Słava Kamisaranka raskazaŭ, jak žyvie, kali zastaŭsia biez rasijskaha hramadzianstva
Biełaruski stendapier padrabiazna raskazaŭ, jak pazbaŭleńnie rasijskaha hramadzianstva ŭskładniła jaho situacyju z dakumientami i ci ŭdasca jamu narešcie pravieści daŭno zapłanavany kancert u Łondanie.
Na adnym sa svaich stendapaŭ Kamisaranka adkazaŭ na pytańnie hledača pra toje, jak ciapier iduć u jaho spravy z dakumientami i što budzie z kancertam u Łondanie, jaki pavinien byŭ adbycca jašče letaś.
Adkaz byŭ značna bolš padrabiaznym, čym čakali ŭ zale. Komik raskazaŭ, što jašče da pačatku poŭnamaštabnaj vajny Rasii z Ukrainaj atrymaŭ rasijskaje hramadzianstva.
«Kab mianie nie čapaŭ Łukašenka. (…) Tamu što ja ŭ vyšuku byŭ pa biełaruskim pašparcie, a nie pa rasijskim. Tam roznaje napisańnie. U vyšuku — Kamisaranka Viačasłaŭ. A «Komisarienko Viačiesłav» — naohuł dobraprystojny čałaviek, nikomu ničoha nie rabiŭ, i nichto jaho adpaviedna nie šukaje», — patłumačyŭ komik.
Što tyčycca biełaruskaha pašparta, to ŭ im, jak śćviardžaje komik, «niama ni staronak, ni miesca dla viz, ni dla piačatak. I chutka jašče skončycca termin dziejańnia hetaha pašparta».
Tamu dla pajezdak jon karystaŭsia rasijskim dakumientam.
Usio źmianiłasia paśla taho, jak Rasija pazbaviła jaho hramadzianstva. Jak zaŭvažaje Kamisaranka, «heta było zroblena nadzvyčaj udała»:
«Jany mianie pazbavili, kali ja byŭ u Dublinie na kancercie. To-bok ja byŭ navat pa-za miežami Jeŭrasajuza (majecca na ŭvazie, pa-za miežami šenhienskaj zony, bo Irłandyja jakraz u składzie ES — NN)».
Pavodle komika, ab rašeńni rasijskich uładaŭ jamu paviedamiŭ arhanizatar kancerta:
«Pamiataju, ja da jaho padychodžu, a jon taki: «Ciabie pazbavili hramadzianstva». Ja kažu: «Što?» Jon kaža: «U ciabie bolš niama hramadzianstva».
Jak pryznaŭsia Kamisaranka, u toj momant jon adrazu zrazumieŭ maštab prablemy i vymušany byŭ chutka dziejničać:
«Ja siadžu i razumieju, što ŭsio, niesapraŭdnyja ŭsie maje dakumienty. Niesapraŭdnyja ŭsie maje talent-vizy ciapier. Niesapraŭdny moj polski DNŽ. I ja razumieju, što mnie treba zajazdžać u Jeŭrasajuz chutčej, čym dojdzie infarmacyja, što mianie pazbavili [hramadzianstva]».
Pa słovach Kamisaranki, jon nabyŭ «samy pieršy bilet u luby horad Polščy». Im byŭ Krakaŭ. Na zvarotnym šlachu jon uvieś čas byŭ na suviazi ź jurystam.
«My prapracoŭvajem varyjant, što mianie nie puskajuć, i ja siadaju ŭ mihracyjnuju turmu. I ź mihracyjnaj turmy padajusia na mižnarodnuju abaronu», — raskazvaje Kamisaranka i ź ironijaj dadaje:
«Tak, voś takaja cana — pažartavaŭ, bł*, pra Łukašenku…».
Pa prylocie, pa słovach komika, u jaho adbyłasia dziŭnaja razmova z pamiežnicaj:
«Ja zajazdžaju. (…) Traplaju na dziaŭčynu, jakaja biare moj pašpart, biare DNŽ, hladzić na DNŽ i takaja: «Meta vizitu». Ja kažu: «U mianie DNŽ». Jana kaža: «Nu i meta vizitu». I ja taki: «Bł*, heta dakładna žeść, karaciej dakładna žeść, mianie zaraz nie puściać». I ŭ vyniku jana mianie prapuskaje».
Ale, pavodle Kamisaranki, navat paśla viartańnia ŭ Polšču prablemy nie skončylisia. Napieradzie byli kancerty ŭ Ispanii, a ich admiena pahražała vialikimi štrafami. Paśla kansultacyj ź mieniedžarami jon vyrašyŭ lacieć, niahledziačy na ryzyku, spadziejučysia, što «pa Jeŭrasajuzie tam ža nie pavinny zaŭvažyć».
Vylecieć spakojna nie atrymałasia. Samym napružanym momantam staŭ vyklik pa hučnaj suviazi pierad pasadkaj na rejs Ryanair.
«Nu ŭsio, bł*, heta ŭsio. Heta vykryli, heta mianie vykryli». I ja idu tudy, (…) padychodžu i taki: «Tak?» I jany takija: «Viačasłaŭ, vy siadzicie la avaryjnaha vychadu, a ci nie mahli b vy pierasieści na…» Ja taki: «Tak!» I jon taki: «Surjozna?» — Ja taki: «Tak, ja mahu! Prosta ŭ samalot puścicie, i ja tam pastaju niedzie ŭ kutku, jakija prablemy?»
Što da pajezdak u Vialikabrytaniju, to, pavodle Kamisaranki, jon spadziajecca, što dziakujučy ŭviedzienaj u krainie sistemie elektronnych viz zmoža adnavić svaju vizu i znoŭ jeździć tudy ź biełaruskim pašpartam, «tam užo nie treba piačatki stavić».
«Tamu bilety nie zdavajcie, žarty buduć», — zapeŭniŭ Kamisaranka.
Nahadajem, letaś MUS Biełarusi ŭnios Kamisaranku ŭ śpis «ekstremistaŭ», a paźniej i «terarystaŭ». Na radzimie jon za svaje žarty ŭ adras Łukašenki byŭ zavočna asudžany da 6 hadoŭ źniavoleńnia. Ź inicyjatyvy FSB jon taksama byŭ pazbaŭleny rasijskaha hramadzianstva. Jamu zabaronieny ŭjezd u hetu krainu.
-
Ajcišnika ź vialikim dośviedam asudzili za «finansavańnie ekstremizmu» i zbroju
-
Zamiest mietaładachoŭki — dubovaja dranica. U centry Viciebska na miescy milicyi adkryłasia kaviarnia ŭ biezdakorna adnoŭlenym 200‑hadovym budynku
-
«Ludzi damovilisia ŭ adzin čas vyjści ŭ łakalnyja ŭčastki i bić usich aktyvistaŭ». Ihar Łosik raskazaŭ pra bunt u Navapołackaj kałonii
Ciapier čytajuć
Druhi vajskoviec, jaki zahinuŭ pry avaryi MAZa pad Asipovičami — 21‑hadovy tenisist ź Viciebska4
Kamientary