Amierykanska-iranskaja vajna nabliziłasia da zaviaršeńnia, i ceny na naftu amal dasiahnuli davajennaha ŭzroŭniu. Spytali ŭ ekśpierta, što heta budzie aznačać dla Biełarusi.
Viartańnie na davajenny ŭzrovień
Pierad pačatkam kanfliktu ZŠA i Irana nafta marki Urals pradavałasia pa $56‑58 za baral. Ciapier jaje košt nabliziŭsia da $59. Heta pry tym, što ciaham niekalkich miesiacaŭ jaje košt niaredka pieravyšaŭ $100, a ŭ pikavyja momanty dasiahaŭ amal $120 za baral.
Vysokija ceny razam z zamarozkaj sankcyj u dačynieńni da rasijskaj nafty davali Rasii mahčymaść atrymlivać dadatkovy prybytak ad ekspartu.
Zaviaršeńnie hetaha spryjalnaha dla rasijskaj ekanomiki pieryjadu razam z rehularnymi atakami na NPZ mohuć niehatyŭna paŭpłyvać na ekanomiku i kurs rubla. A pakolki biełaruskaja ekanomika ščylna źviazanaja z rasijskaj, to ŭsie niehatyŭnyja nastupstvy buduć adbivacca i na našaj ekanomicy.
Ekśpiert BEROC Anastasija Łuzhina adznačaje, što prasiadańnie kursu rasijskaha rubla ŭ druhoj pałovie hoda było prahnazavanym.
«Heta było ŭ tym liku źviazana z tym, što anamalna vysokija ceny na naftu z časam pavinny byli źnizicca, pakolki krainy APIEK naraścili abjomy pastaŭki nafty, a taksama z pryčyny taho, što i iranskaja nafta stanie pastupać na rynak.
Taksama heta źviazana z prablemami na rasijskich NPZ, kali ŭ vyniku razbureńniaŭ mohuć skaračacca abjomy pastavak naftapraduktaŭ», — tłumačyć ekanamist.
Sankcyi na naftu viernucca?
Akramia taho, u suviazi z narmalizacyjaj situacyi na Blizkim Uschodzie ZŠA, chutčej za ŭsio, nie stanuć padaŭžać zamarozku sankcyj na rasijskuju naftu.
«Tamu heta moža pavialičyć dyskont, ź jakim Rasija budzie vymušanaja pradavać svaju ŭžo znoŭ padsankcyjnuju naftu.
Dla Rasii heta budzie aznačać trend na źnižeńnie rasijskaha rubla da zamiežnych valut, adpaviedna, anałahičnyja tendencyi adbuducca chutčej za ŭsio i z rublom biełaruskim», — miarkuje ekśpiert.
Pry hetym ekanamist adznačaje, što heta budzie nie imhnienny, a raściahnuty pa časie praces, pakolki kantrakty zaklučajucca zahadzia i vyručka pa novych, usio jašče vysokich cenach taksama pačynaje pastupać z peŭnaj zatrymkaj.
«Tamu ŭ poŭnaj miery efiekt ad tannaj nafty rasijskaja ekanomika pačnie adčuvać bližej da žniŭnia — pačatku vieraśnia», — źviartaje ŭvahu Łuzhina.
Ci buduć utrymlivać kurs?
Dla Rasii źnižeńnie kursu rubla moža razhladacca i jak stanoŭčy efiekt, bo ciapier rubiel zanadta darahi, što taksama nie vielmi dobra dla ich ekanomiki.
«Kali ŭ Rasii budzie adbyvacca abjektyŭnaje źnižeńnie kursu, to ekanamičnyja ŭłady nie buduć ničoha rabić dla ŭtrymańnia kursu na ciapierašnim uzroŭni.
Ale na biełaruski valutny rynak heta budzie dziejničać anałahičnym čynam, što budzie pryvodzić da patańnieńnia biełaruskaha rubla da taho ž dalara. Pry hetym da rasijskaha rubla, naadvarot, moža adbycca ŭmacavańnie», — tłumačyć ekanamist.
Adnak źnižeńnie ŭzroŭniu naftahazavych dachodaŭ u Rasii — heta nie tolki pra źmieny na valutnym rynku.
«Dla ekanomiki, jakaja i tak znachodzicca nie ŭ lepšym stanie, usio heta, viadoma, budzie mieć niehatyŭnyja nastupstvy.
U RF užo pierahledzieli prahnozy ekanamičnaha rostu ŭ bok źmianšeńnia, źniziŭšy prahnozny pakazčyk da 0,4%. Zapavoleńnie ekanamičnaha rostu aznačaje, što i popyt na biełaruskija tavary taksama nie budzie raści».
I pakolki ekanomika Biełarusi ščylna źviazanaja z rasijskaj, to ŭsie niehatyŭnyja tendencyi, jakija tam adbyvajucca, buduć znachodzić adlustravańnie ŭ ekanomicy Biełarusi.
Biełaruskija NPZ nie ŭratujuć situacyju
Pry hetym važna razumieć, što tyja dachody, jakija Biełaruś atrymlivaje za košt pavieličeńnia pastavak paliva ŭ Rasiju, — ahułam nievialiki plus dla ekanomiki.
«Za piać miesiacaŭ było pastaŭlena 270 tysiač ton bienzinu na rasijski rynak. Heta šmatrazovaje pavieličeńnie pastavak u paraŭnańni ź minułym hodam. Adnak kali navat vykazać zdahadku, što tolki za červień pastaviać 60 tysiač ton — heta ŭsio roŭna mienš za 2% štomiesiačnych patrebaŭ rynku Rasii.
Chutčej za ŭsio, Rasija mahła b kuplać bolš, ale biełaruskija NPZ fizična nie mohuć mocna pavialičyć vytvorčaść bienzinu», — kanstatuje ekśpiert.
Łuzhina kaža i pra mienš vidavočnyja, ale taksama davoli hruntoŭnyja faktary, jakija mohuć niehatyŭna adbivacca na biełaruskim eksparcie.
«Ataki bieśpiłotnikaŭ na rasijskuju infrastrukturu patencyjna abmiažoŭvajuć abjomy ekspartu biełaruskich tavaraŭ, jakija iduć tranzitam praz Rasiju ŭ inšyja krainy. Tamu naroščvańnie pastavak paliva ŭ RF moža nie kampiensavać uźnikłyja dadatkovyja vydatki praz paharšeńnie łahistyčnych šlachoŭ».
Kamientary