Cichanoŭskaja: Kali buduć svabodnyja vybary, ja ŭ ich udzielničać nie budu. Ale ciapier nie čas kankuravać

— Apošnim časam pamiž ZŠA i biełaruskim režymam zaviazaŭsia niejki dyjałoh: u abmien na vyzvaleńnie palityčnych źniavolenych Vašynhton admianiŭ niekatoryja sankcyi suprać biełaruskich pradpryjemstvaŭ. Moža, vy možacie padzialicca svajoj acenkaj, jakaja matyvacyja prymušaje Vašynhton i Minsk iści na hety dyjałoh?

— Najpierš chaču skazać, što my vielmi ŭdziačny amierykanskim partnioram za namahańni pa vyzvaleńni palityčnych źniavolenych, bo heta ludzi, jakija siadzieli nie adzin hod. Na dadzieny momant my majem dadzienyja pra prykładna 800 palityčnych źniavolenych, jakija nie vyzvaleny, ale realnaja ličba bolšaja. Za hod było vyzvalena kala 500 źniavolenych.

Mety administracyi prezidenta Donalda Trampa i Alaksandra Łukašenki roznyja. Administracyja Donalda Trampa zacikaŭlena ŭ humanitarnym aśpiekcie. Jak vy viedajecie, śpiecyjalny pasłańnik Džon Koŭł vielmi ŭciahnuty ŭ praces vyzvaleńnia palityčnych źniavolenych — dla ich heta humanitarnaja misija. Ja biaźmiežna ŭdziačna prezidentu Donaldu Trampu, jaki publična patrabuje vyzvalić palityčnych załožnikaŭ — tak jon vielmi pravilna nazyvaje źniavolenych u Biełarusi ludziej.

Pa-pieršaje, dla Alaksandra Łukašenki hety praces — sposab pakazać śvietu: «Pahladzicie, ja nie izhoj, sam amierykanski prezident sa mnoj razmaŭlaje». Pa-druhoje, jon imkniecca jak maha daražej pradać palityčnych źniavolenych.

Heta pakazvaje, što sankcyi pracujuć, režym Alaksandra Łukašenki ciarpić z-za sankcyj i z-za hetaha vielmi choča ich admieny. Tolki ja chaču padkreślić, što Alaksandr Łukašenka nie vyzvalaje palityčnych źniavolenych — heta bolš prymusovaja departacyja.

U lubym vypadku, vyzvaleńnie palityčnych źniavolenych — heta sumiesny vynik amierykanskaj dypłamatyi i mocnaj, ćviordaj, pryncypovaj pazicyi Jeŭrapiejskaha Sajuza. Biez hetaj mocnaj pazicyi, jakaja doŭžycca šeść hadoŭ, Alaksandr Łukašenka nie mieŭ by matyvacyi vyzvalać palityčnych źniavolenych.

U toj čas jak amierykancy prykładajuć namahańni dla vyzvaleńnia ludziej, my prosim Jeŭropu zachavać mocnuju, pryncypovuju pazicyju, nie pačynać kamunikavać pra admienu sankcyj. Zaraz nie čas dla hetaha.

Biełaruskaje pytańnie źviazana nie tolki z humanitarnaj misijaj, heta źviazana i ź biaśpiekaj, z vajnoj va Ukrainie i vykarystańniem biełaruskaj terytoryi dla zapałochvańnia susiedziaŭ.

Tamu my prapanujem takuju formułu, što amierykanskija sankcyi mohuć vykarystoŭvacca z metaj vyzvaleńnia palityčnych źniavolenych, a sankcyi Jeŭrapiejskaha Sajuza — z metaj vyzvaleńnia samoj krainy, kab u Biełarusi adbylisia niezvarotnyja sistemnyja źmieny.

Padumajcie, navat kali buduć vyzvaleny ŭsie palityčnyja źniavolenyja, a Alaksandr Łukašenka zastaniecca, u Litvu buduć lacieć šary, kala miež buduć źbiracca mihranty, ź biełaruskaj terytoryi budzie iści pahroza jadziernaj zbrojaj ci «Iskanderami». Značyć, pahroza z boku Biełarusi nikudy nie źniknie. Demakratyčnaja i volnaja Biełaruś — u intaresach Jeŭropy. Tamu zaraz nie čas zdavacca, asabliva ŭličvajučy dynamiku vajny va Ukrainie. Zaraz čas uzmacniać sankcyi, jašče bolš cisnuć.

Alaksandr Łukašenka spadziajecca, što Jeŭropa zdasca i pojdzie za palitykaj prezidenta Donalda Trampa, maŭlaŭ, kali Amieryka źmiakčaje sankcyi, to i Jeŭropa pavinna źmiakčać. Nie, davajcie padzialać — adno heta humanitarny aśpiekt, inšaje — palityčny składnik i faktar biaśpieki.

— Stratehija Jeŭropy ŭ adnosinach da Biełarusi varjirujecca ad sproby ŭciahnuć minski režym u sudovaje supracoŭnictva da izalacyi režymu praz sankcyi. Ale nivodzin z hetych sposabaŭ nie pracuje. Zaraz pasyłajucca niejkija źmiešanyja sihnały: z adnaho boku, sankcyjny režym dziejničaje, ź inšaha boku, prezident Francyi Emanuel Makron telefanuje Alaksandru Łukašenku. Kali vy kamunikujecie ź jeŭrapiejskimi lidarami, jakuju doŭhaterminovuju stratehiju ŭ adnosinach da Biełarusi vy prapanujecie?

— Hladzicie, całkam jasna, što režym Alaksandra Łukašenki nielehitymny, z-za hetaha byli prymienieny sankcyi. Taki padychod padtrymlivajecca hramadzianskaj supolnaściu, niezaležnymi ŚMI, pravaabaroncami, palityčnymi źniavolenymi i ludźmi, jakija žyvuć u emihracyi. 

Kali havaryć pra doŭhaterminovuju stratehiju, samaje važnaje pytańnie — jak vyciahnuć Biełaruś z zony ŭpłyvu Rasii i viarnuć u šerahi svabodnych, demakratyčnych, suvierennych krain u Jeŭropie. Šmat hadoŭ Biełaruś razhladałasia albo jak prablema z pravami čałavieka, albo jak prydatak da Rasii, jak šeraja zona.

Ale Biełaruś — heta prablema biaśpieki dla Jeŭropy. Biez svabodnaj Biełarusi nie budzie biaśpiečnaj Jeŭropy. Heta prosta aksijoma. Tamu Zachad pavinien budavać svaju stratehiju na niekalkich słupach. Pa-pieršaje, treba zachoŭvać cisk na režym, bo sankcyi vydatna pracujuć. Alaksandr Łukašenka moža prykidvacca, što heta nie tak, ale jany pracujuć. Pa-druhoje, padtrymlivać biełaruskich ludziej, nie dyktatara.

Naohuł, davajcie pierastaniem dumać pra Biełaruś, źviazvajučy jaje tolki z Alaksandram Łukašenkam. Razumieju, što za tryccać hadoŭ usie pryvykli, ale za režymam vielmi karysna bačyć ludziej, jakija dekłaravali imknieńnie da demakratyi ŭ 2020 hodzie i paźniej. My prosim inviestavać u naša hramadstva, niezaležnyja ŚMI, jakija supraćstajać prapahandzie rasijskaha i biełaruskaha režymaŭ, a taksama ŭ kulturu, adukacyju, demakratyčnyja instytuty.

My taksama prosim zachoŭvać suviaź biełarusaŭ ź Jeŭropaj, bo biełarusam treba mieć alternatyvu ruskamu śvietu.

Tryccać hadoŭ Alaksandr Łukašenka ciahnie našu krainu ŭ abdymki Rasii, ale my pavinny ź jeŭrapiejskaha śvietu čuć: «Vy naša častka, my budziem zmahacca za vas, jak zmahajucca za člena siamji, my dapamožam pierarezać pupavinu ad Rasii, bo vy nam patrebny jak kraina, jak nacyja». My chacieli b heta čuć, bo heta nadało b enierhii našamu hramadstvu.

Našaj metaj pavinna być nie dapamahčy Alaksandru Łukašenku ŭ jaho ciažki pieryjad, nie vyratavać jaho ad Uładzimira Pucina, metaj pavinna być vyratavać Biełaruś ad Alaksandra Łukašenki i Uładzimira Pucina. Heta pavinny być stratehičnyja punkty našych sajuźnikaŭ.

Tak, prezident Emanuel Makron telefanavaŭ Alaksandru Łukašenku, ale važna toje, što pierad zvankom my byli prainfarmavany zahadzia. Značyć, našy partniory nie hulajuć u hulni pad dyvanom.

Nam było paviedamlena, što meta zvanka — papiaredzić Alaksandra Łukašenku nie vykarystoŭvać biełaruskuju terytoryju dla niejkaj eskałacyi. Heta nie była lehitymizacyja režymu, pryznańnie, nie narmalizacyja adnosin, heta było prosta papiaredžańnie, bo isnavała imaviernaść, što Biełaruś rychtavałasia da mahčymych pravakacyj.

— Jak vy ličycie, ci moža być, što ŭ dyjałohu z Vašynhtonam Alaksandr Łukašenka dziejničaje nie tolki ŭ svaich intaresach, ale i na karyść Rasii, što testuje nastroi źmiakčyć sankcyi nie tolki Minsku, ale i Maskvie?

— Suviaź Alaksandra Łukašenki i Uładzimira Pucina simbijatyčnaja, jany patrebny adzin adnamu. Spačatku, da harmanizacyi sankcyj, dyzajn sankcyj byŭ dziravym. Bolšaść sankcyj suprać Rasii abmiažoŭvali jaje impart [z Zachadu], a ŭ vypadku Biełarusi — ekspart. Tamu Alaksandr Łukašenka i Uładzimir Pucin skarystalisia hetymi dzirkami. Rasija sapraŭdy zacikaŭlena ŭ tym, kab byli admienieny sankcyi suprać Biełarusi.

Ale Alaksandr Łukašenka jak zaŭsiody hulaje ŭ dvajnuju hulniu — choć i zachoŭvaje łajalnaść Rasii, sprabuje pryvabić Jeŭropu. Tolki znoŭ ža — niama sensu razvažać, čaho Alaksandr Łukašenka choča, što jon dumaje ci jak jon źbirajecca vyžyć.

My pavinny dumać, jak zachavać Biełaruś ad Alaksandra Łukašenki. 

Ščyra kažučy, ja vielmi ŭdziačna Litvie, jakaja vydatna ŭmieje bačyć karcinu, jak Alaksandr Łukašenka hulaje z Zachadam hetyja 30 hadoŭ: jon užyvaje represii, Zachad reahuje, tady jon vykarystoŭvaje charyzmu i palapšaje adnosiny z Zachadam. Potym znoŭ represii i znoŭ palapšeńnie adnosin. Alaksandr Łukašenka pastajanna hulaje ŭ hetuju hulniu. Jon spadziajecca pieražyć lidaraŭ inšych krain. Jość taki ruski termin, jaki apisvaje ludziej, jakija prychodziać i chutka sychodziać, — «vriemienŝiki». Alaksandr Łukašenka — taki nibyta viečny kiraŭnik, jaki spadziajecca, čakaje, što pryjdzie inšy zachodni palityk, inšy lidar, jaki nie budzie kiravacca kaštoŭnaściami.

Zaraz naša zadača — spynić hetaje zahannaje koła, pazbavicca ad režymu. Alaksandr Łukašenka słaby, ludzi jaho nie padtrymlivajuć. Ukraina taksama ciśnie na Biełaruś i ŭ adzin dzień Uładzimir Pucin nie pryjdzie jaho ratavać.

Na dadzieny momant u Jeŭrapiejskim Sajuzie my nie bačym imknieńnia źmianiać palityku ŭ adnosinach da Biełarusi i za heta my vielmi ŭdziačny. Kaniešnie, łabisty Alaksandra Łukašenki aktyvizavali dziejnaść u Jeŭropie. U hetym vypadku vielmi važnaja pazicyja Litvy i Polščy, asabliva Litvy adnosna tranzitu kalijnych uhnajeńniaŭ. Admiena sankcyj ZŠA na kalijnyja ŭhnajeńni nie daje Alaksandru Łukašenku stolki vyhady, kolki zručny tranzit.

My, kaniešnie, prasili amierakanskich partnioraŭ nie cisnuć na jeŭrapiejskija krainy — Litvu, Polšču, Ukrainu, Łatviju — z metaj źmianić palityku pa kalijnych uhnajeńniach tolki tamu, što heta zručna Alaksandru Łukašenku.

Jon pavinien vyzvalić usich palityčnych źniavolenych, spynić represii ŭnutry krainy, pierastać pradastaŭlać biełaruskuju terytoryju dla vajennaj infrastruktury Rasii, jakaja pahražaje Ukrainie i Jeŭropie, spynić lubyja pravakacyi suprać jeŭrapiejskich dziaržaŭ. Tady možna budzie havaryć pra źmianieńnie palityki. Ciapier jon choča atrymać usio sam, nie dajučy ničoha.

— Havoračy pra tranzit kalijnych uhnajeńniaŭ, ZŠA listom źviarnulisia da Polščy, Ukrainy i Litvy ź nie zusim pramoj prapanovaj dazvolić tranzit praz svaje terytoryi abo prynamsi heta razhledzieć. U vypadku Litvy i Polščy dziejničajuć ahulnyja sankcyi Jeŭrapiejskaha Sajuza, jakija zabaraniajuć tranzit uhnajeńniaŭ minimum da lutaha nastupnaha hoda. Što kaža vaša šostaje pačućcio pra toje, što adbudziecca ŭ lutym nastupnaha hoda? Jak vy ličycie, ci nie buduć admienieny sankcyi? Polšča i Litva imknucca zachavać amierykanskich sałdat na svajoj terytoryi, tamu kali pytańnie sankcyj budzie źviazana z sałdatami, Litva i Polšča mohuć vyrašyć inakš.

— Nie dumaju, što pazicyja ZŠA pa kalijnych uhnajeńniach pavinna prymacca jak instrukcyja dla Polščy, Litvy ci Ukrainy. Usie hetyja krainy majuć svaje intaresy biaśpieki. Hetyja krainy lepš za inšych razumiejuć, što značyć žyć pobač z režymam Alaksandra Łukašenki, adčuvajučy nastupstvy zapuščanaj Rasijaj vajennaj mašyny.

Lubyja dyskusii pra admienu sankcyj na kalijnyja ŭhnajeńni pavinny być źviazany z kankretnymi ŭmovami: vyzvalić usich palityčnych źniavolenych, spynić represii, skončyć padtrymlivać rasijskuju ahresiju, skončyć hibrydnyja ataki, takija jak adpraŭka mihrantaŭ praź miažu ci šary, dazvolić adbyvacca źmienam u samoj Biełarusi.

Miesiac tamu ja była ŭ Kijevie i padčas našaj dvuchbakovaj sustrečy prezident Uładzimir Zialenski skazaŭ, što nie źbirajecca dazvalać tranzit kalijnych uhnajeńniaŭ praz Ukrainu.

Ja prapanavała b i inšym krainam salidaryzavacca z Ukrainaj. U advarotnym vypadku źmiakčeńnie sankcyj tolki ŭzmacnić režym i paspryjaje rasijskaj vajennaj mašynie.

Tak, razumieju, što krainy majuć svaje adčuvalnyja pytańni, ale liču, što susiednija ź Biełaruśsiu krainy razumiejuć pahrozy hetaha rašeńnia ŭ budučyni. Ja ŭpeŭniena, što nichto nie pavieryć abiacańniam, jakija daje Alaksandr Łukašenka, bo jon ich vielmi lohka parušaje.

— Vy zhadvali, što Litva siarod krain, jakija vydatna ŭśviedamlajuć pahrozy i sposab dziejańnia režymu Alaksandra Łukašenki. Zaraz u nas źmianiajecca ŭrad, i sapraŭdy davoli šmat dyskutujecca pra palityku ŭ adnosinach da Biełarusi. Naprykład, budučy premjer Mindaŭhas Sinkiavičus ličyć, što sankcyi nie źjaŭlajucca samametaj, što jany pavinny źmianiać pavodziny aŭtarytarnaha režymu, ale ŭ hetym vypadku nie źmianiajuć. Pakul jon nie prapanavaŭ źmien, ale pamiž radkoŭ možna vydatna zrazumieć, što jon nie ŭpeŭnieny, ci źjaŭlajucca sankcyi lepšym sposabam upłyvać na režym. Tamu chaču spytać, ci ŭpeŭnieny vy, što pazicyja Litvy adnosna sankcyj suprać Biełarusi nie źmianiajecca ci nie źmienicca?

— Najpierš ja chacieła b padziakavać prezidentu Hitanasu Naŭsiedu, ministru zamiežnych spraŭ Kiastucisu Budrysu, staršyni Siejma Juozasu Olekasu, premjer-ministru Inzie Ruhinienie i litoŭcam za jasnuju pazicyju ŭ adnosinach da režymu. Budučamu premjeru Mindaŭhasa Sinkiavičusu žadaju sfarmavać mocny ŭrad i im ćviorda kiravać, taksama spadziajusia, što novy ŭrad praciahnie pryncypovuju palityku ŭ adnosinach da Biełarusi, bo heta ŭklučaje i intaresy nacyjanalnaj biaśpieki Litvy.

Biaśpieka Litvy nie moža być poŭnaj, pakul Alaksandr Łukašenka zastajecca va ŭładzie ŭ Biełarusi. Režym užo pieratvaryŭ maju krainu ŭ pahrozu dla susiedziaŭ. Ja mahu pieraličvać i pieraličvać: heta i pradastaŭleńnie terytoryi dla rasijskaj ahresii suprać Ukrainy, stvareńnie rasijskaj vajennaj infrastruktury ŭ Biełarusi, abjava pra dysłakacyju jadziernaj zbroi ŭ Biełarusi, pravakacyi na miežach. Pakul Biełaruś budzie zastavacca ŭ rasparadžeńni kramloŭskaha dyktatara, da taho času Litva nie budzie ŭ biaśpiecy, buduć praciahvacca pahrozy, šantaž i pravakacyi. Dla Alaksandra Łukašenki heta sposab vyžyć, a dla Uładzimira Pucina — cisnuć na Jeŭropu. Mienavita tamu demakratyčnaja, suvierennaja Biełaruś — heta nie tolki naša, biełarusaŭ, meta, ale taksama harant biaśpieki dla Litvy.

Spadziajusia, što budučy ŭrad Litvy zachavaje pierajemnaść palityki. My vielmi cenim doŭhaterminovuju jasnuju, pryncypovuju i zasnavanuju na kaštoŭnaściach pazicyju Litvy. Ale, viadoma, łabisty Alaksandra Łukašenki vypraboŭvajuć unutranaje adzinstva krain Jeŭrapiejskaha Sajuza i Litvy, padymajuć roznyja histaryčnyja aśpiekty i imknucca źniščyć imidž biełaruskich demakratyčnych sił. Adnak my pavinny dumać pra doŭhaterminovyja mety.

— Kažacie, što spadziejaciesia, što novy ŭrad Litvy praciahnie pryncypovuju i jasnuju palityku ŭ adnosinach da Biełarusi. Ale ci vierycie vy sama, što praciahnie i ničoha nie źmienicca?

— Litva — moj druhi dom. Ja sama i inšyja biełarusy radujemsia padtrymcy Litvy i vykazanaj salidarnaści. U histaryčnyja časy my žyli ŭ sumiesnaj dziaržavie — Vialikim Kniastvie Litoŭskim. Ja prosta vieru ŭ litoŭskich ludziej, litoŭskuju palityku, vieru, što litoŭskija lidary razumiejuć stratehičnuju važnaść svabodnaj i demakratyčnaj Biełarusi.

Razumieju, što roznyja ludzi majuć roznyja mierkavańni. Prezident, staršynia siejma ci ministr zamiežnych spraŭ mohuć pa-roznamu hladzieć na situacyju, ale ž u demakratyjach vyrašaje nie adna asoba. Naša zadača — raskryć naša razumieńnie litoŭskamu hramadstvu, pradstaŭnikam urada ci siejma, čamu jasnaja pazicyja Litvy ŭ adnosinach da Biełarusi adpaviadaje intaresam biaśpieki samoj Litvy. My nie vyrašajem za Litvu, my tolki chočam raskryć svoj punkt hledžańnia.

— Vaš hałoŭny ofis raniej byŭ u Vilni, adnak, reahujučy na rašeńnie Litvy pamienšyć uzrovień achovy vašaj asoby, vy pieranieśli dziejnaść hałoŭnaha ofisa ŭ Varšavu. Z momantu pieranosu dziejnaści ŭ Polšču prajšło ŭžo trochi času, moža, vy možacie raskazać pra hetaje rašeńnie? Akramia taho, vam užo druhi raz daviałosia źmianiać krainu pražyvańnia — pavinna być nialohka. Moža, vy možacie padzialicca svaim adčuvańniem nakont hetaha?

— Jak ja ŭžo kazała, Vilnia i Litva stali maim druhim domam, biaśpiečnaj havańniu dla mianie i majoj siamji. Viadoma, było davoli ciažka pakidać Litvu, dzie ja žyła piać hadoŭ. Maja dačka ŭ Litvie za svajo žyćcio žyła daŭžej, čym u Biełarusi. Ale nie chaču stvarać palityčnuju dramu. My zmahli znajści bałans pamiž Varšavaj i Vilniaj, prystasavali svaju pracu da novaj realnaści.

Litva zrabiła vielmi šmat na karyść biełarusaŭ: nie tolki pryniała demakratyčnyja siły, dała biaśpieku tym, chto byŭ vymušany źjechać, pryniała pradstaŭnikoŭ našaj hramadzianskaj supolnaści, pradstaŭnikoŭ niezaležnych ŚMI i tysiačy prostych ludziej. My, biełarusy, budziem viečna za heta ŭdziačny.

U toj sama čas naša dziejnaść pašyryłasia, a Varšava — adzin z najvažniejšych centraŭ biełaruskaj hramadzianskaj dziejnaści, dzie pražyvaje šmat byłych palityčnych źniavolenych, pradstaŭnikoŭ ŚMI i padobnaje. Tamu ŭ Varšavie my stvaryli paŭnavartasny ofis, a ŭ Vilni ofis taksama praciahvaje svaju aktyŭnuju dziejnaść, bo była zachavana akredytacyja dypłamatyčnaha pradstaŭnictva.

Naprykład, ofis u Vilni nie tak daŭno arhanizavaŭ sustreču ministra zamiežnych spraŭ Litvy Kiastucisa Budrysa i arhanizacyj biełaruskaj hramadzianskaj supolnaści, taksama byŭ adkryty infarmacyjny punkt Rady Jeŭropy dla biełarusaŭ, u čym i ja sama ŭdzielničała. Niadaŭna padčas našaha nacyjanalnaha śviata kala Siejma my ŭźniali bieła-čyrvona-bieły ściah, a ja sustrakajusia sa šmatlikimi partniorami i palitykami, jakija pryjazdžajuć z pracoŭnymi vizitami ŭ Litvu.

Kali havaryć pra pryvatnaje žyćcio, to maja siamja taksama prystasoŭvajecca. Viadoma, źmianić krainu zaŭsiody ciažka. Padobna było i tady, kali daviałosia pakinuć Biełaruś. Radujusia, što ź situacyjaj udałosia spravicca hodna: praciahvajem pracu ŭ Litvie, zrabili novy krok u Polščy. Samaje važnaje, kab pazicyja Litvy [u adnosinach da biełaruskaha režymu] zastavałasia takoj samaj.

— Na vašu dumku, ci źjaŭlajecca rašeńnie Litvy nie praciahvać achovu vam na takim uzroŭni, jaki byŭ, palityčnym?

— Ciažka skazać. My razumiejem, što z prychodam novaha ŭrada da ŭłady, jon pierahladzieŭ padychod da biaśpieki. Ja heta razumieju. Nie mahu dyktavać uradu, što rabić ci čaho nie rabić. Naša zadača była zreahavać na novuju situacyju jak maha bolš efiektyŭna i biazbolna.

— Vy, jak lidarka biełaruskaj apazicyi, uźnialisia paśla sfalsifikavanych prezidenckich vybaraŭ u 2020 hodzie. Paśla hetych vybaraŭ prajšło davoli šmat času, i davodzicca čuć hałasy, što vaš mandat nibyta źnik. Napeŭna, i vam davodzicca čuć takija mierkavańni. Pakolki ŭ hety čas pravieści svabodnyja vybary ŭ Biełarusi niemahčyma, jak vy dumajecie, jak možna było b nanova atrymać mandat sił biełaruskaj apazicyi na lidarstva?

— Najpierš ja ŭdziačna mižnarodnym partnioram, što jany nie pryznajuć Alaksandra Łukašenku jak lehitymnaha lidara Biełarusi navat i paśla tak zvanych vybaraŭ 2025 hoda.

Dumku, što moj mandat nibyta źnik, bolš za ŭsio sprabuje siejać prapahanda KDB. Jany sprabujuć pieravieści razmovu ź nielehitymnaha statusu Alaksandra Łukašenki paśla 2020 hoda na proźvišča Śviatłany Cichanoŭskaj. Heta vielmi jasny sihnał, što jany razumiejuć, što biełaruskaje hramadstva dalej nie bačyć Alaksandra Łukašenku jak lidara, što ludzi nie zdajucca i dalej zmahajucca.

U našaj situacyi ŭ hety čas niemahčyma pravieści svabodnyja i spraviadlivyja vybary. Ščyra kažučy, pracujučy štodnia, ja adčuvaju padtrymku biełaruskich ludziej, ale heta nie padtrymka majoj asoby, a idej, bačańnia volnaj i niezaležnaj Biełarusi, jeŭrapiejskaj Biełarusi, dzie pravodziacca vybary i jakaja padtrymlivaje Ukrainu.

Mahu jasna skazać: kali buduć praviedzieny svabodnyja i spraviadlivyja vybary, ja ŭ ich udzielničać nie budu. Tamu nie treba budzie kankuryravać, miesca pad soncam chopić usim palitykam, usie zmohuć nabrać palityčnyja bały. Prosta pole dziejnaści hihanckaje i na arenu treba pryciahnuć novyja tvary, kab ludzi ŭ budučyni mahli vybirać.

Ale zaraz nie čas kankuryravać, zaraz my pavinny zachoŭvać adzinstva, kab pieramahčy dyktatara. 

— Jak vy ličycie, što adbudziecca ŭ Biełarusi, kali nie stanie Alaksandra Łukašenki? Jon davoli pažyły i paduładny naturalnym bijałahičnym pracesam. Z vašaha punktu hledžańnia, što tady adbudziecca ŭ Biełarusi? Ci moža režym sa svajoj strukturaj utrymacca biez Alaksandra Łukašenki? A mo adrazu pačnie adbyvacca praces demakratyzacyi?

— Zvyčajna ŭsie dyktatary rana ci pozna rušacca. Heta adbyvajecca tady, kali ŭsie mienš za ŭsio hetaha čakajuć. Naša zadača — padrychtavacca da hetaha momantu. Alaksandr Łukašenka moža źniknuć pa mnostvie pryčyn.

Ale režym — heta nie tolki Łukašenka, heta sistema, jakuju jon budavaŭ tryccać hadoŭ. My viedajem, što navat ludzi sistemy stamlajucca ad Łukašenki. Tamu my prapanujem asobam, jakija naležać da sistemy, dyskusii, pieramovy, pracavać razam, kab zachavać suvierenitet Biełarusi. Łukašenka ŭžo zhulanaja karta. Jaho nie chvaluje Biełaruś, nie chvaluje nacyja, nacyjanalnaja identyčnaść — jon prosta choča palityčna vyžyć.

Ludzi vakoł jaho taksama šepčucca, što budzie paśla Alaksandra Łukašenki, tamu jon tak mocna baicca mieć kala siabie mocnuju fihuru, jaka mahła b stać jaho pierajemnikam. Jon amal nikoha nie pavyšaje. Mnohija ličać, što budzie pryznačany lidar režymu, ale Alaksandr Łukašenka strašenna baicca, što ŭvaha pieraklučycca ź jaho, tamu sprabuje pakazać, jaki jon mocny i śmieły. Ale, kali pryjdzie čas, kala Alaksandra Łukašenki jość ludzi, jakija zmohuć sieści i razmaŭlać. Mahčyma, razam my zmožam pravieści svabodnyja vybary, pačać nieabchodnyja reformy, źmianić Kanstytucyju i ŭsio pavinna budzie rabicca vielmi chutka.

U hety čas Alaksandr Łukašenka moža vyžyvać dziakujučy padtrymcy Rasii. Adnak z-za novaj dynamiki vajny Ukrainy i Rasii, z-za palityki Ukrainy ŭ adnosinach da Biełarusi jon apynuŭsia ŭ pastcy. My pavinny padtrymlivać cisk.

Kaniešnie, jość ludzi ŭnutry režymu Alaksandra Łukašenki, jakija buduć padtrymlivać jaho da kanca. Bolš za ŭsio my havorym pra aparat biaśpieki, tych ludziej, jakija ŭciahnulisia ŭ represii, katavańni, rasijskuju ahresiju suprać Ukrainy. U novaj Biełarusi jany pavinny buduć adkazać za heta.

Ale zaraz treba cisnuć na režym, uzmacniać demakratyčnyja siły, prymusić ludziej z namienkłatury dumać pra novyja kroki, jakija my prapanujem. U čas źmien budzie tolki dva šlachi — Rasii i Jeŭropy. My pavinny dasiahnuć taho, kab šlach, jaki prapanuje Jeŭropa, biełaruskim ludziam macniejšym za rasijski. Dziela hetaha my i pracujem ź jeŭrapiejskimi partniorami.

• 16
• 0
• 0
• 2
• 0
• 0
• 0
• 0