Hetyja kolery vas začarujuć. U Mastackim adkryłasia vystava niehlubskich tkačych
7 maja ŭ vystaŭnym korpusie Nacyjanalnaha mastackaha muzieja ŭ zale № 2 pačaŭ pracu prajekt «Harmonija śvietu niehlubskich tkačych», pryśviečany tradycyjnamu tkactvu vioski Niehlubka Vietkaŭskaha rajona.
Nahadajem, što ŭ śniežni 2025 hoda na 20‑j siesii Mižuradavaha kamiteta JUNIESKA ŭ Ńju-Deli było pryniata rašeńnie ab aficyjnym uklučeńni niehlubskaj tekstylnaj tradycyi Vietkaŭskaha rajona Homielskaj vobłaści ŭ Śpis niemateryjalnaj kulturnaj spadčyny JUNIESKA, jakaja patrabuje terminovaj achovy.
Niehlubskaje tkactva — unikalnaja źjava biełaruskaj narodnaj kultury, što zachavała archaičnyja rysy i składanuju simvoliku. Tradycyja, jakaja sfarmiravałasia ŭ XVII stahodździ, achoplivaje stvareńnie ručnikoŭ, elemientaŭ adzieńnia i interjeru z vykarystańniem samabytnych technik tkactva i vyšyŭki. Jana aktyŭna raźvivajecca i ŭ naš čas.
Na vystavie — raznastajnyja tvory mastackaha tkactva vybitnych majstrych, a taksama tradycyjny kaścium vioski Niehlubka i mnostva aŭtentyčnych redkich aksesuaraŭ.
U ekspazicyi pradstaŭlena kala 50 tvoraŭ tekstylu z kalekcyi Nacyjanalnaha mastackaha muzieja.
Taksama buduć ekspanavacca instrumienty dla apracoŭki lonu i pradmietaŭ tekstylu, pradastaŭlenych partnioram prajekta — Biełaruskim dziaržaŭnym muziejem narodnaj architektury i pobytu, a taksama šerah redkich elemientaŭ kaściuma, aksiesuaraŭ i fotazdymkaŭ z fondaŭ jašče adnaho partniora prajekta — Vietkaŭskaha muzieja staraabradnictva i biełaruskich tradycyj imia Šklarava, paviedamlajecca na sajcie muzieja.
Kamientary