«Biełaruskaja Barbi» Kaciaryna Koba vyjšła zamuž u Šviejcaryi. Imavierna, za tajamničaha rasijskaha multymiljaniera
37‑hadovaja byłaja madel, a ciapier błohierka Kaciaryna Koba staranna chavaje svajho kachanaha.
Naradziłasia Kaciaryna ŭ Murmansku. Ale kali dziaŭčynka była maleńkaj, jaje baćki raźvialisia, i maci ź dźviuma dočkami pryjechała ŭ Minsk.
U 2010‑ch Kaciaryna Koba była značnaj asobaj u biełaruskim bamondzie. Jana była paśpiachovaj madellu, mieła sotni tysiač padpisčykaŭ u instahramie i viała pieradačy na telebačańni — spačatku na «Biełaruś 1», potym na «BiełMuzTB».
Źniałasia Kaciaryna i ŭ pieršaj viersii klipa Maksa Karža na pieśniu «Niebo pomožiet nam». Dy i sama pasprabavała zapisać žartaŭlivuju pieśniu «Štučka».
Minijaciurnaja błandzinka tak nahadvała znakamituju lalku, što jaje pačali zvać «Biełaruskaj Barbi». Koba paśpiachova vykarystoŭvała heta — navat zapuściła ŭłasny sajt Barbie.by.
Kaciaryna była zamužam za biznesmienam Vitalem Hamzovičam — toj zajmaŭsia aŭtazapčastkami. U siamji naradziŭsia syn.
Ale ŭ niejki momant instahramnaja karcinka pryhožaha kachańnia źmianiłasia — patrochi z sacsietak madeli źnikli ahulnyja zdymki ź Vitalom. A ŭ 2018 hodzie Kaciaryna pryznałasia, što paśpieła raźvieścisia. Kali heta dakładna adbyłosia — nieviadoma.
Pastupova Koba źnikła ź biełaruskaha bamondu. Zdajecca, apošniaja chvilina słavy była ŭ Kaciaryny ŭ 2020 hodzie. Tady jana trapiła ŭ mižnarodnyja ŚMI praz absurdnuju situacyju. U razhar pandemii Kaciaryna pačała raspaviadać, byccam bejdžyk na jaje šyi baronić ad virusaŭ. Kazała, što taki błakatar składana dastać, joj ža cuda-abaronu padaryŭ siabar.
U chutkim časie vyśvietliłasia, što taki «błakatar virusaŭ» pradajecca navat na kitajskich sajtach — i, viadoma, ni ad jakich virusaŭ nie ratuje. Koba ŭ vyniku vybačałasia za pamyłku.
Apošnija hady Kaciaryna Koba žyvie ŭ Šviejcaryi. Jana maje ŭłasny brend adzieńnia — u asnoŭnym, heta spartovyja kaściumy dla zaniatkaŭ johaj. Afłajn heta ŭsio možna nabyć u kramach u Minsku i Maskvie.
Kaciaryna adpačyvaje ŭ darahich hatelach, bavić čas na Maldyvach i demanstruje brendavyja rečy kštałtu sumački Chanel.
Na instahram Kaciaryny padpisana 440 tysiač čałaviek. Niadaŭna jana padzialiłasia s padpisčykami ščaślivaj navinoj: apublikavała videa, u jakim jana ŭ biełaj sukiency nadziavaje sabie na bieznazoŭny palec pravaj ruki zaručalny piarścionak.
«Samy ščaślivy i chvalujučy dzień», — padpisała ryłz Koba.
Rabić śviatočny makijaž niavieście prylatała jaje siabroŭka ź Minska — znakamitaja biełaruskaja cyrulnica-vizažystka Kaciaryna Sycevič. Jana taksama papularnaja błohierka, maje 114 tysiač padpisčykaŭ u instahramie.
Na ścienach pakojaŭ, dzie Kaciaryna zdymała videa, možna pabačyć znakamity fotazdymak brytanskaj fatohrafki i režysiorki Zany Bryski (jana viadomaja jak aŭtarka fotaprajektaŭ pra dzikuju pryrodu, a taksama jak sustvaralnica dakumientalnaha filma «Narodžanyja ŭ bardelach»), a jašče karcinu, jakuju, imavierna, napisaŭ mastak Majk Darhas (adzin z najbolš jarkich pradstaŭnikoŭ sučasnaha niamieckaha hipierrealizmu).
Uličvajučy, što na zadnim fonie šmat mužčynskaha adzieńnia, zdymki adbyvalisia ŭsio ž nie ŭ hateli. A, chutčej za ŭsio, u domie čałavieka, jaki lubić i cenić mastactva.
Na pytańni, chto ž žanich, Kaciaryna padpisčykam adkazvać nie stała. Adna z padpisčyc napisała: «Naziraju za vami z časoŭ Vitalika, uvieś hety čas vy byli adna?». Adkazała siabroŭka Koby: «Uvieś hety čas jana była z najlepšym mužčynam, za jakoha vyjšła zamuž». Kaciaryna hety kamientar łajknuła.
Kamientatary nie palenavalisia pajści i ŭ instahram pieršaha muža Kaciaryny, kab paviedamić pra jaje viasielle. Vital adkazaŭ: «Kaciuša ŭžo siem hadoŭ zamužam, učora była prosta farmalnaja častka ich cudoŭnych adnosin».
Svajho kachanaha Koba staranna chavaje. Adzinaje, što jana sabie dazvoliła — apublikavać ich supolny šarž, namalavany padčas Aktobierfestu.
Adnak niekalki detalaŭ pakazvajuć, što novym mužam moža być rasijski miljanier Alaksandr Smuzikaŭ.
54‑hadovy Alaksandr Smuzikaŭ pryncypova nie daje intervju. Zdajecca, adnojčy tolki jon zrabiŭ vyklučeńnie dla Forbes i piśmova adkazaŭ na niekalki ich pytańniaŭ. U 2013 hodzie Smuzikaŭ trapiŭ u śpis samych bahatych biznesmienaŭ Rasii — na 169 miesca. Tady, pa padlikach časopisa, u jaho było 600 miljonaŭ dalaraŭ.
Doŭhi čas navat zdymkaŭ miljaniera znajści było niemahčyma — žurnalisty nie zmahli adšukać ich navat u byłych partnioraŭ biznesmiena.
Ale ŭsio ž niekalki fota trapili ŭ internet — i ŭsio dziakujučy chobi Alaksandra Smuzikava. Jon vielmi lubić palavańnie, tamu ź niezvyčajnymi trafiejami kštałtu biehiemota paziravać hatovy.
Jašče adno zachapleńnie Smuzikava — mastactva. Jon adzin z najbujniejšych kalekcyjanieraŭ ruskaha avanhardu.
Pracy Marka Šahała taksama jość u kalekcyi rasijskaha biznesmiena. Darečy, jany sioleta vystaŭlalisia ŭ Taškiencie — Smuzikaŭ čas ad času dazvalaje muziejam ekspanavać karciny.
Taksama pra Alaksandra pišuć jak pra miecenata, jaki padtrymlivaje maładych mastakoŭ.
A jašče jon aktyŭna kuplaje ŭnikalnyja knihi dla svajoj biblijateki.
Jak ža Alaksandr zarabiŭ šalonyja hrošy? Forbes pačynaje raspovied pra žyćciovy šlach Smuzikava z taho, što ŭ 1989 hodzie (Alaksandr naradziŭsia ŭ Jekacierynburhu, a tady jakraz skončyŭ škołu ŭ Maskvie) jaho asudzili na try hady za rabavańnie — chłopiec sarvaŭ futravuju šapku z čałavieka. Tady takija šapki doraha kaštavali. Nastupnaja sudzimaść była za zachoŭvańnie zbroi.
U siaredzinie 1990‑ch Smuzikaŭ staŭ partnioram handlara naftapraduktami Alaksandra Krasnałobava. Ich kampanija «Tradeks» zajmałasia niachitrym biznesam, jaki azałaciŭ dziasiatki ludziej, źviazanych z postsavieckimi ŭładnymi elitami: kuplała naftu, addavała jaje na pierapracoŭku NPZ Rasii, Ukrainy i Biełarusi, a naftapradukty pradavała na Zachad.
Pieršym punktam sapraŭdnaha pośpiechu Smuzikava časopis nazyvaje 2008 hod — tady biznesmien praviarnuŭ bujnuju ździełku i davoli ŭdała pradaŭ sietku aŭtazapravak kampanii TNK-BP.
Smuzikaŭ krajni sprava
Ciapier, jak pišuć ŚMI, Alaksandr žyvie ŭ Šviejcaryi ŭ horadzie Sankt-Halen. Akramia rasijskaha, jon maje izrailski pašpart.
U 2023 hodzie ŭkrainskija ŚMI, jakija nazyvajuć Smuzikava nabližanym da rasijskaj ułady aliharcham, pisali, što toj sprabuje atrymać hramadzianstva Partuhalii (padaŭ dakumienty ŭ 2020 hodzie).
Pra toje, jakim biznesam zajmajecca ciapier Alaksandr, viadoma niašmat. Letaś, naprykład, paviedamlałasia, što jon adzin z najbujniejšych hulcoŭ na rynku mikrakredytaŭ u Rasii.
Čutki pra raman z Kaciarynaj Koby i Alaksandra Smuzikava chadzili nie adzin hod. Ale ŭsie dokazy ich adnosin uskosnyja.
Naprykład, Kaciaryna Koba dzialiłasia ŭ instahramie kadrami z taho samaha Sankt-Halena. Letaś jana ŭ Šviejcaryi sustrakałasia sa svajoj siabroŭkaj — taja taksama publikavała videa z hetaha nie samaha papsovaha turystyčnaha horada.
U Kaciaryny jość svoj brend adzieńnia. Zhodna z danymi sajta rusprofile.ru, zarehistravana jaje IP u Rasii ŭ Ćviarskoj vobłaści, Kanakoŭskim rajonie, u malaŭničaj vioscy Jedzimonaŭskija Horki.
Tam ža zarehistravany palaŭničy kłub «Kžackija prastory», jaki naležyć Alaksandru Smuzikavu.
Darečy, Kaciaryna pieryjadyčna rekłamuje ŭ instahramie bazu adpačynku «Jedzimanava viładž», jakaja znachodzicca ŭ toj samaj vioscy, što staić u vierchavinach Dźviny. Padobna, što i ŭładalnikam bazy źjaŭlajecca Smuzikaŭ — bo «Jedzimanava viładž» źviazanaja z adnoj ź jaho kampanij.
U internecie možna znajści infarmacyju, što Alaksandr Smuzikaŭ byŭ žanaty — i ŭ šlubie naradziłasia troje dziaciej, ale, kali vieryć krynicam, aficyjna jon daŭno aformiŭ razvod.
U instahramie Kaciaryna i jaje syn Cimur padpisanyja na syna Smuzikava.
Ukrainskaja madel zhulała z hruzinskim biznesmienam viasielle ŭ Kanach na 5 miljonaŭ jeŭra. Viadučymi byli Jaŭhien Pierlin i Maksim Hałkin
Vyhnaŭ žonku zimoj na vulicu, zabraŭ małuju dačku: detali razvodu kasmanaŭta Aleha Navickaha, jaki, zdajecca, ciapier ažaniŭsia z Vasileŭskaj
Natalla Padolskaja zładziła viasielle ŭ druhi raz. U hości pryjšli Z-artysty i navat Piaskoŭ
Kamientary