0
• 0
• 0
• 0
• 0