Na sustrečy NATA dziaržsakratar ZŠA asprečyŭ mierkavańnie pra toje, što amierykanskaja administracyja vykarystoŭvaje raźmiaščeńnie vojskaŭ ZŠA jak srodak cisku na jeŭrapiejskich sajuźnikaŭ pa NATA.
«Heta nie pakarańnie, a prosta pastajanny praces», — zajaviŭ Rubia, piša Bild.
Pavodle jaho słoŭ, u ZŠA jość «hłabalnyja abaviazacielstvy», jakija patrabujuć «pastajanna pierahladać, dzie mienavita raźmieščanyja našy vojski».
Pry hetym prezident ZŠA Donald Tramp nie chavaje niezadavolenaści tym, što ZŠA traciać na abaronu značna bolš, čym inšyja členy NATA. U 2025 hodzie ŭsie krainy aljansu narešcie dasiahnuli ŭstanoŭlenaj mety — 2% VUP na abaronu, adnak Tramp patrabuje pakazčyk u 5%.
Taksama na nieraŭnamiernaje raźmierkavańnie vydatkaŭ skardzicca nie tolki Tramp. Mark Rute niadaŭna taksama zajaviŭ, što vydatki na padtrymku Ukrainy ŭnutry aljansu raźmierkavanyja nieraŭnamierna.
Pavodle jaho słoŭ, asnoŭnuju nahruzku niasie tolki «abmiežavanaja» hrupa krain — Šviecyja, Kanada, Hiermanija, Niderłandy i Danija, u toj čas jak mnohija inšyja dziaržavy «traciać niedastatkova, kali havorka idzie pra dapamohu Ukrainie».
Adnak unutry NATA niama adzinstva adnosna taho, nakolki daloka pavinna zachodzić padtrymka aljansu, jakimi pavinny być doŭhaterminovyja harantyi biaśpieki dla Ukrainy i nakolki naohuł realistyčnym źjaŭlajecca jaje ŭstupleńnie ŭ NATA ŭ budučyni.
Pakul u Šviecyi ministry zamiežnych spraŭ NATA abmiarkoŭvajuć važniejšyja pytańni, siońnia vysokapastaŭlenyja pradstaŭniki Pientahona adnačasova nakiroŭvajucca ŭ Brusiel, kab prainfarmavać krainy-členy NATA pra płany ŭdziełu amierykanskich uzbrojenych sił u abaronie Jeŭropy.
Kamientary