Сыну рэжысёра Роба Райнера выставілі абвінавачванні ў забойстве бацькоў
Ніку Райнеру можа пагражаць смяротнае пакаранне.
32‑гадоваму Ніку Райнеру выставілі абвінавачанні ў двух забойствах першай ступені з абцяжарваючымі абставінамі, паведаміў акруговы пракурор Лос-Анджэлеса Натан Хохман, піша Бі-бі-сі.
Меркавалася, што Нік Райнер паўстане перад судом і зробіць заяву ў аўторак, аднак яго не даставілі з турмы ў суд па медыцынскіх прычынах. Судовае пасяджэнне адкладзена да таго часу, пакуль супрацоўнікі турмы не дазволяць перавезці падазраванага.
Ніку Райнеру можа пагражаць пакаранне аж да смяротнай кары, калі яго прызнаюць вінаватым. Пракуратура пакуль не паведаміла, ці плануе бок абвінавачання хадайнічаць аб прызначэнні смяротнай кары.
Актор і рэжысёр Роб Райнер і яго жонка Мішэль былі знойдзены мёртвымі ў сваім доме ў Лос-Анджэлесе ў нядзелю. Неўзабаве паліцыя затрымала іх сына, з таго часу ён знаходзіцца пад вартай без права ўнясення закладу.
Нік Райнер быў суаўтарам сцэнарыя фільма «Быць Чарлі», рэжысёрам якога выступіў яго бацька. У інтэрв’ю часопісу People ён расказваў, што стужка пра падлетка, які пакутуе ад наркатычнай залежнасці, часткова заснаваная на яго ўласным досведзе барацьбы з залежнасцю.
Цяпер чытаюць
На поўначы Беларусі існавала велізарнае возера — у 150 разоў большае за Нарач. Яно знікла ў выніку прыроднай катастрофы, але сляды заўважныя і сёння77
Каментары