Maryna Zołatava znachodziłasia za kratami z 18 maja 2021 hoda. U sakaviku 2023‑ha jaje asudzili na 12 hadoŭ pazbaŭleńnia voli ŭ kałonii ahulnaha režymu. Maryna Zołatava ŭvajšła ŭ hrupu palitviaźniaŭ, jakich vyzvalili 13 śniežnia.
Hałoŭnuju redaktarku najbujniejšaha partała Biełarusi zatrymali 18 maja 2021 hoda. U toj dzień siłaviki pryjšli dadomu nie tolki da jaje, ale i da niekatorych inšych supracoŭnikaŭ kampanii i partniorskich arhanizacyj u ramkach kryminalnaj spravy pa prykmietach składu złačynstva, praduhledžanaha č. 2 art. 243 KK (uchileńnie ad vypłaty sum padatkaŭ, zboraŭ u asabliva bujnym pamiery).
Sud pa spravie TUT.BY pačaŭsia tolki ŭ pačatku 2023 hoda i prachodziŭ u zakrytym režymie. Razam z Zołatavaj sudzili dyrektarku TAA «Tut baj miedyja» Ludmiłu Čekinu, redaktarku adździeła ekanomiki i palityki Volhu Łojku, karespandentku Alenu Tałkačovu i juryskonsulta Kaciarynu Tkačenka. Pierad sudom Tałkačova, Łojka i Tkačenka vyjechali za miažu.
Maryna Zołatava abvinavačvałasia ŭ «dapamozie va ŭchileńni ad vypłaty padatkaŭ, raspalvańni sacyjalnaj varožaści i varažniečy, raspaŭsiudzie materyjałaŭ z zaklikami da dziejańniaŭ, nakiravanych na pryčynieńnie škody nacyjanalnaj biaśpiecy Biełarusi».
17 sakavika 2023‑ha redaktarka była asudžana na 12 hadoŭ pazbaŭleńnia voli va ŭmovach ahulnaha režymu pa častcy 1 artykuła 130 KK Biełarusi «Raspalvańnie rasavaj, nacyjanalnaj, relihijnaj albo inšaj sacyjalnaj varožaści» i častcy 3 artykuła 361 «Zakliki da dziejańniaŭ, nakiravanych na pryčynieńnie škody nacyjanalnaj biaśpiecy Respubliki Biełaruś». Taksama MUS i KDB unieśli Marynu Zołatavu ŭ śpisy «ekstremistaŭ» i «terarystaŭ».
Pakarańnie Maryna adbyvała ŭ žanočaj papraŭčaj kałonii № 4 u Homieli.
Na voli jaje čakali muž i dvoje dziaciej — dačka Nadzieja i syn Fiodar.
Maryna Zołatava naradziłasia ŭ Minsku 6 listapada 1977 hoda. Paśla zakančeńnia fiłfaka BDU vučyłasia ŭ aśpirantury Instytuta movaznaŭstva Nacyjanalnaj akademii navuk. Pracavała ŭ dziaržaŭnym Instytucie prablem navuki, a taksama ŭ infarmacyjnym ahienctvie BiełaPAN.
U 2004 hodzie Maryna ŭznačaliła Tut.by. Na toj momant sajt byŭ zvyčajnym ahrehataram navin. Vystaŭlali samaje cikavaje, što pradukavałasia na inšych placoŭkach. Faktyčna Zołatava była pieršaj, chto na partale prafiesijna zaniaŭsia mienavita navinami.
Kali jana pryjšła na pracu, sajt mieŭ usiaho 6000 unikalnych karystalnikaŭ za sutki. Praź siamnaccać hadoŭ, u 2021-m, naviedvalnaść stała vyšejšaj bolš jak u 100 razoŭ. Sajt pieratvaryŭsia ŭ vialiki partał i staŭ samym upłyvovym biełaruskim resursam, ź mierkavańniem jakoha vymušanyja byli ličycca i na jaki musili reahavać ułady.
Pieršy raz Maryna Zołatava była zatrymanaja 7 žniŭnia 2018 hoda pa tak zvanaj spravie BiełTA. Tady vyśvietliłasia, što niekalki viadomych u Biełarusi redaktaraŭ i žurnalistaŭ pad čužym parolem karystalisia płatnaj viersijaj dziaržaŭnaha ahienctva. Ź dziasiatak žurnalistaŭ na troje sutak apynulisia na Akreścina. Adnak da suda była daviedzienaja adna sprava — suprać Maryny Zołatavaj pa častcy 2 artykuła 425 Kryminalnaha kodeksa «Biaździejnaść słužbovaj asoby». U vyniku Zołatava spłaciła štraf u pamiery 300 bazavych vieličyń.
Druhi raz jana patrapiła za kraty ŭ mai 2021-ha.
U Tut.by, da žurnalistaŭ i dachaty da Maryny Zołatavaj pryjšli siłaviki. Sajt zabłakavany
Piać faktaŭ pra zatrymanuju redaktarku Tut.by Marynu Zołatavu
Zołatava i Čekina — 12 hadoŭ kałonii. Na prysudzie sudździa Valancina Ziańkievič trymała ich u kajdankach
«Zajšła ŭ zału — i ludzi padnialisia, pačali plaskać». Siem jarkich fota hałoŭreda Tut.by Maryny Zołatavaj da jaje 48-hodździa
Ciapier čytajuć
Biełaruska nabiła na ciele partrety Łukašenki i jaho synoŭ, Umki, Pucina dy Si Czińpina17
Kamientary