Sabalenku ŭ Minsku achoŭvała kampanija, zasnavanaja byłym hebistam i ŭčastkovym. Na piarednim krai byŭ lehiendarny Ivanyč
Pieršaja rakietka śvietu Aryna Sabalenka naviedała Minsk 14 lipienia. Jana prybyła na pryvatnym samalocie sa svaim žanichom Hieorhiasam Franhulisam i sabakam Ešam. Na adkryćcio korta ŭ Minsku i sustreču z fanatami tytułavanaja spartsmienka pryjšła ŭ supravadžeńni siami ciełaachoŭnikaŭ. Jak vyśvietliła «Lusterka», heta supracoŭniki pryvatnaj minskaj kampanii «Ahienctva biaśpieki i biznesu».
Adzin z achoŭnikaŭ vyklikaŭ abureńnie ŭ sacsietkach — jon išoŭ napieradzie i adsoŭvaŭ dziaciej ad Sabalenki, nie dajučy im dakranucca da tenisistki. U im apaznali Anatola Siemaščuka — lehiendarnaha siekjuryci Ivanyča, jaki achoŭvaŭ takich suśvietnych znakamitaściaŭ, jak Łara Fabijan, ZAZ, Scorpions i mnohich inšych zorak, što pryjazdžali ŭ Biełaruś.
Chto taki Ivanyč?
Šmatlikija naviedvalniki kancertaŭ u Minsku bačyli strohaha i chmuraha achoŭnika, jaki znachodziŭsia kala zorak. Ale sapraŭdnaja słava da Anatola Siemaščuka pryjšła ŭ 2019 hodu. Tady 49‑hadovy achoŭnik daŭ pieršaje intervju, u jakim raskazaŭ pra svaju pracu. Mužčynu prazvali Ivanyčam i zaprašali achoŭvać papularnych zorak, jakija pryjazdžali ŭ Minsk.
Tak, jon byŭ ciełaachoŭnikam Alaksandra Rybaka, francuzskaj śpiavački ZAZ, kanadskaha śpievaka Haru (artysta ź miuzikła «Notr-Dam-de-Pary») i bielhijska-kanadskaj vykanaŭcy Łary Fabijan.
Achoŭvaŭ jon taksama hurty A-HA i Scorpions.
Pracavaŭ Ivanyč i z rasijskimi zorkami. Naprykład, ź lidaram hurta DDT Juryjem Šaŭčukom. Darečy, u intervju za 2019 hod jon jaho vielmi chvaliŭ: «Razumny, cikavy čałaviek, jaki padtrymaje razmovu na lubuju temu».
A taksama pracavaŭ z Valeryjem Mieładze, Ałaj Puhačovaj, Vieraj Brežnievaj, Śviatłanaj Łabadoj, Jołkaj i inšymi.
Siarod jaho padapiečnych taksama byli viadučyja Juryj Dudź, Leanid Jakubovič, akciory Siarhiej Biazrukaŭ i Renata Litvinava.
Ź biełaruskich sielebryci Ivanyč achoŭvaŭ Siarhieja Michałka, Hieorhija Kałduna, Uładzimira Puhača, komika Idraka Mirzalizade, błohieraŭ Ułada Bumahu i Ułada Kabiakova i mnohich inšych.
Spartsmieny ŭ jaho pracy taksama byli. Naprykład, rasijski bijatłanist Alaksandr Cichanaŭ i biełaruski futbalist Alaksandr Hleb.
«V Instagram 99% fatahrafij z tymi zorkami, z kim ja adpracavaŭ jak asabisty achoŭnik. Heta nie zdymki kštałtu: «Oj, dziadźka, možna z vami sfatahrafavacca», — raskazvaŭ Siemaščuk u 2019-m. — Mnohija z tych artystaŭ, chto pryjazdžaje ŭ Biełaruś pastajanna, užo śpiecyjalna prosiać, kab ź imi pracavaŭ tolki ja».
Jon śćviardžaŭ, što nie choča panibrackich adnosin z zorkami i tamu admaŭlajecca ad roznych afterpaci, na jakija jaho rehularna kličuć.
«Časam davodzicca zmanić, što doma čakaje žonka, maŭlaŭ, jana nie zrazumieje. Choć heta nie tak. Ja ŭ razvodzie», — dzialiŭsia Anatol i dadavaŭ, što žyvie adzin.
Užo ŭ 2025 hodzie ŭ padkaście «Podrobnieje» Ivanyč raskazvaŭ, što, akramia achovy, jašče zdymajecca ŭ kino (u asnoŭnym heta rasijskija sieryjały), rekłamie i klipach. Tak, jon zaśviaciŭsia ŭ klipie hurta ŁSP.
Słužyŭ u PDV, supracoŭničaŭ ź izrailskaj raźviedkaj
Pra miesca svajoj pracy Ivanyč ni tady, ni ŭ bolš poźnich intervju nie raspaŭsiudžvaŭsia. Pavodle danych Belpol, mužčyna nie słužyŭ u siłavych strukturach. Sam Anatol śćviardžaŭ, što nabiraŭsia vopytu, supracoŭničajučy z roznymi raźviedkami.
— Pracavaŭ va ŭzajemadziejańni i ź izrailskaj słužbaj biaśpieki, i z kamitetam, i z SBP, z usimi strukturami, jakija tolki jość i isnujuć. Voś. Byŭ vielmi dobry vopyt. Vielmi šmat usiaho cikavaha daviedaŭsia ad ich, ad kožnaha patrochu. I na vychadzie voś ja taki i atrymaŭsia, jak Ivanyč», — kazaŭ mužčyna ŭ padkaście «Podrobnieje».
Jon adznačyŭ, što jahony baćka słužyŭ u milicyi, a rodnyja pa matčynaj linii byli vajskoŭcami. Sam jon raskazaŭ, što słužyŭ u PDV i zajmaŭsia boksam.
Pavodle danych Belpol, da 2019 hoda Siemaščuk prapracavaŭ achoŭnikam u kampanii «Minsk Prynces Hatel», jakaja naležała tureckamu chołdynhu «Irada». Kampanija vałodaje hatelem Crowne Plaza.
Potym mužčyna niejki čas byŭ dyrektaram kampanii «EkaTrejdInviest», jakaja zajmajecca pierakładami na zamiežnyja movy, a taksama aptovym handlem praduktami charčavańnia.
Taksama ŭ adkrytych krynicach «Lusterka» znajšło IP na poŭnaha ciozku Siemaščuka, zarehistravanaje ŭ 1993 hodzie. Mahčyma, jon akazvaŭ pasłuhi achovy jak indyvidualny pradprymalnik. Ale ŭ 2024 hodzie IP zakryłasia.
Ciapier Ivanyč kiruje kirunkam «Administracyjny kantrol» u kampanii «Ahienctva biaśpieki i biznesu». Tamu Siemaščuk razam ź siamiu svaimi padnačalenymi i achoŭvaŭ Sabalenku.
«Ja ŭkładaju vielmi šmat u navučańnie, choć niekatoryja kažuć, što darma heta rablu — to-bok heta treba rabić za vialikija hrošy, rychtavać ludziej, bo tyja ludzi, jakich ja padrychtuju, siaduć mnie na piatki, i na vychadzie ja stanu niezapatrabavanym, a jany buduć užo rulić mnoj. U mianie troški inšaje bačańnie. Toje, što ja ŭkładaju ŭ ludziej, niezaležna ad taho, heta chłopcy ci dziaŭčaty, — heta naša ahulnaja biaśpieka. I maja, i supracoŭnikaŭ, jakija prychodziać na pracu, i haściej», — kazaŭ Ivanyč.
Kolki mahli kaštavać pasłuhi Ivanyča i jaho padnačalenych, nieviadoma. Prajsa na sajcie kampanii niama, a ŭ intervju 2025 hoda Anatol ahučvaŭ tolki prybliznyja sumy. Pavodle jaho słoŭ, apłata zaležyć ad uzroŭniu zorki i miescaŭ, u jakich jana źjaŭlajecca.
«Ad dziesiaci dalaraŭ da biaskoncaści za hadzinu, — raskazvaŭ Ivanyč. — Voś adzin z prykładaŭ: za try dni pracy z čałaviekam ja zarabiŭ 1200—1300 dalaraŭ. Za try dni».
Što tyčycca palityčnaj pazicyi, to jaje ŭ svaim Instagram mužčyna nie vykazvaje. Pry hetym jon publikavaŭ fota z Usiebiełaruskaha narodnaha schodu ŭ 2024 hodzie i «Kaladnaha turniru na pryzy Łukašenki» ŭ 2015-m.
Što za ahienctva achoŭvała Sabalenku?
«Ahienctva biaśpieki i biznesu» (pryvatnaje ŭnitarnaje pradpryjemstva «PratatypHrup») źjaviłasia ŭ Biełarusi 14 lutaha 2020 hoda. Zasnavalniki — Dźmitryj Astapovič i Viktar Čaravaška. Abodva — ź siłavym minułym.
Astapovič — uradženiec Kobryna, jaki pierajechaŭ z baćkami ŭ Babrujsk. Jon ź siamji siłavikoŭ: mama była śledčaj, baćka — opierupaŭnavažanym u miascovaj milicyi.
Sam Dźmitryj advučyŭsia na jurfaku i čatyry hady, z 2007‑ha pa 2011-ty, pracavaŭ učastkovym u Leninskim RUUS Babrujska. Pavodle danych Belpol, jaho zvolnili adtul za prahuły, a da hetaha ŭ jaho byli dyscyplinarnyja spahnańni. Praŭda, pavodle słoŭ pradstaŭnika arhanizacyi Uładzimira Žyhara, jaho sprava vyhladaje jak typovaja sprava maładoha ŭčastkovaha, jakoha pierahruzili pracaj, i jon «pakłaŭ ksivu na stoł».
Jak pryznavaŭsia sam Astapovič, praź niekatory čas paśla sychodu ź siłavych struktur jon zaniaŭsia biznesam. Spačatku zdavaŭ u arendu vodnyja šary — akvazorby, ale pradaŭ biznes. Potym adkryŭ kampaniju, jakaja zajmałasia ci nie ŭsim čym možna: ad dobraŭparadkavańnia mohiłak da aptovaha handlu.
Paźniej mužčynu zaprasili papracavać u Rasiju, u «picierskaje ahienctva biaśpieki ŭ biznesie». Sam Astapovič pryznavaŭsia, što ahienctva akazvała roznyja pasłuhi: ad prostaha kansultavańnia da supraćstajańnia rejdarskim zachopam.
Užo z nazapašanym u Rasii vopytam eks-učastkovy viarnuŭsia ŭ Biełaruś, kab adkryć tut svaju spravu. Jamu ŭ hetym dapamoh Viktar Čaravaška — były supracoŭnik Upraŭleńnia KDB pa Minsku i Minskaj vobłaści.
Pavodle danych Belpol, Čaravaška pajšoŭ ź siłavych struktur u 2014 hodzie, zatym pracavaŭ u słužbie biaśpieki «Źniešekanambanka». Na sajcie «Ahienctva biaśpieki i biznesu» paznačana, što ŭ Viktara — bolš za 17 hadoŭ «paśpiachovaha praktyčnaha vopytu ŭ śfiery karparatyŭnaj biaśpieki».
Cikava, što «PratatypHrup» naležyć i detektyŭnaje ahienctva «Astap i partniory». Im taksama kiruje Astapovič. Darečy, na sajcie kampanii paznačana, što jon — vice-prezident Mižnarodnaj asacyjacyi detektyvaŭ IAPD pa Respublicy Biełaruś.
Śpiektr pasłuh ahienctva raznastajny: ad infarmacyjnaj biaśpieki i achovy abjektaŭ da markietynhu i kiravańnia aktyvami. Asobna prapisana, čym kampanija dakładna nie zajmajecca. Heta prablemy klijenta, źviazanyja z palitykaj, ustanoŭka «žučkoŭ», uzłom elektronnych pryład, sajtaŭ i sacsietak, umiašańnie ŭ asabistaje žyćcio i hetak dalej.
U internecie ŭžo pradajuć učorašni aŭtohraf Sabalenki
«Za paŭhadziny — 350 aŭtohrafaŭ». Jak Aryna Sabalenka adkryvała ŭ Minsku tenisnyja korty
Aryna Sabalenka vyjšła da minčukoŭ u atačeńni vaśmi achoŭnikaŭ VIDEA
Voś na jakim samalocie Aryna Sabalenka i Hieorhijas Franhulis prylacieli ŭ Minsk
Aryna Sabalenka z žanichom i sabakam prylacieli ŭ Minsk čartarnym rejsam. Ich sustreli narodnymi tancami i karavajem
Ciapier čytajuć
20‑hadovuju dziaŭčynu z ahraharadka Makrany na miažy z Ukrainaj asudzili za Hajuna5
20‑hadovuju dziaŭčynu z ahraharadka Makrany na miažy z Ukrainaj asudzili za Hajuna
Biełaruś užo nie tolki pra palitviaźniaŭ. Z čym Śviatłana Cichanoŭskaja pajechała na adzin z hałoŭnych forumaŭ pa biaśpiecy ŭ ZŠA i što tam rabiŭ Siarhiej Cichanoŭski1818
Kamientary