Čaćviortuju liniju minskaha mietro paviaduć u Dražniu. A «Ślapianka» i «Daŭhabrodskaja» źmianili svajo miesca

Novyja abrysy transpartnaj budučyni Minska stali viadomyja dziakujučy repartažu dziaržaŭnaha telekanała ANT, pryśviečanamu pracy prachodčych ščytoŭ, jak zaŭvažyŭ partał blizko.by. U siužecie ŭ kadr trapili śviežyja schiemy raźvićcia padziemki z kabinietaŭ instytuta «Minskmietraprajekt». Ź ich vynikaje, što raniejšaja trasa čaćviortaj linii źmianiłasia — mietratuneli zrobiać rezki viraž na ŭschod.

Novaja trasa ŭschodniaha paŭkalca

Da niadaŭniaha času płanavałasia, što paśla stancyi «Bataničny sad» ciahniki pojduć da šostaj kliničnaj balnicy na stancyju «Uralskaja», na skryžavańni vulic Uralskaj i Frolikava, a adtul skirujucca da stancyi «Daŭhabrodskaja», dzie była zapłanavana pierasadka na stancyju «Traktarny zavod» Aŭtazavodskaj linii.

Pavialičyć

Pavialičyć

Adnak ciapier trasa ŭschodniaha paŭkalca istotna źmianiajecca. Paśla «Bataničnaha sada» linija zavaročvaje na ŭschod, da Zaparožskaj płoščy na skryžavańni vulic Filimonava, Staletava i Zaparožskaj, dzie raźmieścicca stancyja «Ślapianka».

Dalej tuneli projduć pad Radyjalnaj vulicaj, dzie ŭ pramysłovaj zonie na skryžavańni z vulicaj Vaŭpšasava źjavicca novaja stancyja «Dražnia».

Paśla hetaha trasa čaćviortaj linii praciahniecca pad Radyjalnaj vulicaj da skryžavańnia ź Pierachodnaj vulicaj i ŭ stvory z vulicaj Žyłunoviča, pa ŭskrajku Minskaha padšypnikavaha zavoda, vyjdzie da stancyi «Daŭhabrodskaja» na Partyzanskim praśpiekcie, jakaja ciapier stanie pierasadačnaj sa stancyjaj «Partyzanskaja», a nie sa stancyjaj «Traktarny zavod», jak było zaprajektavana raniej.

Pavialičyć

Pavialičyć

Navošta źmianili čaćviortuju liniju

Mahčyma, što hetyja źmieny va ŭschodnim paŭkalcy źviazany z tym, što na ŭschod ad Minskaj kalcavoj aŭtadarohi płanujecca ŭźviadzieńnie mikrarajona Zialony Bor, ahulnaja płošča zabudovy jakoha pieravysić miljon kvadratnych mietraŭ.

Vulica Vaŭpšasava stanie hałoŭnaj transpartnaj arteryjaj dla hetaha masiva, tamu mietro imknucca padvieści jak maha bližej da budučych žycharoŭ.

Pavialičyć

Pry hetym u novaj dakumientacyi zajaŭleny 18 (17) stancyj čaćviortaj linii, što nie supadaje z namalavanym na schiemie. Pieršapačatkova na kalcy płanavałasia 17 prypynkaŭ. Kali ŭ pačatku hoda z prajekta vyklučyli «Kijeŭski skvier» i «Politechničnuju», ich zastałosia piatnaccać. Ciapier dadałasia «Dražnia» — na pradstaŭlenych novych schiemach adlustravany tolki 16 prypynkaŭ.

Što tyčycca inšych pierśpiektyŭnych rajonaŭ, padaŭžeńnie pieršaj i druhoj linij zachoŭvajecca tolki ŭ kirunku Jelnicy i Ščomyślicy adpaviedna. Praciah mietro ŭ Dziehciaroŭku ci Paŭnočny bierah, dzie płanujuć zbudavać čatyry z pałovaj miljona kvadratnych mietraŭ žylla, prajektam pa-raniejšamu nie praduhledžany.

• 2
• 0
• 0
• 2
• 1
• 0
• 0
• 0