Borys Džonsan tajemna pravioŭ dvoje sutak na froncie pad Zaparožžam
Pra heta były premjer Brytanii sam paviedamiŭ u brytanskaj Daily Mail, piša «Interfaks-Ukraina».
«Jechać pa hałoŭnaj darozie praz Kamyšavachu — heta hulnia z ahniom, i bolšaść kiroŭcaŭ prosta ihnarujuć vyboiny, padobnyja da krataraŭ, dy cisnuć na piedal hazu. Rasijanie chočuć zachapić heta siało, i jany prahnuć hetaha nastolki mocna, što, jak zaŭsiody pa-varvarsku, zapuskajuć adzin dron za inšym, namahajučysia zapałochać žycharoŭ», — raskazaŭ palityk pra svaje ŭražańni.
Džonsan apisvaje, što šmat kamunikavaŭ z ukrainskimi bajcami, adčuŭ ich stomlenaść i žadańnie zakančeńnia vajny, ale ŭpeŭnieny, što Ukraina moža zdabyć pieramohu, kali Zachad daść dastatkova dapamohi.
«Paśla razmoŭ z ukrainskimi sałdatami na pieradavoj ja baču ich źniasilenaść i vidavočnaje čałaviečaje imknieńnie, kab vajna skončyłasia. Ja byŭ poŭny hnievu — jak i vy b byli — praź niedastatkovaść zachodniaj padtrymki. Ale paśla 48 hadzin na froncie ja pierakanany jak nikoli, što ŭkraincy pieramohuć, što adnojčy jany pazbaviacca ad orkapadobnych armij Pucina i što hetaja cudoŭnaja, bahataja kraina stanie volnaj», — napisaŭ jon.
Džonsan upeŭnieny, što «ništo i nichto» nie prymusić ukraincaŭ pajści na kampramis z rasijskimi ŭładami.
«Hetyja ŭkraincy stamilisia paśla čatyroch hadoŭ piekła. Mnohija ź ich raniej atrymali surjoznyja ranieńni i viarnulisia na pole boju sa šramami ad askiepkaŭ na hałovach i rukach. Ale prasoŭvańnie Pucina adbyvajecca pavolna, jak ledavik, i abychodzicca nadzvyčaj doraha — jak u hrašovym, tak i ŭ čałaviečym vymiareńni», — zaŭvažyŭ palityk.
Eks-premjer Vialikabrytanii padkreśliŭ, što kalektyŭny Zachad musić pierajści ad palityki vierbalnaj padtrymki i zapeŭnivańniaŭ da bolš rašučaj i kankretnaj dapamohi.
«My čatyry hady paŭtarali banalnyja frazy i zapeŭnivali ich, što ich baraćba — heta i naša baraćba. Miarkujučy pa tym, što ja bačyŭ, my strašenna nie vykonvajem svaich abiacańniaŭ i nie dajem im nieabchodnaj dapamohi. Ukraincy mohuć pieramahčy i pieramohuć. Ale naša marudžańnie i bojaź praciahvajuć vyklikać niejmaviernyja čałaviečyja pakuty. My majem racyju, kali kažam, što ŭkraincy zmahajucca za ŭsich nas — dyk čamu, čort biary, my da hetaha času ich abdzialajem?» — reziumavaŭ jon.
Zaniapad brytanskich kansiervataraŭ. Ci źniknie partyja Čerčyla i Tetčer?
Borys Džonsan atrymaŭ uznaharodu ad imia Śviatłany Cichanoŭskaj
Dypłamatyčny daradca Cichanoŭskaj raskazaŭ, navošta jamu zvaniŭ Borys Džonsan
60‑hadovy Borys Džonsan staŭ baćkam u dziaviaty raz
Borys Džonsan padtrymaŭ prapanovu Trampa pa vykapniach va Ukrainie
Viadučaja Bi-bi-si vypadkova adpraviła pytańni Borysu Džonsanu pierad intervju. Intervju pryjšłosia admianić
Kamientary
Tramp, Orban, Fico na takie niezdatni.
[Zredahavana]