Zachad vs Uschod. Čamu abłasnyja centry tak adroźnivajucca pamiž saboj

Jak źmianiałasia nasielnictva

Homiel, samy bujny abłasny centr, sioleta straciŭ status horada-paŭmiljońnika — za hod nasielnictva skaraciłasia z 501 193 da 499 853 čałaviek.

Z abłasnych centraŭ pryraśli tolki Hrodna (+1184) i Brest (+1077).

Kali hladzieć na dynamiku apošnich 30 hadoŭ, to kolkaść žycharoŭ pavialičyłasia va ŭsich abłasnych centrach, aproč Mahilova. Tam u 1996 hodzie žyli 356 tysiač čałaviek suprać amal 353 tysiač ciapier.

Pavialičyć

Ale pryrost nasielnictva ŭ Hrodnie i Breście nieparaŭnalna bolšy, čym u Viciebsku i Homieli.

Za apošnija 30 hadoŭ Hrodna vyras z 298 tysiač čałaviek da amal 365 tysiač. Heta plus 67 tysiač čałaviek, ci kala 22,4% — rekordny pakazčyk. Brest za hety ž pieryjad pryros na 62 tysiačy čałaviek: z 285 tysiač da 347 tysiač. Heta plus 21,8%.

U toj ža čas u Viciebsku nasielnictva vyrasła mienš, čym na 8 tysiač žycharoŭ: z 350 tysiač da amal 358 tysiač.

Pavialičyć

Nasielnictva Homiela ŭ paraŭnańni z 1996 hodam vyrasła na 2,5 tysiačy čałaviek.

Zarobki taksama adroźnivajucca

Zarobki ŭ abłasnych centrach na zachadzie i ŭschodzie krainy taksama adroźnivajucca, i znoŭ nie na karyść uschodnich haradoŭ.

Siarednija bruta-zarobki za studzień-luty 2026 hoda pa abłasnych centrach:

• Brest — 2726 rubloŭ;

• Hrodna — 2615 rubloŭ;

• Homiel — 2502 rubli;

• Mahiloŭ — 2487 rubloŭ;

• Viciebsk — 2313 rubloŭ.

Zhodna z aficyjnymi ličbami, siaredni naličany zarobak u samym zamožnym abłasnym centry (Brest) i samym biednym (Viciebsk) adroźnivajecca amal na 18%.

Pry hetym varta adznačyć, što ŭ 1996 hodzie roźnica ŭ zarobkach amal adsutničała. U 2006‑m u top-10, aproč Hrodna i Bresta, usio jašče možna było ŭbačyć Mahiloŭ.

Adnak kali hladzieć na bolš poźnija pakazčyki, naprykład, 2016 ci 2020 hady, to stanovicca bačna: u topie pa zarobkach zastajucca tolki Hrodna i Brest, jakija kankurujuć pamiž saboj.

Pavialičyć

Naturalna, što i ceny na nieruchomaść u Breście i Hrodnie tradycyjna bolš vysokija, čym u abłasnych centrach na ŭschodzie. Siarod uschodnich abłasnych centraŭ lidarskuju pazicyju jak pa zarobkach, tak i pa cenach na nieruchomaść zajmaje Homiel.

U topie amal zaŭždy hetyja try harady

Pra bolš kamfortnaje žyćcio na zachadzie krainy śviedčać i roznyja rejtynhi.

Pavodle daśledavańniaŭ Centra novych idej, Minsk, Hrodna i Brest tradycyjna zajmajuć pieršyja radki rejtynhu biełaruskich haradoŭ. U rejtynhu ŭličvajucca ekanamičny stan, jakaść žyćcia, demahrafičnyja pakazčyki, turystyčnaja pryvabnaść.

Tak, u 2023‑m na pieršaj pazicyi apynuŭsia Brest, na druhoj — Hrodna, a na treciaj — Minsk. U 2026‑m u top-3 byŭ Minsk, paśla — Brest, a za im — Hrodna.

Viciebsk u apošnim rejtynhu byŭ na piatym miescy, Mahiloŭ — na šostym, Homiel — na vośmym.

Pavialičyć

Padobnaja ratacyja zaŭvažna i ŭ abmierkavańniach ludziej. Kali ŭ sacsietkach uzdymajecca pytańnie pierajezdu ŭ Biełaruś ź inšych krain abo ŭnutry Biełarusi, čaściej za ŭsio, aproč Minska, razhladajuć mienavita Brest i Hrodna.

Čamu Hrodna i Brest majuć lepšuju jakaść žyćcia?

Adzinaha adkazu na pytańnie, čamu za apošnija tryccać hadoŭ mienavita dva zachodnija abłasnyja centry vyrvalisia napierad, niama. Tut hraje rolu niekalki faktaraŭ.

Na ekanomiku dvuch zachodnich abłasnych centraŭ pazityŭna ŭpłyvaje turyzm.

Praz heta raźvivajecca hatelna-restaranny biznes, a taksama pasutkavaja arenda žytła. Ceny na kvatery na sutki ŭ Hrodnie i Breście našmat bolš vysokija, čym u abłasnych centrach na ŭschodzie.

Pavialičyć

U adroźnieńnie ad žycharoŭ abłasnych centraŭ na ŭschodzie žychary Hrodna i Bresta zaŭždy mieli dadatkovuju mahčymaść padzarabić na pamiežnym handli. 

Asabliva papularnym heta było ŭ dakavidnyja časy, ale navat ciapier chapaje ludziej, jakija dahetul zarablajuć na pajezdkach u Polšču ci Litvu. Pryčym heta moža być jak asnoŭny, tak i dadatkovy zarobak, jaki nidzie nie adlustroŭvajecca ŭ statystycy, ale budzie ŭpłyvać na dabrabyt žycharoŭ, u tym liku ŭskosna praz toje, što hrošy, zaroblenyja takim čynam, asiadajuć u horadzie.

Aproč kantrabandna-čaŭnočnaha, u hetych haradach tradycyjna bolš raźvity aŭtabiznes. Asabliva ŭ Hrodnie, jaki miažuje z Polščaj i Litvoj.

Praź blizkaść da miažy ź Jeŭrasajuzam bieraściejcam i haradziencam praściej jeździć tudy na zarobki, bo ŭmoŭny dalnabojščyk z Hrodna abo Bresta moža lohka dabracca ad domu da bazy za 2—3 hadziny, kali viciebčuku ci hamielčuku treba budzie prajechać praz usiu krainu.

Jašče adzin čyńnik, jaki moža tłumačyć roźnicu pamiž zachadam i ŭschodam krainy, — heta bolš poźni prychod savietaŭ, bo Hrodna i Brest u mižvajenny pieryjad byli pad Polščaj, a nie pad SSSR ź jahonymi kałhasami. Tamu ŭ Zachodniaj Biełarusi ŭ bolšaj stupieni zachavalisia duch pradprymalnaści i pryvatnaja inicyjatyva.

• 20
• 0
• 3
• 1
• 0
• 0
• 0
• 2