Jeŭrapiejski centralny bank pradstaviŭ dziesiać varyjantaŭ afarmleńnia budučych banknot jeŭra. Jany abjadnanyja ŭ dźvie tematyčnyja sieryi — «Jeŭrapiejskaja kultura» i «Reki i ptuški», piša Bloomberg.
Prezidentka JECB Kryścin Łahard paviedamiła, što žychary krain jeŭrazony mohuć prahałasavać za ŭpadabany dyzajn da 21 vieraśnia. Paśla zaviaršeńnia hałasavańnia Rada kiraŭnikoŭ JECB płanuje pryniać kančatkovaje rašeńnie prykładna ŭ kancy hoda.
Heta stanie pieršym maštabnym abnaŭleńniem jeŭrabanknot z momantu ŭviadzieńnia jeŭra ŭ abaračeńnie bolš za dvaccać hadoŭ tamu. Dyzajn banknot u valutnym sajuzie, jaki abjadnoŭvaje 21 krainu, zaŭsiody byŭ adčuvalnaj temaj, bo vykarystańnie nacyjanalnaj simvoliki mahło b vyklikać sprečki. Tamu na sučasnych banknotach namalavanyja ŭmoŭnyja masty, vokny i bramy, jakija nie paŭtarajuć realnyja architekturnyja pomniki.
Pavodle słoŭ Kryścin Łahard, jeŭrabanknoty — heta nie tolki płaciežny srodak, ale i adzin z najbolš paznavalnych simvałaŭ Jeŭropy.
Praca nad novymi papiarovymi hrašyma viadziecca adnačasova z padrychtoŭkaj da zapusku ličbavaha jeŭra. Akramia novaha mastackaha afarmleńnia, banknoty atrymajuć i sučasnyja elemienty abarony ad padrobak.
Prajekt abnaŭleńnia byŭ zapuščany jašče ŭ 2021 hodzie. Spačatku razhladalisia siem roznych tem, ale paśla apytańnia hramadzian jeŭrazony ŭ kancy 2023 hoda byli pakinutyja tolki dźvie — «Jeŭrapiejskaja kultura» i «Reki i ptuški».
Dakładnyja terminy źjaŭleńnia novych banknot pakul nie nazyvajucca. Paśla vybaru pieramožnaha dyzajnu jaho jašče buduć dapracoŭvać, praviarać i tolki paśla hetaha pačnuć drukavać novyja hrošy, jakija pastupova ŭvojduć u abaračeńnie ŭ najbližejšyja hady.
Padobnyja dyskusii pra dyzajn nacyjanalnych valut adbyvajucca i ŭ inšych krainach. Tak, niadaŭna Bank Anhlii prapanavaŭ hramadzianam vybrać vyjavy pradstaŭnikoŭ dzikaj pryrody, jakija ŭ budučyni mohuć zamianić na banknotach histaryčnych dziejačaŭ, u tym liku Uinstana Čerčyla, Džejn Ościn, mastaka Džozefa Mełarda Uiljama Ciorniera i matematyka Ałana Ćjurynha.
Akramia taho, u Šviejcaryi na refierendumie było padtrymana rašeńnie zamacavać u Kanstytucyi prava na vykarystańnie najaŭnych hrošaj, kab harantavać zachavańnie banknot i maniet jak paŭnavartasnaha srodku raźlikaŭ.
Ciapier čytajuć
22‑hadovy Viktar z-pad Klecka pratrymaŭsia na froncie miesiac. A paśla baćki pierasvarylisia, dzielačy hrabavyja12
Kamientary