Ludzi, što zabili 15 čałaviek na plažy ŭ Sidniei padčas Chanuki, — heta baćka i syn

Śviedki raspaviali, što napad na znakamitym plažy, pierapoŭnienym u śpiakotny viečar, doŭžyŭsia kala 10 chvilin.

U niadzielu ŭ 18:47 pa miascovym časie palicyja Sidneja atrymała paviedamleńnie ab stralbie na śviatkavańni Chanuki ŭ nievialikim parku kala plažu, na jakoje sabralisia bolš za tysiaču čałaviek.

Paźniej źjaviłasia videa, na jakim dva čałavieki na praciahu niekalkich chvilin stralali pa ludziach z mastka, jaki viadzie da plažu. Na inšym videa da adnaho sa strałkoŭ, jaki spuściŭsia z mastka ŭ bok plažu, padkradvajecca inšy, nakidvajecca na jaho zzadu i adbiraje vintoŭku ci strelbu. Strałok paśla hetaha sychodzić.

Kolkaść achviar stralby rasła. Pa apošnich danych, jak zajaviŭ ministr achovy zdaroŭja štata Novy Paŭdniovy Uels Rajan Park, achviarami strałkoŭ stali 15 čałaviek, adzin sa strałkoŭ taksama zabity.

Jak paviedamiła na bryfinhu palicyja, strałok 50‑hadovy mužčyna byŭ zabity na miescy, a jaho 24‑hadovy syn znachodzicca ŭ krytyčnym stanie ŭ balnicy.

Jašče 40 čałaviek zastajucca ŭ balnicy paśla napadu, u tym liku dvoje palicyjantaŭ, jakija znachodziacca ŭ ciažkim, ale stabilnym stanie. Uzrost achviar składaŭ ad 10 da 87 hadoŭ, zajavili ŭ palicyi.

Aficyjnyja asoby acharaktaryzavali stralbu ŭ niadzielu jak metanakiravany antysiemicki napad. U palicyi zajaŭlali, što ličać napad teraktam suprać jaŭrejskaj abščyny Sidnieja, a ŭ aŭtamabili, jak miarkujecca, jaki naležaŭ napadniku, mahli znachodzicca «niekalki samarobnych vybuchovych pryład».

50‑hadovy napadnik byŭ členam strałkovaha kłuba i adpaviadaŭ kryteryjam dla atrymańnia licenzii na ahniastrelnuju zbroju dla amatarskaha palavańnia, zajaviŭ kamisar palicyi štata Meł Łeńjon.

Pavodle jaho słoŭ, u mužčyny z 2015 hoda była «licenzija katehoryi AB, jakaja davała jamu prava na vałodańnie daŭharulnaj zbrojaj», jany z synam u Aŭstralii ŭžo davoli daŭno. «Na hetym etapie my vielmi mała pra ich viedajem», — dadaŭ Łeńjon.

Paźniej ministr unutranych spraŭ Aŭstralii Toni Bierk udakładniŭ, što starejšy sa strałkoŭ prybyŭ u krainu ŭ 1998 hodzie pa studenckaj vizie, a jaho syn — hramadzianin Aŭstralii pa naradžeńni.

Minakom, jaki na videa abiazzbrojvaje adnaho sa strałkoŭ, akazaŭsia miascovy žychar, 43‑hadovy baćka dvaich dziaciej, uładalnik fruktovaj kramy Achmied al-Achmied. Strałok, jaki zastavaŭsia na mastku, paraniŭ jaho ŭ plačo i ruku. Al-Achmied byŭ dastaŭleny ŭ balnicu, jaho žyćciu, pavodle papiarednich danych, ništo nie pahražaje.

Premjer-ministr štata Novy Paŭdniovy Uels Krys Mins nazvaŭ jaho sapraŭdnym hierojem. «Dziakujučy hetamu advažnamu čałavieku siońnia mnohija i mnohija zastalisia žyvyja», — skazaŭ Mins.

Mierapryjemstva prachodziła na hazonie kala plažu pobač ź piešachodnym mostam, ź jakoha viali ahoń.

Vakoł miesca praviadzieńnia mierapryjemstva była ŭstanoŭlena mietaličnaja aharodža, i ludzi pavinny byli ŭvachodzić i vychodzić praz varoty, dzie, vidać, praviarali sumki, ale ŭ cełym miery biaśpieki zdavalisia niamocnymi.

Karespandent Bi-bi-si, jakaja znachodziłasia na susiednim plažy, naličyła kala 20 hučnych chłapkoŭ, jakim spačatku nichto nie nadaŭ značeńnia. Ludzi zachvalavalisia, tolki kali pačuli palicejskija viertaloty, jakija pralatali nad imi.

Stralba ŭ Sidnei stała samym maštabnym aktam hvałtu ŭ Aŭstralii za apošnija amal 30 hadoŭ.

Ułady zajavili, što ŭpeŭnienyja va ŭdziele ŭ incydencie tolki dvuch napadnikaŭ, choć raniej paviedamlali ab praviercy datyčnaści treciaj asoby. Kolkaść palicyi ŭ jaŭrejskich abščynach pavialičana.

Premjer-ministr Aŭstralii Entani Albaniezie naviedaŭ plaž Bondzi-Bič u paniadziełak ranicaj i ŭskłaŭ kvietki niedaloka ad miesca napadu. Raniej Albaniezie nazvaŭ napad «zmročnym momantam dla našaj krainy» i zajaviŭ, što palicyja i słužby biaśpieki staranna praviarajuć matyvy napadajučych.

«Toje, što my ŭbačyli ŭčora, było aktam čystaha zła, aktam antysiemityzmu, aktam teraryzmu na našych bierahach u znakavym aŭstralijskim miescy», — skazaŭ Albaniezie žurnalistam.

Albaniezie zajaviŭ, što niekalki suśvietnych lidaraŭ, u tym liku prezident ZŠA Donald Tramp, źviazalisia ź im, i padziakavaŭ im za salidarnaść.

«U Aŭstralii adbyŭsia žudasny napad, — skazaŭ Tramp padčas pryjomu ŭ Biełym domie ŭ niadzielu. — I heta, vidavočna, byŭ antysiemicki napad».

Jak zajaviŭ premjer-ministr Izraila Bińjamin Nietańjachu, jon papiaredžvaŭ premjera Albaniezie ab tym, što padtrymka Aŭstralijaj paleścinskaj dziaržaŭnaści budzie padsiłkoŭvać antysiemityzm.

U žniŭni Aŭstralija abvinavaciła Iran u arhanizacyi jak minimum dvuch antysiemickich napadaŭ i dała pasłu Tehierana tydzień na toje, kab pakinuć krainu. «Iran sprabavaŭ schavać svoj udzieł, ale, na dumku našaj raźviedki, mienavita jon stajaŭ za hetymi napadami», — kazaŭ tady premjer-ministr Aŭstralii.

• 0
• 0
• 0
• 2
• 0
• 4
• 1
• 0