Kab vypravić prykus, biełaruska rašyłasia na raśpiłoŭvańnie skivicy — i nie paškadavała. Ale vynieści takuju apieracyju zmoža nie kožny
Za tym, jak Viktoryja ruchajecca da svajoj mary — vypraŭleńnia prykusu — sačyli 18 tysiač jaje padpisantaŭ. Dziaŭčynie ŭ litaralnym sensie słova raśpiłavali i pierakroili skivicu.
Niahledziačy na toje, što apieracyja adbyłasia ŭsiaho miesiac tamu i błohierka jašče znachodzicca ŭ pracesie ciažkaj reabilitacyi, užo možna acanić, jak nievierahodna źmianiŭsia jaje tvar i nakolki stała praściej dychać.
Ź dziacinstva ŭ Viktoryi hłyboki dystalny prykus — jaje padbarodździe zaŭsiody było padcisnutym, a vierchniaja skivica mocna vystupała napierad. Heta nie tolki adbivałasia na źniešnim vyhladzie. Niapravilny prykus krytyčna zvuziŭ dychalnyja šlachi, što pryvodziła da zadyški navat padčas chadźby, a nočču pravakavała chrap. Upłyvaje takaja asablivaść i na postać — kali šyju zaŭsiody ciahnie napierad, cieła imkniecca heta kampiensavać. Jak nastupstvy — stałyja spazmy i boli.
Da taho ž, pastajanny niedachop kisłarodu ŭ arhaniźmie robić imunitet słabiejšym i moža skaracić žyćcio čałavieka praz rana zapuščanyja pracesy stareńnia.
Ale i heta jašče nie ŭsio: sami zuby ŭ niapravilnym pałažeńni chutka ścirajucca.
«Praz mocnuju azyzłaść mianie časam nazyvali ałkaškaj, dumajučy, što ja pju pa-čornamu», — pryznajecca Viktoryja. «Z padletkavaha ŭzrostu ŭ mianie ŭžo sfarmavalisia nasahubnyja zmorščyny, acioki, druhi padbarodak, a taksama sam «ptušyny profil». Mienavita tamu nieznajomcy dumali, što ja na hadoŭ 5‑10 starejšaja. Kali b nie apieracyja, u 35 hadoŭ u mianie b užo mahli być bryli».
Biełaruska ŭ minułym sprabavała nasić brekiety, ale jany nie prynieśli nijakaha efiektu, bo imi kostku nie vyraściš i nie adkroiš. Da taho ž, retejniery, jakija pavinny byli ŭtrymlivać zuby ŭ karektnym pałažeńni, u situacyi Viki prosta łopalisia.
Ale pierad apieracyjaj dziaŭčynie ŭsio roŭna pryjšłosia adnasić ełajniery, kab padraŭniać zubny šerah. Dadatkova jana naviedvała fizijaterapieŭta, jaki dapamahaŭ adnavić ciahličny tonus i źniać sa skivicy napružańnie. Ełajniery abyšlisia Viktoryi ŭ piać tysiač dalaraŭ.
U dzień Ch chirurhi raśpiłavali dziaŭčynie skivicu — vierchniuju pry hetym vysunuli napierad na čatyry milimietry, a nižniuju ažno na 19. Dadatkova joj rabili hienijapłastyku — chirurhičnuju apieracyju pa źmienie formy i pamieru padbarodka.
Pracedura ciahnułasia pad narkozam čatyry hadziny. Paśla jaje pacyjentcy minimum dva miesiacy nielha zajmacca fizičnymi aktyŭnaściami i ŭžyvać lubuju ježu, jakuju treba žavać — usie pradukty varta blendaryć. Dalej minimum jašče na čatyry miesiacy varta admovicca ad ćviordaj ježy.
U chirurhičnym umiašańni ŭ skivicu jość i svaje pabočki. Tak, paśla apieracyi prapadaje adčuvalnaść padbarodka i nižniaj huby. Zvyčajna ciaham hoda jana adnaŭlajecca, ale ŭ niekatorych ludziej nie da kanca — tolki na 50-70%. Byvajuć vypadki, kali čullivaść nie viartajecca zusim.
Biełaruska žyvie ŭ Polščy, i takaja apieracyja tut kaštuje kala 9 tysiač dalaraŭ. Ale pry najaŭnaści dziaržaŭnaj strachoŭki ŭsio adbyvajecca biaspłatna, bo heta pytańnie zdaroŭja, a nie vyklučna estetyki. Praŭda, sama padrychtoŭka da pracedury i reabilitacyja apłačvajucca z kišeni pacyjentaŭ.
Tamu, naprykład, za dyjahnostyku i imitacyju apieracyi na kampjutary ŭ 3D, kab usio praličyć, Viktoryja addała dadatkovyja dźvie tysiačy dalaraŭ.
Užo praź miesiac paśla dnia Ch Viktoryja vyhladaje zusim inakš — u jaje całkam źmianiŭsia avał tvaru, jana stała valniej dychać i pierastała chrapci. Navat nos ciapier vyhladaje inakš. Finalny vynik stanie dastupny niedzie praz hod, ale ŭžo siońnia Viktoryja nie chavaje radaści ad pieramien, pry tym što šlach da ich byŭ vielmi składanym i doŭhim.
Ciapier čytajuć
Biełaruś užo nie tolki pra palitviaźniaŭ. Z čym Śviatłana Cichanoŭskaja pajechała na adzin z hałoŭnych forumaŭ pa biaśpiecy ŭ ZŠA i što tam rabiŭ Siarhiej Cichanoŭski2121
Kamientary