Biełarus vyhryz kvateru pamierłaj svajački ŭ Pieciarburhu, choć stajaŭ u šostaj čarzie spadčyńnikaŭ
U sudzie vyśviatlali, chto pamior raniej, jana ci jaje muž, choć trupy ŭžo raskłalisia.
Maskoŭski rajonny sud Sankt-Pieciarburha pastaviŭ kropku ŭ praciahłaj sudovaj spravie, hałoŭny pryz jakoj — 45‑mietrovaja kvatera na Leninskim praśpiekcie Sankt-Pieciarburha koštam prykładna $65—70 tysiač — urešcie dastaŭsia dvaim dalokim svajakam niabožčycy, adzin ź jakich — hramadzianin Biełarusi z Kryčaŭskaha rajona Mahiloŭščyny.
U červieni 2022 hoda ŭ pieciarburhskaj kvatery znajšli cieły žančyny i jaje muža — abodva pamierli prykładna ŭ adzin i toj ža čas, ale praz mocnaje raskładańnie sudova-miedycynskaja ekśpiertyza nie zmahła vyznačyć, chto ź ich pajšoŭ z žyćcia raniej.
Ale heta akazałasia hałoŭnym pytańniem spravy: kali b muž pieražyŭ žonku choć na dzień, jon paśpieŭ by stać jaje spadčyńnikam, i kvatera paśla jaho śmierci dastałasia b jaho dačce ad inšaha šlubu — mienavita jana spačatku sprabavała zabrać žyllo sabie.
Tym nie mienš sud vyrašyŭ, što muž i žonka pamierli adnačasova — a takija ludzi pavodle zakona nie majuć prava na spadčynu. Takim čynam dačka muža zastałasia zusim biez pretenzij na kvateru.
Tym časam na spadčynu pretendavali biełarus z Kryčaŭskaha rajona i jaho stryječny brat-hramadzianin Rasii — abodva nazyvali siabie stryječnymi plamieńnikami niabožčycy, synami jaje stryječnaha brata. Dakazać rodnaść aficyjna było niemahčyma: davajenny archiŭ aktaŭ hramadzianskaha stanu ŭ Kryčaŭskim rajonie nie zachavaŭsia, i sudu daviałosia ŭstanaŭlivać svajactva ŭskosna — praz adnolkavyja imiony i proźviščy prodkaŭ u roznych dakumientach i supadzieńnie miesca naradžeńnia. Pry hetym pavodle Hramadzianskaha kodeksa Rasii stryječnyja plamieńniki ličacca spadčyńnikami tolki šostaj čarhi — samaj dalokaj katehoryi rodnaści, jakaja naohuł maje prava na spadčynu biez zaviaščańnia. I atrymlivajuć jaje tolki kali bližejšych spadčyńnikaŭ prosta niama.
U vyniku sud pryznaŭ abodvuch zajaŭnikaŭ zakonnymi spadčyńnikami i padzialiŭ kvateru paroŭnu — pa 1/2 doli kožnamu, u tym liku biełarusu z Kryčaŭščyny.
Prapahanda pryčapiłasia da «darahoha» hadzińnika Łatuški. Toj raskazaŭ, što heta za madel nasamreč36
Kamientary