Biełarus pastaviŭ novuju SIM-kartku i atrymaŭ dostup da čužych pierapisak u telehramie

«Ja naohuł i nie viedaŭ, što hety numar kamuści ŭžo naležaŭ. Potym ja ŭžo troški daviedaŭsia, što treba było dapłacić 25 rubloŭ, kab atrymać tak zvany «bieły» numar — taki, jaki raniej nikim nie vykarystoŭvaŭsia. Viadoma ž, ja b uziaŭ jaho dziciaci, kab być upeŭnienym, što jamu nie buduć pamyłkova telefanavać nieznajomyja ludzi.

Raniej ja ŭžo viedaŭ, što, skažam, kali nie budu karystacca SIM-kartkaj i nie budu płacić za jaje, to moj numar moža adyści kamuści inšamu i što čałaviek zmoža zarehistravać na hety numar svoj novy telehram-akaŭnt. Ale ja nie viedaŭ, što ŭ hetym vypadku novy ŭładalnik moža atrymać dostup da padpisak i pierapiski raniejšaha ŭładalnika».

Mužčyna pračytaŭ, što dla deaktyvacyi papiaredniaha akaŭnta i stvareńnia novaha treba dla pačatku vyjści sa staroha akaŭnta na ŭsich pryładach. Ale zrabić heta adrazu nie atrymałasia:

«U telehramie ŭspłyło paviedamleńnie, što ja nie mahu, vykarystoŭvajučy novuju pryładu, vyjści z usich akaŭntaŭ. Vyjaviłasia, što stary rachunak, pryviazany da telefona majho dziciaci, usio jašče vykarystoŭvajecca papiarednim uładalnikam».

Dźmitryj sa svajho asabistaha akaŭnta napisaŭ u telehram byłomu ŭładalniku numara i paprasiŭ jaho vyjści z akaŭnta na ŭsich pryładach. Toj adkazaŭ praź dzień: «Ok», — i sapraŭdy vyjšaŭ z akaŭnta na inšych pryładach. Prablema vyrašyłasia — atrymałasia stvaryć novy «čysty» rachunak, ale zastaŭsia niepryjemny asadak.

Mabilny apieratar: pry źmienie numara vydalajcie pryviazku servisaŭ

Žurnalisty źviarnulisia pa kamientar da MTS (mienavita jaho Dźmitryj padklučyŭ dla dziciaci) i atrymali taki adkaz:

«U MTS realizavany miechanizm, jaki dazvalaje abanientam paźbiehnuć ryzyki atrymańnia numara z historyjaj. Pry padklučeńni «biełaha» numara klijent atrymlivaje kambinacyju ličbaŭ, jakaja nikoli raniej nie vykarystoŭvałasia dla rehistracyi ŭ miesiendžarach, sacyjalnych sietkach abo servisach.

U metach biaśpieki my nastojliva raim pry vykarystańni roznych dadatkaŭ abaviazkova naładžvać dvuchfaktarnuju aŭtentyfikacyju i rehularna praviarać aktyŭnyja sieansy. A pry źmienie numara abaviazkova vydalić pryviazku da jaho z usich servisaŭ — bankaŭskich prahram, internet-kram, sacyjalnych sietak i miesiendžaraŭ. Hetyja kroki dazvalajuć minimizavać vierahodnaść dostupu da pierapiski i kantaktaŭ.

Kali ž abanient vypadkova atrymaŭ dostup da čužych źviestak, važna dziejničać dobrasumlenna: nieadkładna vyjści z akaŭnta, paviedamić u słužbu padtrymki servisu i, pa mahčymaści, papiaredniamu karystalniku. Śviadomaje vykarystańnie čužoj infarmacyi moža razhladacca jak parušeńnie pryvatnaści i paciahnuć za saboj adkaznaść, praduhledžanuju zakanadaŭstvam».

• 2
• 0
• 4
• 11
• 3
• 0
• 0
• 0