Prakuror prosić dla eks-pamočnika Łukašenki Ihara Bryło 12 hadoŭ źniavoleńnia

Jak stała viadoma «Našaj Nivie», u najbližejšy čas budzie vyniesieny prysud fihurantam znakamitaj małočnaj spravy, jakaja pačałasia ŭ listapadzie 2023‑ha z aryštu na toj momant pamočnika Łukašenki pa Viciebskaj vobłaści Ihara Bryło. 

Nieŭzabavie było zatrymana amal usio siamiejstva kiraŭnika «Babulinaj krynki» Hienadzia Skitova, uklučna ź im samim, a taksama mieniedžmientam chołdynha.

Sens spravy ŭ tym, što byccam by Skitavy pry spryjańni Bryło razharnuli na dziaržaŭnaj «Babulinaj kryncy» sistemu, pry jakoj štučna stvarałasia zatavaranaść składoŭ, što dazvalała dla ich razhruzki adpuskać pradukcyju pa nižejšaj canie. Potym hetaje ŭ realnaści dobraje małako i inšaja pradukcyja pa dempinhavych cenach adhružałasia na firmy-pasiaredniki, jakija pradavali tavar u Rasii pa realnaj canie. A roźnica, adpaviedna, dzialiłasia pamiž udzielnikami schiemy.

Bryło aktyŭna supracoŭničaŭ sa śledstvam, a Skitoŭ admoviŭsia davać pakazańni. U suviazi z hetym praces rasśledavańnia mocna zaciahnuŭsia. 

Čytajcie taksama: «Hruzić siabie i inšych»: były pamočnik Łukašenki Ihar Bryło biare na siabie vinu ŭ pramysłovych abjomach

Sud pačaŭsia tolki ŭ vieraśni 2025‑ha, i voś užo chutka budzie vyniesieny prysud. 

Jak stała viadoma «Našaj Nivie», prakuror zapytaŭ Iharu Bryło 12 hadoŭ pazbaŭleńnia voli, Hienadziu Skitovu — 13 hadoŭ. 

Zapytany prysud Skitovu supadaje z tym, čym pahražała jamu śledstva ŭ tym vypadku, kali jon nie pryznaje vinu. 

Čytajcie padrabiaznaści: 81‑hadovuju maci aŭtaryteta Skitova z «Babulinaj krynki» kinuli ŭ SIZA KDB, kab jon narešcie zahavaryŭ

Aproč centralnych fihurantaŭ, na łavie padsudnych:

— Viktar Skitaŭ, syn Hienadzia Skitava, dyrektar filijała «Minski» «Babulinaj krynki».

— Arciom Zubiel, pieršy namieśnik dyrektara «Babulinaj krynki», syn byłoha namieśnika načalnika ščučynskaj milicyi.

— Halina Ciciankova, namieśnica dyrektara «Babulinaj krynki», paśla ŭznačaliła haspadarku «Novaja Druć» u Białynickim rajonie.

— Alaksiej Dranica, načalnik adździeła źniešnieekanamičnaj dziejnaści «Babulinaj krynki». 

— Dzianis Lińnik, dyrektar filijała «Asipovicki» «Babulinaj krynki», były načalnik Barysaŭskaha RUUSa.

— Siarhiej Pietražycki, dyrektar «Viciebskmiasmałprama».

— Uładzimir Siruć, «hałoŭny siabar» Hienadzia Skitava, kiraŭnik šerahu afilijavanych kampanij.

— Siarhiej Kačanaŭ, dyrektar viciebskaha kancerna «Miasa-małočnyja pradukty»

— «Nikołajevič M. V». — poŭny ciozka Michaiła Valancinaviča Nikałajeviča, byłoha namieśnika staršyni praŭleńnia «Technabanka» i namieśnika dyrektara salihorskaha futbolnaha «Šachciora».

— Uładzimir Lisicyn, zasnavalnik «BiełAhraHien Biełaruś».

Jašče pra piać čałaviek dakładna nie viadoma, čym jany zajmalisia na svabodzie: A. Čarniak, A. Jaščanka, H. Kirakasian, A. Sabalkoŭ, A. Pankoŭ.

Fihuranty prachodziać pa 12 artykułach kryminalnaha kodeksu: 

• Artykuł 430 č. 2 — atrymańnie chabaru, ad 3 da 10 hadoŭ pazbaŭleńnia voli;
• artykuł 426 č. 3 — pieravyšeńnie ŭłady pry ciažkich nastupstvach, ad 3 da 10 hadoŭ pazbaŭleńnia voli;
• artykuł 430 č. 3 — atrymańnie chabaru, ad 5 da 15 hadoŭ pazbaŭleńnia voli;
• artykuł 209 č. 1 — machlarstva, štraf, hramadskija raboty, aryšt albo abmiežavańnie voli da 3 hadoŭ, albo pazbaŭleńnie voli da 3 hadoŭ;
• artykuł 431 č. 3 — dača chabaru, ad 5 da 10 hadoŭ pazbaŭleńnia voli;
• artykuł 426 č. 2 — pieravyšeńnie ŭłady, ad 2 da 6 hadoŭ pazbaŭleńnia voli;
• artykuł 424 č. 2 — złoŭžyvańnie ŭładaj, ad 2 da 6 hadoŭ pazbaŭleńnia voli;
• artykuł 431 č. 1 — dača chabaru, štraf, vypraŭlalnyja raboty da 2 hadoŭ, aryšt abo abmiežavańnie voli da 2 hadoŭ, albo pazbaŭleńnie voli da 5 hadoŭ;
• artykuł 424 č. 3 — złoŭžyvańnie ŭładaj, ad 3 da 10 hadoŭ pazbaŭleńnia voli;
• artykuł 210 č. 4 — machlarstva ŭ asabliva bujnym pamiery abo arhanizavanaj hrupaj, ad 3 da 10 hadoŭ pazbaŭleńnia voli z mahčymaj kanfiskacyjaj;
• artykuł 432 č. 2 — pasrednictva ŭ chabary, aryšt abo abmiežavańnie voli da 5 hadoŭ, albo pazbaŭleńnie voli da 6 hadoŭ;
• artykuł 210 č. 3 — machlarstva ŭ bujnym pamiery, ad 2 da 7 hadoŭ pazbaŭleńnia voli.

• 0
• 0
• 1
• 0
• 0
• 0
• 0
• 0