Synu režysiora Roba Rajniera vystavili abvinavačvańni ŭ zabojstvie baćkoŭ
Niku Rajnieru moža pahražać śmiarotnaje pakarańnie.
32‑hadovamu Niku Rajnieru vystavili abvinavačańni ŭ dvuch zabojstvach pieršaj stupieni z abciažarvajučymi abstavinami, paviedamiŭ akruhovy prakuror Łos-Andželesa Natan Chochman, piša Bi-bi-si.
Mierkavałasia, što Nik Rajnier paŭstanie pierad sudom i zrobić zajavu ŭ aŭtorak, adnak jaho nie dastavili z turmy ŭ sud pa miedycynskich pryčynach. Sudovaje pasiadžeńnie adkładziena da taho času, pakul supracoŭniki turmy nie dazvolać pieravieźci padazravanaha.
Niku Rajnieru moža pahražać pakarańnie až da śmiarotnaj kary, kali jaho pryznajuć vinavatym. Prakuratura pakul nie paviedamiła, ci płanuje bok abvinavačańnia chadajničać ab pryznačeńni śmiarotnaj kary.
Aktor i režysior Rob Rajnier i jaho žonka Mišel byli znojdzieny miortvymi ŭ svaim domie ŭ Łos-Andželesie ŭ niadzielu. Nieŭzabavie palicyja zatrymała ich syna, z taho času jon znachodzicca pad vartaj biez prava ŭniasieńnia zakładu.
Nik Rajnier byŭ suaŭtaram scenaryja filma «Być Čarli», režysioram jakoha vystupiŭ jaho baćka. U intervju časopisu People jon raskazvaŭ, što stužka pra padletka, jaki pakutuje ad narkatyčnaj zaležnaści, častkova zasnavanaja na jaho ŭłasnym dośviedzie baraćby z zaležnaściu.
Kamientary