Što Babaryka i Kaleśnikava adkazali na pytańni pra vajnu

Kaleśnikava i Babaryka praviali piać hadoŭ za kratami biez svabodnaha dostupu da infarmacyi, apošni čas ich trymali ŭ režymie inkamunikada, kali nie prapuskalisia nijakija listy. Pres-kanfierencyja prajšła na nastupny dzień paśla ich vyzvaleńnia.

Palitviaźni padziakavali Ukrainie za toje, što pryniała ich.

«Kali vy vyzvalilisia, ci viedali vy pra apošnija padziei vakoł vajny Rasii z Ukrainaj? I jak vy zaraz staviciesia da režymu Pucina i jaho supracoŭnictva z režymam Łukašenki?» — spytali ŭ palitviaźniaŭ.

Viktar Babaryka adkazaŭ:

«My ničoha nie viedajem dakładna. Čamu? Tamu što ŭ tych varunkach, u jakich my znachodzilisia, dostup da infarmacyi byŭ vielmi abmiežavany.

Ja nie kažu pra praŭdzivy ci niepraŭdzivy, ale tolki adnabakovy. To-bok z boku biełaruskich ŚMI. Tamu kamientavać štości i davać acenku, kali ty viedaješ tolki pazicyju adnaho boku, reč biessensoŭnaja.

Tamu ŭsio, što tyčycca taho, što adbyvajecca ŭ śviecie, asabliva, dzie pytańni tyčacca niejkich sprečnych momantaŭ, u jakich prysutničaje bolš, čym adzin bok, ja dumaju, ad nas vy mała što atrymajecie».

Žurnalist ukrainskaha vydańnia «Suśpilnie» spytaŭ, što im viadoma pra vajnu i rolu Biełarusi ŭ joj.

«Z samaha rańniaha dziacinstva mnie viadoma pra vajnu toje, što vajna heta zaŭsiody drenna, — adkazvaŭ Babaryka. — To-bok razumieńnie spraviadlivaj ci niespraviadlivaj vajny — heta ŭsio, viadoma, umoŭna, — ale vajna — heta drenna. Što tyčycca kankretna tut, jak ja ŭžo skazaŭ, vajna — heta pryčyna pakut dla najpierš tych krain, jakija ŭciahnutyja i dla ludziej, ale samaje strašnaje, što vajna — heta źjaŭlajecca napraŭdu punktam, jaki raźjadnoŭvaje.

Tamu kamientavać niejkija rečy, kali ty, jak ja ŭžo skazaŭ, praktyčna ničoha nie viedaješ i viedaješ tolki adnabakovaje… nu, ja ŭvohule ničoha nie mahu skazać. My viedajem, što viaducca niejkija dziejańni, toje, što my možam kazać — tolki toje, što pakazvajuć pa biełaruskich srodkach masavaj infarmacyi. (…) Možna skazać tolki toje, što my viedajem, što pakazvajuć pa biełaruskim telebačańni. A heta, nu, a heta praktyčna ničoha».

Śviatłana Šacilina, pradstaŭnica Abjadnaha pierachodnaha kabinieta va Ukrainie, spytała: kali b u vas była mahčymaść prakamientavać abo zadać pytańnie biełaruskamu dobraachvotniku, jaki zaraz vajuje za Ukrainu, što b vy jamu skazali?

Kaleśnikava i Babaryka adkazali, što nie mohuć prakamientavać, bo nie majuć infarmacyi.

Babaryka dadaŭ taksama:

«Vybar kožnaha čałavieka robicca — ja ŭpeŭnieny, što i dobraachvotniki robiać jaho — uśviadomlena, zychodziačy z tych sistem kaštoŭnaściaŭ, jakija jość u kožnaha. U ramkach maich sistem kaštoŭnaściaŭ, jak ja ŭžo skazaŭ, usialakaja vajna — heta drenna. Adpaviedna, ja nie vieru ŭ toje, što vyčerpvajucca ŭsie vidy mahčymaha ŭrehulavańnia, akramia vajny.

Napeŭna, niechta vyrašaje heta pa-inšamu. Napeŭna, niechta dumaje, što jon užo vyčarpaŭ usio z punktu hledžańnia svaich kaštoŭnaściaŭ, zmahacca inšymi mietadami, akramia vajny. Tamu taksama kamientavać vielmi-vielmi składana.

Ale ŭ što ja vieru, što ludzi robiać uśviadomleny vybar, zychodziačy z tych sistem spraviadlivaści, dabra, jakimi jany vałodajuć».

Błohier Uładzimir Zołkin, jaki zajmajecca prajektam pra pałonnych «Šukaj svaich», vyrašyŭ uvieści ŭ kantekst i patłumačyŭ, što jość Połk Kalinoŭskaha, kudy dałučylisia biełarusy, kab dapamahać Ukrainie abaraniać siabie. Jon zhadaŭ pra siało Jahadnaje, dzie rasijanie zahnali ŭ sutareńnie miascovych žycharoŭ i trymali tam 80 dzion u niečałaviečych umovach.

«I voś znajšlisia biełarusy, jakija stali na naš bok, pryjšli dla taho, kab zabivać tych, chto pryjšoŭ na našu ziamlu, — kudy ich nichto nie zaprašaŭ, — kab zabivać nas. Ja ŭsio ž chaču pačuć ad vas adkaz. Ci padtrymlivajecie vy idei takich ludziej?» — spytaŭ Zołkin.

«Pytańnie nie tyčycca nacyjanalnaści. Pytańnie nie tyčycca, maješ ty racyju, ci nie, ci ŭsiaho astatniaha, — staŭ adkazvać Babaryka. — Usio, što čynicca suprać čałaviečnaści, jano biesčałaviečnaje. Jaho nielha padtrymlivać.

Ale jašče raz padkreślu, takija dziejańni, jany nie mohuć padtrymlivacca, jany nie zaležać ad taho, dzie čałaviek naradziŭsia. Jany zaležać ad maralnych pryncypaŭ samoha čałavieka. I ich nielha padtrymlivać ni ŭ jakim razie. Nielha apraŭdać, što heta možna rabić, tamu što ja za spraviadlivaść.

Nie. Hetaha nielha rabić. To-bok jość tłumačeńnie, čamu ty robiš, ale acenka samoha maralnaha ŭčynku ad hetaha nie moža mianiacca.

I tamu adkaz na vaša pytańnie ŭtrymlivajecca mienavita ŭ samim pytańni. Takich ludziej nielha padtrymlivać. Ale heta nie značyć, što heta čyniać vyklučna… jak rasijanie kažuć, što heta ŭkraincy čyniać, ukraincy kažuć, što heta rasijanie.

Dakładna hetaksama, jak i ŭ kožnaj vajnie, jakaja b ni adbyvałasia, čyniacca złačynnyja dziejańni, jakija nielha padtrymlivać. Ni ŭ jakaj miery.

Tamu takich ludziej padtrymlivać nielha. Ale jašče raz padkreślivaju, heta nie zaležyć ad nacyjanalnaści».

Kaleśnikava pahadziłasia ź mierkavańniem Babaryki.

«Vajna — heta žudasna. I toje, što robiać ludzi, heta žudasna. Mnie zdajecca, što ciapier nadyšoŭ momant, kali heta moža spynicca.

I ja vielmi chaču, kab heta spyniłasia. I ja viedaju, što miljony ludziej pa ŭsioj ziamli vielmi chočuć, kab hety žach spyniŭsia, kab spynilisia zabojstvy ludziej, kab spynilisia takija biesčałaviečnyja ŭčynki, kab ludzi ŭspomnili, što jany ludzi i navošta ŭvohule my ŭsie pryjšli ŭ hety śviet. Vielmi ciažka pra heta čuć.

Tut apraŭdańniaŭ sapraŭdy nijakich nie moža być. Ja spačuvaju i hłyboka padzialaju stratu Ukrainy, stratu Rasii i ŭsich, chto pakutuje tut. Heta vialiki bol, i heta pavinna spynicca».

Były dobraachvotnik Vadzim Kabančuk skazaŭ, što bolš za 80 biełaruskich dobraachvotnikaŭ, jakija abaraniali Ukrainu, zahinuła. Jon spytaŭ u Babaryki i Kaleśnikavaj, ci mahli jany pa kantencie, jaki byŭ u kałonii, zrazumieć, chto na kaho napaŭ.

«Try hady praktyčna ja pravioŭ u PKT, a tam, na žal, navat u adroźnieńnie ad Mašy, tam knižka na tydzień była, tamu ja, na žal, tak pahłynać litaraturu nie moh, — kazaŭ Babaryka. —

Biezumoŭna, jak ja ŭžo skazaŭ, adnabakovaja padača infarmacyi — heta prosta adnabakovaja padača infarmacyi. I tamu toje, što my bačyli pa biełaruskim telebačańni, bačyli i vy. I ŭłasna, jak ja mahu kamientavać pa-inšamu, kali biełarusy kažuć pra toje, što voś pačałasia vajna, voś tak voś, što ja mahu z hetaj vysnovy zrabić štości inšaje? Dy nie, viadoma ž, takoje ž».

«Ale jašče raz ja kažu, što nijakaj inšaj vysnovy, akramia taho, što havaryłasia, nielha zrabić. A vysnovu rabić na padstavie tolki adnoj pazicyi ja nikoli nie braŭsia. Tamu što, ja nie viedaju», — dadaŭ Babaryka.

Kaleśnikava zhadała vypusk navin ad 24 lutaha 2022 hoda.

«A praz dva tydni ja jakraz apynułasia ŭ PKT. I nastupnyja, napeŭna, 20 miesiacaŭ ci 21 miesiac ja nie bačyła televizara.

Ale voś hety vypusk ja zapomniła. I heta byŭ vypusk navin, pa-mojmu, pa ANT, pra toje, što, ja nie viedaju, jak heta pravilna farmulavać u vajennaj terminałohii, ja absalutna nie vałodaju joj, što byŭ abstralany Kijeŭ. Pa-mojmu, voś tak heta prahučała.

Ja heta zapomniła. I dalej tam išli niejkija kamientary, jakija niejkim čynam, napeŭna, apraŭdvali hety sam fakt. Ale ja absalutna dakładna pamiataju, što voś tak heta było skazana.

I mnie było ŭsio zrazumieła, hetaksama, jak, napeŭna, usiamu śvietu».

• 11
• 15
• 4
• 66
• 1
• 5
• 6
• 0