Načny rakietny ŭdar pa Biełharadzie — atakavana pradpryjemstva «Hazprama», u horadzie prablemy sa śviatłom i vadoj
U noč na 7 lipienia rasijski Biełharad i vobłaść trapili pad masiravany rakietny ŭdar. U vyniku ataki ŭ rehijonie paškodžana infrastruktura, pačalisia pažary, a častka horada zastałasia biez elektra– i vodazabieśpiačeńnia.
Časova vykonvajučy abaviazki hubiernatara Alaksandr Šuvajeŭ paviedamiŭ, što ŭ Biełharadzie adbyłosia zaharańnie na adnym z pramysłovych abjektaŭ, u vyniku abstrełu try čałavieki atrymali ranieńni, adzin čałaviek zahinuŭ.
Jak udakładniajuć manitorynhavyja kanały, adnym z asnoŭnych abjektaŭ ataki stała Biełharadskaje liniejnaje vytvorčaje ŭpraŭleńnie mahistralnych hazapravodaŭ (ŁVUMH). Hetaje pradpryjemstva źjaŭlajecca filijałam «Hazpram transhaza» i adkazvaje za ekspłuatacyju mahistralnych hazapravodaŭ i bieśpierabojnuju pastaŭku pryrodnaha hazu spažyŭcam u Biełharadskaj vobłaści.
Na terytoryi abjekta paśla vybuchaŭ uspychnuŭ bujny pažar.
Paralelna z hetym maštabnaja ataka bieśpiłotnikaŭ u noč na 7 lipienia była i ŭ Maskoŭskim rehijonie. Mer Maskvy Siarhiej Sabianin zajaviŭ, što ź viečara da 6 hadzin ranicy ŭ kirunku stalicy lacieli bolš za 430 BPŁA. Pavodle jaho słoŭ, bolšaja častka dronaŭ była niejtralizavana na dalokich podstupach, a 36 bieśpiłotnikaŭ siły SPA źniščyli niepasredna na padlocie da Maskvy.
Kamientary