Navina ab tym, što ŭ Mahiloŭskaj vobłaści žančyna zaraziłasia šalenstvam paśla taho, jak vuličny kot padrapaŭ joj ruki, vyklikała ŭ mnohich ździŭleńnie: niaŭžo šalenstva moža pieradacca nie tolki praz ukus, ale i praz zvyčajnuju drapinu? Voś što kažuć ekśpierty.
Suśvietnaja arhanizacyja achovy zdaroŭja tłumačyć, što virus šalenstva pieradajecca praź ślinu zaražanaj žyvioły — nie tolki pry ŭkusach, ale i praz drapiny abo kali ślina traplaje na paškodžanuju skuru ci ślizistyja abałonki.
Amierykanski Centr kantrolu i prafiłaktyki zachvorvańniaŭ (CDC) taksama padkreślivaje, što šalenstva raspaŭsiudžvajecca «praz ukusy abo drapiny ad infikavanych žyvioł».
Miechanizm zaražeńnia vyhladaje davoli prosta. Virus znachodzicca ŭ ślinie chvoraj žyvioły. Kali žyvioła vylizvaje łapy, ślina moža zastavacca na kipciurach. Tamu navat drapina stanovicca niebiaśpiečnaj, kali praz paškodžanuju skuru virus traplaje ŭ arhanizm.
Asabliva niebiaśpiečnyja paškodžańni na rukach, tvary i šyi — u miescach ź vialikaj kolkaściu niervovych kančatkaŭ. CDC adznačaje, što zaražeńnie tkanak, bahatych na niervy, moža paskoryć raźvićcio infiekcyi.
U mižnarodnych miedycynskich rekamiendacyjach drapiny ličacca aficyjnym faktaram ryzyki. CDC u daviedniku Yellow Book asobna piša, što chacia drapiny majuć nižejšuju ryzyku pieradačy, čym ukusy, jany mohuć być zabrudžanyja ślinaj, što ŭtrymlivaje virus šalenstva.
SAAZ taksama papiaredžvaje, što zaražeńnie mahčymaje navat tady, kali infikavanaja žyvioła ablizała čałavieku ranu, miesca, dzie sadrana abo paškodžana skura, a taksama ślizistuju abałonku rota i nosa. Tamu miedyki rajać usprymać luby kantakt ź nieviadomaj abo dzikaj žyviołaj, paśla jakoha była paškodžanaja skura, jak patencyjna niebiaśpiečny.
Šalenstva zastajecca adnoj z samych śmiarotnych infiekcyj u śviecie. Paśla źjaŭleńnia simptomaŭ chvaroba amal zaŭsiody zakančvajecca śmierciu. SAAZ adznačaje, što paśla raźvićcia kliničnych prajaŭ šalenstva «amal u 100% vypadkaŭ śmiarotnaje». Mienavita tamu hałoŭnaje praviła — nie čakać simptomaŭ, a dziejničać adrazu paśla kantaktu z padazronaj žyviołaj.
Miedyki rekamiendujuć nieadkładna pramyć ranu vadoj z myłam na praciahu niekalkich chvilin i jak maha chutčej źviarnucca da daktaroŭ. Kali jość ryzyka zaražeńnia, čałavieku pryznačajuć paślakantaktnuju prafiłaktyku — kurs vakcynacyi, jaki praktyčna zaŭsiody praduchilaje raźvićcio chvaroby.
Ciapier čytajuć
Usie biełaruskija banki pačnuć sačyć za miescaznachodžańniem klijentaŭ? Alfa-bank užo papiaredziŭ, admovicca niemahčyma16
Usie biełaruskija banki pačnuć sačyć za miescaznachodžańniem klijentaŭ? Alfa-bank užo papiaredziŭ, admovicca niemahčyma
Kala Safii ŭ Połacku pastavili pomnik lotčykam Ničyparčyku i Kukanienku. Ale navat nie samalot toj madeli, na jakoj jany zahinuli, a aerapłan stalinskaha času2020
Kamientary